Wednesday, June 10, 2015

အမေရိကန်တစ်ဒေါ်လာ ကျပ် ၁၂၃၀ အထိ စံချိန်တင်မြင့်တက်



Eleven Media Group

ရွေးကောက်ပွဲကော်မရှင်ဥက္ကဋ္ဌ၏ မြန်မာနိုင်ငံကို ပိတ်ဆို့မည်ဆိုပါက အခါတစ်ရာပိတ် ဂရုမစိုက်ဘူးဟူသော မှတ်ချက်စကား ထွက်ပေါ်ပြီးနောက် ဒေါ်လာငွေလဲနှုန်း တစ်ရက်အတွင်း ၃၅ ကျပ် မြင့်တက်သွား

ဇွန် ၉ ရက်တွင် အမေရိကန်တစ်ဒေါ်လာ ကျပ် ၁၂၃၀ အထိ စံချိန်တင် မြင့်တက်သွားကြောင်း သိရသည်။ ပြီးခဲ့သည့် မေလဆန်းပိုင်းမှစ၍ ဆက်တိုက်မြင့်တက်လာသော ဒေါ်လာငွေလဲနှုန်းသည် ဇွန် ၈ ရက်က ပြုလုပ်သော ရွေးကောက်ပွဲကော်မရှင်၏ မီဒီယာတွေ့ဆုံပွဲတွင် ကော်မရှင်ဥက္ကဋ္ဌက ရွေးကောက်ပွဲနှင့် ပတ်သက်သောမှတ်ချက်စကား ထွက်ပေါ်ပြီးနောက် ဒေါ်လာငွေလဲနှုန်းမှာ တစ်ရက်အတွင်း ၃၅ကျပ် မြင့်တက်သွားခြင်းဖြစ်သည်။
ဇွန် ၈ ရက်က ပြုလုပ်သော ရွေးကောက်ပွဲကော်မရှင်၏ မီဒီယာရှင်းလင်းပွဲတွင် ကော်မရှင်ဥက္ကဋ္ဌ ဦးတင်အေးက “....၄ ရက်နေ့ကျတော့ မစ်မက်ကော်နယ်က ဘာပြောလဲဆိုတော့ မြန်မာပြည်မှာ ရွေးကောက်ပွဲက လူထုဆန္ဒ မထင်ဟပ်ဘူးဆိုရင် တပ်မတော်နဲ့ ဆက်ဆံရေး ပျက်ပြားသွားနိုင်တယ်။ စီးပွားရေး ပျက်ပြားသွားနိုင်တယ်။ ကျွန်တော်မကြောက်ပါဘူး။ လူထုဆန္ဒ မထင်ဟပ်ဘူးဆိုတာ ဘာတိုင်းတာတာလဲ။ သူနိုင်စေချင်တဲ့ပါတီ မနိုင်လို့ လူထုဆန္ဒ မထင်ဟပ်ဘူးဆိုရင် ဒီဟာမျိုးကျတော့ လက်မခံနိုင်ဘူး။ သူနိုင်စေချင်တဲ့ပါတီ နိုင်တာဟာ လူထုဆန္ဒ ထင်ဟပ်တယ်လို့ သဘောထားရင် NO ပဲ။ ဘယ်ပါတီ နိုင်နိုင် လူထုသဘောထားအတိုင်းပဲ ဖြစ်ရမယ်။ သူ နိုင်စေချင်တဲ့ ပါတီမနိုင်ရင် လူထုသဘောထား မထင်ဟပ်တာဖြစ်တဲ့အတွက်ကြောင့် မြန်မာပြည်ကို ပိတ်ဆို့မယ်ဆိုရင် အခါ ၁၀၀ ပိတ် ကျွန်တော် ဂရုမစိုက်ဘူး...” ဟု ပြောကြားခဲ့ခြင်းဖြစ်သည်။

0 အကြံပြုခြင်း: