Tuesday, April 7, 2015

နို့သောက် နောက်သို့၊ ထီးပျောက် ထောက်ပြီး၊ အပစ်ရပ် အပြတ်ရစ်



U Ravika

လက်ရှိတဘောင်အရ အစိုးရက နောက်သို့ ထောက်ပြီး အပြတ်ရစ်ဖို့ ညစ်လေပြီ။ အချက်အလက်နဲ့တကွ ရှင်းပြပါ့မယ်။ နို့သောက်ပါလို့ သိန်းစိန်က နိမိတ်ပြကတည်းက နောက်သို့ ပြန်ရောက်သွားခဲ့ရတယ်။ ရှေ့မတိုးနိုင်တော့ပါ။ တစ်ဖန် ထီးပျောက်တဲ့ပုံကို တင်ပြီး သိန်းစိန်နဲ့ မင်းအောင်လှိုင်တို့က သွားလေသူကြီးရဲ့ မျက်နှာကို ပြန်ထောက်ခဲ့ရတယ်။ အခု အပစ်ရပ်ဖို့ကိစ္စ လုံးပမ်းနေကြတယ်။ KNU ဥက္ကဋ္ဌမူတူစေးဖိုးနဲ့ EBO ပဲ့ကိုင်ရှင် ဟန်ယောင်ဝေတောင် ဒေါ်အောင်ဆန်းစုကြည်နားရောက်ခဲ့ပြီ။ မိမိတို့ စောင့်ကြည့်ရမှာကတော့ RCSS, KNU, & NLD တို့ ပူးပေါင်းပြီး မင်းအောင်လှိုင်ကို ပျော့ပျောင်းအောင် လုပ်နိုင်မလားဆိုတာပဲဖြစ်တယ်။

(၁) မူမမှန်တဲ့ ပြုပြင်ပြောင်းလဲရေးတွေ

သမ္မတသိန်းစိန်နဲ့ ဒေါ်အောင်ဆန်းစုကြည်တို့က အမေရိကန်ပြည်ထောင်စုကို အလည်အပတ်ရောက်လာတဲ့ ၂၀၁၂ ခုနှစ်မှာ မြန်မာပြည်သူများနဲ့ တကမ္ဘာလုံးက မျှော်လင့်ချက်ထားရှိခဲ့တယ်။ ဓာတ်ပြားဟောင်းကို ပြန်ဖွင့်ရရင် သမ္မတသိန်းစိန်ကိုတောင် Champion of reform လို့ ဘွဲ့တံဆိပ်ပေးခဲ့ကြတယ်။ အခု (၅)နှစ်အတွင်းမှာ ပြုပြင်ပြောင်းလဲရေးချိန်ပီယံဆိုတဲ့ စကားလုံးကို မကြးရတော့ပါ။ ဒါဟာ ဘာကြောင့်ပါလဲ။
အာဏာရှင်အတော်များများက စစ်မှန်တဲ့ နိုင်ငံရေးပြုပြင်ပြောင်းလဲမှု genene political reform ကို အမှန်တကယ် မလုပ်ဘဲ နိုင်ငံရေးအရ ဖြေလျှော့မှုအချို့ (political liberalizations) ကို အသုံးချပြီး အာဏာရှင်စနစ်ကို ကယ်တင်လေ့ရှိတယ်။ ဒါကို regime survival kits လို့ မိမိအမည်ပေးမယ်။ အခု မြန်မာအစိုးရလုပ်ပုံကိုင်ပုံကို ကြည့်ရင် အရင်က စစ်တပ်အရာရှိဟောင်းတွေက ဘောင်းဘီချွတ်ပြီး အရပ်သားအစိုးရဟန်ဆောင်ကာ စစ်အာဏာရှင်ကယ်တင်ရေးမဟာဗျူဟာကို အကောင်အထည်ဖော်နေခြင်းမျှသာ ဖြစ်တယ်။ ဒါကို Regime-driven survival strategy လို့ မိမိပြောမယ်။

၂၀၀၇-ခုနှစ် ရွှေဝါရောင်ကိစ္စ ဖြစ်ပြီးတဲ့နောက်မှာ အာရပ်နွေဦးဒီမိုကရေစီအရေးတော်ပုံတွေ ဆက်တိုက်ဖြစ်ပေါ်လာခဲ့ပါတယ်။ မြန်မာစစ်အာဏာရှင်တို့ဟာ ဒီအတိုင်း ဆက်သွားလို့ မရတော့ဘူးလို့ သိရှိလာကြတယ်။ ဒါကြောင့် စစ်အာဏာရှင်စနစ်ကယ်တင်ရေးစီမံကိန်းကို စတင်ခဲ့တယ်။ ၂၀၀၈-ခုနှစ်မှာ အမျိုးသားညီလာခံကို လက်စသတ်ခဲ့ပေးခဲ့တယ်။ ၂၀၁၀-ခုနှစ်မှာ မတရားတဲ့ ရွေးကောက်ပွဲကို ကျင်းပပေးခဲ့ကြတယ်။ NLD ပါတီကို မှတ်ပုံတင်စေခဲ့တယ်။ ကြားဖြတ်ရွေးကောက်ပွဲ ဝင်နိုင်အောင် လုပ်ထုံးလုပ်နည်းဥပဒေအချို့ကို ဖြေလျှော့ပေးခဲ့တယ်။ လွှတ်တော်ကို ဝင်ရောက်အောင် ဆွဲဆောင်နိုင်ခဲ့တယ်။ ဒါတွေဟာ နိုင်ငံရေးအရ ဖြေလျှော့ပေးခြင်း Political Liberalization လို့ ခေါ်ပါတယ်။ လာမဲ့ ၂၀၁၅-ခုနှစ်အထွေထွေရွေးကောက်ပွဲကိုလည်း လုပ်ပေးပါလိမ့်မယ်။

ဒါပေမဲ့ ရွေးကောက်ပွဲက လွတ်လပ်ရုံပဲဆိုရင် ဒါဟာ ဒီမိုကရေစီမဟုတ်သေးဘူး။ တရားမျှတဖို့လည်း လိုပါ့မယ်။ စစ်အာဏာရှင်တို့ဟာ ရွေးကောက်ပွဲကို လွတ်လွတ်လပ်လပ် ကျင်းပပေးနိုင်ပါ့မယ်။ ဒါဟာ နိုင်ငံရေးအရ ဖြေလျှော့ပေးတဲ့အဆင့်ပဲ ရှိပြီး နိုင်ငံရေးပြုပြင်ပြောင်းလဲရေးမဟုတ်သေးလို့ ဖြစ်တယ်။ ဒါကို ခွင့်ပြုခြင်းဖြင့် သူတို့ရဲ့ အာဏာစက်ကို ခြိမ်းခြောက်မှု မရှိပါဘူး။ ဒါကို လွတ်လပ်တဲ့ ရွေးကောက်ပွဲကို ခွင့်ပြုခြင်းအားဖြင့် ပြည်သူလူထုကို ထုံဆေးထိုးထားနိုင်မယ်၊ အခြားနိုင်ငံရေးအကြပ်အတည်း၊ လူမှုရေးအကြပ်အတည်းတွေနဲ့ စီးပွားရေးအကြပ်အတည်းတွေကို အာရုံလွှဲရာရောက်စေနိုင်ပါတယ်။ အနည်းဆုံး အမှန်တကယ် အာဏာရှိတဲ့ စစ်တပ်ကို မေ့မေ့လျှော့လျှော့ ဖြစ်သွားစေမှာ ဖြစ်ပါတယ်။

(၂) နိုင်ငံရေးပြုပြင်ပြောင်းလဲရေးဆိုတာ ဘာလဲ

နိုင်ငံရေးပြုပြင်ပြောင်းလဲရေး (Political reform) ဆိုတာ နိုင်ငံရေးအကူးအပြောင်းကာလ (Political transition) မှာ အင်မတန် အရေးပါတယ်။ မြန်မာနိုင်ငံမှာ နိုင်ငံရေးပြုပြင်ပြောင်းလဲရေးကို လုပ်ကြမယ်ဆိုရင် ဒီမိုကရေစီနည်းကျအောင် ပြုပြင်ပြောင်းလဲရမယ်လို့ မိမိတို့ သိထားပါတယ်။ ဒီမိုကရေစီနည်းကျအောင် ပြောင်းလဲရမယ်လို့ ပြောရင်လည်း ဒီမိုကရေစီအနှစ်သာရ မရှိတဲ့ လက်ရှိ ၂၀၀၈ -ခုဖွဲ့စည်းပုံကို မဖြစ်မနေ ပြင်ရမယ်ဆိုတာ သေချာပါတယ်။ နိုင်ငံရေးပြုပြင်ပြောင်းလဲရေးဆိုတာ အတိုက်အခံတွေက စစ်အာဏာရှင်စနစ်ကို ပြောင်းလဲလက်ခံလိုက်တာ မဟုတ်ဘူးဆိုတာ ပြောစရာမလိုပါဘူး။

အခု သမ္မတသိန်းစိန်နဲ့ မင်းအောင်လှိုင်တို့က ဖွဲ့စည်းပုံပြင်ဖို့ အလားအလာမရှိပုံကို ကိုယ်စီပြောသွားကြပါတယ်။ နောက်တစ်ခုဖြစ်တဲ့ သတင်းစာနယ်ဇင်းလွတ်လပ်ခွင့်ကို ပြန်ချုပ်ကိုင်ထားတာတို့၊ ဆန္ဒပြသူများကို အင်အားသုံးဖြိုခွဲတာတို့၊ လယ်သိမ်းမြေသိမ်းပြဿနာကို မဖြေရှင်းဘဲ ဆန္ဒပြသူများကို ပြန်ပြီးတော့ တရားစွဲတာတို့၊ ဥပဒေမဲ့လုပ်ရပ်များကို ဥပဒေကြောင်းနဲ့ ညီတယ်လို့ ပြောလာတာတို့ဟာ ပြုပြင်ပြောင်းလဲရေးအတွက် အလားအလာ မကောင်းလှပါဘူး။ စီးပွားရေးဖြေလျှော့ပေးတာတို့တောင် များများစားစား မရှိသေးပါဘူး။ နေရာတိုင်းမှာ အစိုးရ၊ စစ်တပ်နဲ့ ခရိုနီတို့ကပဲ လက်ဝါးကြီးအုပ်ထားတာ ဖြစ်တယ်။ ဒါဟာ နောက်တစ်ဆင့်ဖြစ်တဲ့ Democratization ဒီမိုကရေစီမှုပြုခြင်းကို အိပ်မက်တောင် မက်လို့ မရတဲ့အနေအထားပါ။ ဖွဲ့စည်းပုံတောင် မပြင်ရသေးဘဲ ဒီမိုကရေစီမှုပြုလို့ ဘယ်ဖြစ်မလဲ။

Democratization ဆိုရင် လူထုက အစိုးရအပေါ် သြဇာသက်ရောက်မှု ရှိတယ်။ အခုအစိုးရက အာဏာရှင်ဆန်တဲ့အစိုးရ (Autoritarians) အဆင့်ထက် ပိုပါတယ်။ အာဏာရှင်ဆန်တဲ့ ဝါဒမှာတောင် ဒီမိုကရေစီမှုကို ပြုလို့မရပါဘူး။ ဒီမိုကရေစီ ရှင်သန်လို့ မရပါဘူး။ ဒါကြောင့် ပြည်သူတွေကို နည်းနည်းလေးတောင် စုဝေးခွင့် မပေးနိုင်တာ ဖြစ်တယ်။ ပြည်သူတွေက အစိုးရကို နည်းနည်းလေး ဖိအားပေးလာတာနဲ့ စစ်တပ်၊ အစိုးရနဲ့ စစ်လော်ဘီ စာနယ်ဇင်းတို့က တရားဥပဒေစိုးမိုးရေးအကြောင်းကို တသွင်သွင်ပြောပြီး တာဝန်လက်ပတ်နဲ့ စွမ်းအားရှင်တွေကို ရိုက်ခိုင်းတော့တာပဲဖြစ်တယ်။ အဆိုးဆုံးက ရဲတပ်ဖွဲ့ဝင်တို့ဟာ ယာကူဇာဂိုဏ်းဝင်ဆန်ဆန် အကြမ်းဖက်နေကြခြင်းပဲ ဖြစ်တယ်။ ဒီအခြေအနေမှာ ဒီမိုကရေစီမှုကို ဘယ်လိုပြုနိုင်မှာလဲ။ စိတ်ကူးယဉ်နေတဲ့အဆင့်ထက် မကျော်ပါဘူး။

၃။ အာဏာရှင်စနစ်လည်း အနိစ္စတရားပဲ

၂၀၁၅-ခုနှစ်အထွေထွေရွေးကောက်ပွဲ နီးကပ်လာတာနဲ့အမျှ စစ်တပ်က ဘာကြောင့် ထိုးစစ်ကို အကြီးအကျယ် ဆင်နွှဲလာပါသလဲ။ ဒါက မေးခွန်းတစ်ခုပါ။ နောက်ပြီး ဘာကြောင့် ဆွေးနွေးပွဲတွေ စိပ်လာပါသလဲ။ ဒါလည်း မေးခွန်းတစ်ခုပါ။ ဘာကြောင့် ၆-ပွင့်ဆိုင်နဲ့ ဝမ်းချဖို့ စိတ်ကူးလာပါသလဲ။ ဒါလည်း မေးခွန်းတစ်ခုပါ။ နောက်ပြီး ပြည်နယ်နဲ့တိုင်းဆိုင်ရာဇယားကွက်တွေကို ဘာကြောင့် ဖြေလျော့ပေးပါသလဲ။ ဒါလည်း မေးခွန်းတစ်ခုပါ။ ဇယားကွက်အချို့ကို ဖြေလျှော့ပေးခြင်းမှာ တိုင်းရင်းသားများကို တံခါးဖွင့်ပေးတာမဟုတ်ဘဲ NLD ကို လွှတ်တော်ကျုံးသို့ သွင်းခဲ့သလို KNU/RCSS စတဲ့ တိုင်းရင်းသားလက်နက်ကိုင်အဖွဲ့အစည်းအချို့ကို ကျုံးသွင်းဖို့ ဖြစ်တယ်။

မိမိတို့တွေ့မြင်လိုတာကတော့ ဖွဲ့စည်းပုံကို မြန်မြန်ဆန်ဆန် ပြင်ပါ။ ဖွဲ့စည်းပုံကို ဒီမိုကရေစီနည်းကျကျ၊ ဖက်ဒရယ်နည်းကျကျ ပြင်ခဲ့ရင်တောင် ဒီမိုကရေစီမှုပြုဖို့ နှစ်ပေါင်းများစွာ ကြာပါအုံးမယ်။ အခုကျတော့ ဖွဲ့စည်းပုံပြင်ဖို့ကို ဆွေးနွေးပွဲနဲ့ အချိန်ဆွဲနေပါတယ်။ ဒါဟာ အစိုးရရဲ့ မရိုးသားမှု ဖြစ်တယ်။ ဒီလိုမရိုးသားမှုတွေကြောင့်ပဲ အစိုးရအပေါ်မှာ ဖိအားတွေ အများကြီး ဖြစ်စေပါတယ်။ အဲဒီဖိအားတွေကို လျှော့ပါးစေဖို့နဲ့ ပြည်သူတို့ကို အာရုံပြောင်းဖို့ ကြံမိကြံရာ ကြံနေကျအတိုင်း တိုင်းရင်းသားတွေကို ထိုးစစ်ဆင်တယ်၊ ကျောင်းသားတွေကို ဖိနှိပ်ပြတယ်၊ တောင်သူလယ်သမားတွေကို ဖမ်းပြတယ်။ ဒေါ်အောင်ဆန်းစုကြည်ကတော့ သမ္မတသိန်းစိန်ကို ရိုးသားဖို့ သွယ်ဝိုက်တဲ့နည်းနဲ့ ပြောသွားပါတယ်။ စင်ကာပူနဲ့ လုပ်တဲ့ အင်တာဗျူးတစ်ခုမှာပါ။ လီကွမ်ယုနဲ့ သူရဲ့ ရိုးသားမှုနဲ့ အရည်အချင်းရှိမှုတွေကြောင့်ပဲ စင်ကာပူကို ဂုဏ်ရောင်တောက်စေခဲ့တယ်လို့ ဆိုပါတယ်။ စင်ကာပူဝန်ကြီးချုပ်ရုံးမှတ်တမ်းစာအုပ်ရှိ သမ္မတသိန်းစိန်ပုံအောက်မှာ ဒေါ်အောင်ဆန်းစုကြည်စကားကို ဖော်ပြခြင်းဖြင့် အဓိပ္ပါယ်ပေါင်းမြောက်မြားစွာ ထွက်ရှိစေပါတယ်။

စစ်အုပ်စုတွေ မသိတာ တစ်ခု ရှိတယ်။ ဒေါ်အောင်ဆန်းစုကြည်လို ခေါင်းဆောင်တစ်ယောက်ကို နှစ်ခါ မရနိုင်ဘူးဆိုတာပဲဖြစ်တယ်။ ဒေါ်အောင်ဆန်းစုကြည်ကြောင့် ဒီပြည်ထောင်စုက ဘော့စနီးယား-ဟာဇီဂိုင်းဗီနား ဖြစ်လာမှာမဟုတ်ဘဲ ဒေါ်စုမရှိလို့ သိန်းစိန်လိုလူကြောင့်ပဲ ဆိုဗီယက်ပြည်ထောင်စုပြိုကွဲသလို ပြိုကွဲစေမှာ မုချပါပဲ။ ဂေါဘာချော့(ပ်)ရဲ့ဖြစ်အင်ကို ပြန်ကြည့်ပါ။ Mikhail Gorbachev က အခုစစ်အုပ်စုလိုပဲ ကွန်မြူနစ်စနစ်ကို ပေါင်ဒါသပြီး ရုရှားပြည်သူတွေကို နိုင်ငံရေးဖြေလျှော့မှုတွေ လုပ်ဖူးပါတယ်။ သူရဲ့ Glasnot Reform ဟာ အခုမြန်မာအစိုးရလုပ်နေတဲ့ Political Liberalization နဲ့ အားလုံးနီးပါး ဆင်တူနေပါတယ်။ ဓားစာခံရှာလိုတဲ့အခါတိုင်း တိုင်းရင်းသားတွေနဲ့ ကျောင်းသားတွေကို သွားသွားပြီး ရန်သွားမစနဲ့ဗျ။ အခု ရခိုင်က ရခိုင်ပြည်မှာ စစ်မျက်နှာဖွင့်လာနိုင်သလို ဘက်ပေါင်းစုံနိုင်ငံရေးအံတုမှုနဲ့လည်း ရင်ဆိုင်ရနိုင်ပါတယ်။ အနိစ္စတရားထဲမှာ အာဏာရှင်စနစ်လည်း ပါဝင်ပါတယ်။ မမြဲပါဘူး။ နိုင်ငံရေးမျက်လှည့်ပြရမဲ့အချိန် မဟုတ်တော့ပါဘူး။ အလုံးစုံမပျက်သေးခင် ကောင်းကောင်းမွန်မွန်နဲ့ အာဏာလွှဲပေးဖို့ လိုပါ့မယ်။

0 အကြံပြုခြင်း: