Tuesday, April 7, 2015

မြန်မာသမ္မတသိန်းစိန်ပုံအောက်က မှတ်ချက်က ဒေါ်အောင်ဆန်းစုကြည်စကား ဖော်ပြ



U Ravika
ပညာရှိစကား

"ဒေါ်အောင်ဆန်းစုကြည်အနေနဲ့ မြန်မာနိုင်ငံကို နိုင်နိုင်နင်းနင်း အုပ်ချုပ်နိုင်မှာမဟုတ်၊ အုပ်ချုပ်ပါက မြန်မာနိုင်ငံဟာ ဘော့စနီးယား-ဟာဇီဂိုဘိုင်းနားလို တစ်စစီ ပြိုကွဲသွားလိမ့်မယ်၊ ဒါကြောင့် သူမဟာ နိုင်ငံရေးသင်္ကေတတစ်ခုအနေနဲ့သာ နေသင့်တယ်" (လီကွမ်ယူ-၁၉၉၆)

"" စင်ကာပူက နိုင်ငံ ငယ်လေးဖြစ်ပေမယ့် လွတ်လပ်တဲ့ အမှီအခိုကင်းတဲ့နိုင်ငံ ဖြစ်အောင် လီကွမ်ယုက စွမ်းဆောင်ခဲ့တယ် ၊ ဘာသယံဇာတမှ ပြောပလောက်အောင်ကို မရှိသော်ငြားလည်း ၊ လီကွမ်ယု က ရိုးသားပြီး အရည်အချင်းပြည့်ဝတဲ့ ခေါင်းဆောင်တယောက် ဟာ တိုင်းပြည်ရဲ့ဂုဏ်သိက္ခာ ကို မြင့်တင်နိုင်တယ် ဆိုတာ သက်သေပြခဲ့ပါတယ် ။" (ဒေါ်အောင်ဆန်းစုကြည် -၂၀၁၅)

အပေါ်က စကား(၂)ခုကို နှိုင်းကြည့်ပါ။ မစ္စလီစကားဟာ စစ်ခွေးတွေရဲ့ လက်သုံးစကားပါ။ မစ္စတာလီကလည်း တကယ်ပြောခဲ့တာပါ။ မစ္စတာလီက ဒေါ်စုကိုပဲ မှတ်ချက်စကားပြုခဲ့တာ မဟုတ်ပါဘူး။ စစ်တပ်အရာရှိတွေနဲ့ စကားပြောရတာဟာ လူသေတွေနဲ့ စကားပြောရသလိုပါပဲလို့ မှတ်ချက်ပြုဖူးသူလည်း ဖြစ်ပါတယ်။ မစ္စတာလီဆုံးတော့ ဟိုက အင်တာဗျူးလုပ်တယ်။ သမ္မတသိန်းစိန်ကို အင်တာဗျူးလုပ်ခဲ့လေသလား မသိရပါ။ ဒေါ်စုကိုတော့ အင်တာဗျူးလုပ်သွားခဲ့ပါတယ်။ ဒေါ်စုလက်တန်းပြောသွားတဲ့ စကားကို ဖတ်ကြည့်ပါ။ သူ့မှာ အဃာတဆိုတာ မရှိဘူး။ နာရေးတစ်ခုမှာ ဘာကို ပြောရမလဲ သိတယ်။ အကောင်းနဲ့အဆိုးမှာ အကောင်းကိုပဲ ရွေးပြောတယ်။ ဒေါ်စုမှတ်ချက်ကို မစ္စတာလီ ကြားစေချင်တယ်။ ဒါပေမဲ့ သူ ကြားဖို့ မထိုက်တန်တော့ပါဘူး။

ဟိုက နားရေးသွားတက်တဲ့ နိုင်ငံတကာခေါင်းဆောင်တွေကို ပုံနဲ့ ဖော်ပြပေးပါတယ်။ မြန်မာသမ္မတသိန်းစိန်လည်း မစ္စတာလီရဲ့ နာရေးကို တက်ရောက်ခဲ့တာမို့ သူ့ပုံကိုလည်း ဖော်ပြထားတာကို တွေ့ရပါတယ်။ ဒါပေမဲ့ သူ့ပုံအောက်က မှတ်ချက်က ဒေါ်အောင်ဆန်းစုကြည်စကား ဖြစ်နေတယ်။ quotation က မှားခဲ့ဟန်မတူပါ။ တမင်တကာ ထည့်ခဲ့တယ်လို့ ယူဆမိပါတယ်။ စင်ကာပူနိုင်ငံက ဒေါ်အောင်ဆန်းစုကြည်စကားကို သမ္မတသိန်းစိန်ပုံအောက်မှာ ထည့်လိုက်ခြင်းဖြင့် "သမ္မတသိန်းစိန်ကို ရိုးသားပါ"လို့ ပြောသလို ဖြစ်နေပါတယ်။

အနည်းဆုံးတစ်ခုတော့ ရှိတယ်။ မြန်မာနိုင်ငံကို သံလက်သီးနဲ့ အုပ်ချုပ်မှ ရမယ်လို့ မစ္စတာလီ ယူဆခဲ့ပါတယ်။ မစ္စတာလီရည်ညွန်းတဲ့ စစ်တပ်ကနေ လူပျံတော်ဖြစ်လာတဲ့ သမ္မတသိန်းစိန်ပုံအောက်မှာ ဒေါ်စုစကားကို တည့်ဖို့ စင်ကာပူဝန်ကြီးချုပ်ရုံးက ဆုံးဖြတ်ခဲ့ခြင်းမှာ မစ္စတာလီစကားဟာ မှားယွင်းခဲ့ကြောင်း သက်သေတစ်ခု ဖြစ်တယ်။ ဒါပေမဲ့ မစ္စတာလီရဲ့ သုံးသပ်ချက်ဟာ ၁၉၉၆-ခုနှစ်က ဖြစ်တယ်။ အဲဒီအချိန်တုန်းက တိုင်းရင်းသားတွေအတော်များများက အစိုးရနဲ့ အပစ်ရပ်ပြီး ငြိမ်းအဖွဲ့တွေ ဖြစ်နေခဲ့ကြတာပါ။ တိုင်းရင်းသားအချင်းချင်းကလည်း ဘယ်တုန်းကမှ ညီညွတ်လှတယ်ရယ်လို့ မရှိပါဘူး။ အခုလည်း သိပ်ညီညွတ်လှတာ မဟုတ်ပါ။ ဒါကြောင့် မစ္စတာလီက ဒီတိုင်းရင်းသားတွေကို သံလက်သီးနဲ့ အုပ်ချုပ်မှ ဖြစ်မယ်၊ မြန်မာ့တပ်မတော်မရှိရင် တဗိုလ်တမင်း ထောင်လာမှာမုချပါပဲလို့ ရှုမြင်ခဲ့တာ ဖြစ်တယ်။ အခု UNFC အဖွဲ့ဝင်တွေ နဲ့ UNFC အဖွဲ့ဝင်မဟုတ်တဲ့ အဖွဲ့အစည်းတွေက အစိုးရကို ဖိအားပေးရမဲ့အစား အချင်းချင်းပဲ ဖ်ိအားတွေ ပေးနေတာကိုလည်း လေ့လာတွေ့ရှိနိုင်ပါတယ်။ ဒီတိုင်းရင်းသားတွေနဲ့ အတိုက်အခံတွေအားလုံးဟာ ဒေါ်အောင်ဆန်းစုကြည်နောက်မှာ မားမားမတ်မတ် ရပ်တည်ပေးကြမလားဆိုတာ သံသယဖြစ်စရာပါပဲ။

ဒါကြောင့် မစ္စတာလီရဲ့ စကားကို သတိပေးခေါင်းလောင်းသံအဖြစ် အသုံးချပြီး ဒေါ်စုစကားကို အလင်းတန်းတစ်ခုအဖြစ် မှတ်ယူရမှာ ဖြစ်တယ်။ တိုင်းရင်းသားအားလုံး စည်းလုံးညီညွတ်ကြဖို့ အချိန်တန်ပါပြီ။ အတိုက်အခံတွေအားလုံး စုစည်းညီညွတ်ကြဖို့လည်း အချိန်တန်ပါပြီ။ တိုင်းရင်းသားအားလုံးနဲ့ အတိုက်အခံတွေအားလုံး ဒေါ်အောင်ဆန်းစုကြည်နောက်မှာ ရပ်တည်ပေးကြဖို့ လိုပါပြီ။

ဓာတ်ပုံကိုတော့ ကိုလိုလွင် (ဗမာ့သားကောင်း)ကနေ ယူသုံးတယ်။

0 အကြံပြုခြင်း: