Tuesday, April 7, 2015

တပ်မတော်မူ(၆)ချက်ဆိုတာ ဘာလဲ



U Ravika

၂၀၁၃ ခုမှာ မင်းအောင်လှိုင်က တပ်မတော်မူ(၆)ချက်ဆိုပြီး ပြောလာပါတယ်။ အခု အကြိမ်(၇၀)ပြည့်တပ်မတော်နေ့မှာလည်း ဒီမူ(၆)ချက်ကို ငြိမ်းချမ်းရေးလမ်းစဉ်ဖြစ်တယ်လို့ ဆိုလာပြန်ပါတယ်။

တပ်မတော်မူ (၆)ချက်ဟာ တိုင်းရင်းသားတို့အတွက် အထူးအဆန်းဟုတ်မဟုတ်ပါ။ ဖြတ်လေးဖြတ်ကနေ မြစ်ဖျားခံလာတဲ့ ဖိနှိပ်ရေးမူများသာ ဖြစ်ကြောင်း သိသင့်တယ်။ စိတ်ပါဝင်စားသူများ လေ့လာထားသင့်ပါတယ်။
စစ်အာဏာရှင်ဟောင်း ဦးနေဝင်းက ၁၉၆၂ - ခုနှစ်မှာ အာဏာသိမ်းပြီး တိုင်းရင်းသားတော်လှန်ရေးအဖွဲ့အစည်းများကို ချေမှုန်းဖို့ ပြင်ဆင်ခဲ့ပါတယ်။ အဲဒီတုန်းက အင်အားအကြီးဆုံးမှာ ဗမာပြည်ကွန်မြူနစ်ပါတီနဲ့ ကရင်အမျိုးသားအစည်းအရုံးတို့ပါပဲ။ ဒါပေမဲ့ ဒီနှစ်ဖွဲ့ကိုပဲ ချေမှုန်းချင်ခဲ့တာ မဟုတ်ပါဘူး။ အခြားအဖွဲ့တွေကိုလည်း နည်းတူ ချေမှုန်းရေးနည်းဗျူဟာများ ချမှတ်ခဲ့ပါတယ်။

ဖြတ်လေးဖြတ်နည်းဗျူဟာ (နေဝင်းမူ) (၁၉၆၅ - ၁၉၈၃)
တော်လှန်ရေးကောင်စီက ၁၉၆၅ - ခုနှစ်ကနေ ၁၉၈၃ - ခုနှစ်အထိ ဖြတ်လေးဖြတ်နည်းဗျူဟာကို အသုံးချပြီး တိုင်းရင်းသားတော်လှန်ရေးအဖွဲ့အစည်းများကို နယ်စပ်ဒေသအထိ မောင်းထုတ်နိုင်ခဲ့တယ်။ အဲဒီဖြတ်လေးဖြတ်နည်းဗျူဟာမှာ

၁။ ရိက္ခာဖြတ်ခြင်း၊
၂။ ဘဏ္ဍာငွေဖြတ်ခြင်း၊
၃။ သတင်းနဲ့ဆက်သွယ်ရေးဖြတ်ခြင်းနဲ့
၎။ လူထုနဲ့ အဆက်အသွယ်ဖြတ်ခြင်း တို့ ဖြစ်တယ်။
ဒီဖြတ်လေးဖြတ်ကြောင့် သောင်းကျန်းသူများနဲ့ ဆက်သွယ်တယ်ဆိုပြီး တိုင်းရင်းသားပြည်သူများကို ပေါ်တာဆွဲခြင်း၊ ဖမ်းဆီးခြင်း၊ ထောင်ချခြင်း၊ မုဒိမ်းကျင့်ခြင်း၊ ညှဉ်းပမ်းနှိပ်စက်ခြင်း၊ သတ်ဖြတ်ခြင်းများ ပြုလုပ်ခဲ့သလို ရွာပေါင်းများစွာကိုလည်း ဖျက်ဆီးခဲ့ပါတယ်။ တိုင်းရင်းသားတော်လှန်ရေးသမားများက မိမိတို့ ပြည်သူများကို ညှာတာထောက်ထားရတာနဲ့ တိုက်ပွဲတွေမှာ အသာစီး မရနိုင်ခဲ့ကြပါဘူး။ ဒါကြောင့် ရပ်ရွာနဲ့ ဝေးတဲ့ တောစွန်တောင်ဖျားနယ်စပ်ဒေသများကို ရွှေ့သွားခဲ့ကြရပါတယ်။ ဒါပေမဲ့ ၁၉၈၀ ပြည့်နှစ်များမှာ ဆိုရှယ်လစ်စီးပွားရေးစနစ်ကြောင့် ကမ္ဘာ့အဆင်းရဲဆုံးနိုင်ငံဘွဲ့ကို ရရှိဖို့ နီးစပ်လာတာနဲ့အမျှ နယ်စပ်တွေမှာ မှောင်ခိုစီးပွားရေးက အားကောင်းလာခဲ့ပါတယ်။ ဒါကြောင့် နေဝင်း အသုံးပြုခဲ့တဲ့ ဖြတ်လေးဖြတ်နည်းဗျူဟာဟာ နေဝင်းရဲ့ ဆိုရှယ်လစ်မူဝါဒကြောင့်ပဲ မအောင်မမြင် ဖြစ်သွားခဲ့ရပါတယ်။

လိုက်နာရန်(၁၀)ချက်ခေတ် (စောမောင်မူ) (၁၉၈၉-၂၀၀၀)
ရှစ်လေးလုံးအရေးတော်ပုံကို ဖြိုခွဲပြီး အာဏာရလာတဲ့ နိုင်ငံတော်ငြိမ်ဝပ်ပိပြားမှု တည်ဆောက်ရေးအဖွဲ့ (နဝတ)ဟာ ရဲရင့်တဲ့ ချဉ်းကပ်နည်းတစ်မျိုးကို သုံးလာပါတယ်။ ဖြတ်လေးဖြတ်ကို အရောင်ဆိုးပြီး အနည်းငယ် လျှော့ပေးသလို လုပ်တယ်။ ပြီးတော့ ကွန်မြူနစ်ပါတီကို အပြုတ်တိုက်ဖို့ ဘာပဲပေးရပေးရ ပေးပြီး တစ်ဖွဲ့ချင်းဖြိုတဲ့နည်းကို ကျင့်သုံးလာတယ်။ အပစ်ရပ်ကို အချိန်ဆွဲထားနိုင်ခဲ့ရင် တော်လှန်ရေးစိတ်ဓာတ် ပျောက်ကုန်မယ်လို့ တွက်ထားကြပါတယ်။ ဖြတ်(၁၀)ဖြတ်ကို ဖြတ်လို့ မသုံးတော့ဘဲ လိုက်နာရန် တစ်ဖက်အဖွဲ့ လိုက်နာရန် အချက်(၁၀)ချက်လို့ ပြောင်းလဲခေါ်ဝေါ်ခဲ့တယ်။

၁။ သတ်မှတ်နယ်မြေအတွင်းမှာပဲ တပ်ဖွဲ့တွေ နေထိုင်ရမယ်။
၂။ အင်အားတိုးချဲ့ခြင်းမပြုရ။
၃။ ဆက်ကြေး၊ အကောက်အခွန်များ မကောက်ခံရ။
၎။ ပြည်သူလူထုထံမှာ ရိက္ခာသီးနှံ ပစ္စည်းများ မကောက်ခံရ။
၅။ နိုင်ငံတော်အုပ်ချုပ်ရေးမှာ ဝင်ရောက်စွက်ဖက်ခြင်းမပြုရ။
၆။ မြို့ပေါ်နိုင်ငံရေးပါတီများနဲ့ မဆက်သွယ်ရ။
၇။ မတရားအသင်းအဖွဲ့များနဲ့ မဆက်သွယ်ရ။
၈။ ထောက်လှမ်းရေးခွင့်ပြုချက် မယူဘဲ အခြားငြိမ်းအဖွဲ့များနဲ့ မဆက်သွယ်ရ။
၉။ မြို့များကို သွားလာရာမှာ လက်နက်၊ ဆက်သွယ်ရေးစက် မယူရ။
၁၀။ မြို့များကို သွားလာရာမှာ ထောက်လှမ်းရေးကို ကြိုတင်အကြောင်းကြားရမယ်။
ဒီတော့ (၁၀)ချက်မှာ ဖြတ်လေးဖြတ်ပါဝင်နေသလို နဝတတို့ သဘောမကျတဲ့ ဒီမိုကရေစီအင်အားစုများနဲ့ အခြားပြည်တွင်းပြည်ပကျောင်းသားအင်အားစုများနဲ့ပါ အဆက်အသွယ်ဖြတ်ခိုင်းထားကြောင်း တွေ့ရမှာ ဖြစ်တယ်။ ၁၉၉၇ - ခုမှာ စစ်အာဏာရှင်တို့က နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့ (နဝတ)ကနေ နိုင်ငံတော်အေးချမ်းသာယာရေးနဲ့ ဖွဲ့ဖြိုးရေးကောင်စီလို့ ပြောင်းလဲခေါ်ဝေါ်တဲ့အခါမှာလည်းပဲ ဒီအချက်(၁၀)ချက်ကိုပဲ ဆက်လက်ကြည့်သုံးပါတယ်။ ဒါပေမဲ့ ၂၀၀၀ ပြည့်နှစ်နောက်ပိုင်းမှာ စစ်အာဏာရှင်စနစ် တရားဝင်ဖြစ်ရေးအတွက် လက်ရှိဖွဲ့စည်းပုံကို အင်တိုက်အားတိုက် ဆောင်ရွက်ခဲ့ရာ လမ်းပြမြေပုံ(၇)ဆင့်ကို ဦးစားပေးနေရလို့ တိုင်းရင်းသားတို့အရေးမှာ နည်းနည်းလေး လစ်ဟာမှု ရှိခဲ့ပါတယ်။ ဒါပေမဲ့ ဖွဲ့စည်းပုံ အတည်ဖြစ်တာနဲ့ စစ်အစိုးရက ကတိဖျက်ပြီး အပစ်ရပ်ပျက်ပြားမယ်လို့ အဲဒီတုန်းက ဟောကိန်းထုတ်ခဲ့ပါတယ်။

သဘောတူညီချက် (၁၄)ချက်ခေတ် (သန်းရွှေမူ) (၂၀၀၄-၂၀၁၀)
တိုင်းရင်းသားတော်လှန်ရေးအဖွဲ့အစည်းပေါင်းများစွာကို အပစ်ရပ်အောင် စည်းရုံးနိုင်ခဲ့ပြီး အာဏာပါဝါနဲ့ ပြည့်စုံလှပါတယ်ဆိုတဲ့ ဝန်ကြီးချုပ်ခင်ညွန့်ဟာ ၂၀၀၃ ခုမှာ ပြုတ်ကျသွားခဲ့တယ်။ အပစ်ရပ်ရေးဗိသုကာ ခင်ညွန့် ပြုတ်သွားလို့ အရင်းက အချက်အလက်များကိုပဲ အနည်းငယ် ပြောင်းလဲစေပြီး လက်နာရန်ဆိုမဲ့အစား သဘောတူညီချက်ဆိုပြီး လုပ်လိုက်တယ်။

၁။ အစိုးရနဲ့ ဆန့်ကျင်တဲ့ အဖွဲ့များနဲ့ မဆက်သွယ်ရ။
၂။ လက်နက်ကိုင်တော်လှန်ရေးလမ်းစဉ် စွန့်လွှတ်ရမယ်။
၃။ အင်းအားမတိုးချဲ့ရ၊ လူသစ်မစုရ။
၎။ စစ်သင်တန်းမပေးရ၊ စစ်လေ့ကျင့်မှု မလုပ်ရ။
၅။ လူ၊ လက်နက်၊ ဖွဲ့စည်းပုံစာရင်း အသေးစိတ်ပေးရမယ်။
၆။ ဆက်ကြေး၊ ဘိန်းခွန်မကောက်ရ။
၇။ အစိုးရကွပ်ကွဲမှုနဲ့ သွားလာရမယ်။
၈။ သတ်မှတ်နယ်မြေအပြင်ကို သွားရင် တပ်ကို သတင်းပို့ပြီး လက်နက်မဲ့သွားလာရမယ်။
၉။ နိုင်ငံရေးပါတီများနဲ့ ကင်းရှင်းစွာ နေရမယ်။
၁၀။ အစိုးရရဲ့ အုပ်ချုပ်ရေး၊ စီမံခန့်ခွဲရေး၊ တရားစီရင်ရေးအပိုင်းများမှာ ဝင်ရောက်စွက်ဖက်ခြင်းမပြုရ။
၁၁။ နယ်မြေဖြန့်ကျဲပြီး သတ်မှတ်ခြင်းမပြုဘဲ ဖွံ့ဖြိုးရေးလုပ်လိုတဲ့ နေရာများကို သတ်မှတ်ပေးရမယ်။
၁၂။ နေထိုင်စားသောက်ရေးအတွက် နိုင်ငံတော်က ကူညီပံ့ပိုးမယ်။
၁၃။ နိုင်ငံတော်ဦးဆောင်မှုအောက်မှာ ဒေသပြည်သူလူထုအကျိုးစီးပွား ကာကွယ်စောင့်ရှောက်ရမယ်။
၁၄။ နိုင်ငံတော်ရဲ့ မူးယစ်ဆေးတိုက်ဖျက်ရေးလုပ်ငန်းများကို ထောက်ကူရမယ်။
ဒီ(၁၄)ချက်ကို လိုက်နာရမယ်လို့ မပြောဘဲ သဘောတူညီချက်လို့ ပြောင်းသုံးထားတယ်။ ဒါပေမဲ့ ဒီသဘောတူညီချက်မှာ တော်လှန်ရေးဂုဏ်သိက္ခာကို ထိပါးစေတဲ့ အချက်တွေ ပါသလို တိုင်းရင်းသားတို့အင်အားကို လုံးပါးပါးအောင် လုပ်ရာလည်း ရောက်ပါတယ်။ ဒီလိုအပစ်ရပ်ရေးမူကြောင့်ပဲ အင်အား(၈၀၀၀)နီးပါး ရှိခဲ့တဲ့အဖွဲ့ဟာ အခုအခါ အင်အား(၁၀၀၀)တောင် မရှိတော့ပါ။

တပ်မတော်မူ(၆)ချက် (မင်းအောင်လှိုင်မူ) (၂၀၁၃-ယခုထိ)
၂၀၀၈ -ခုမှာ ဖွဲ့စည်းပုံကို အတည်ပြုပြီး ၂၀၁၀ ခုမှာ အတုအပ ရွေးကောက်ပွဲကို ကျင်းပခဲ့တယ်။ ဒီချုပ်ကို ရွေးကောက်ပွဲထဲ ဝင်လို့ မရအောင် ကန့်သတ်ခဲ့ပြီး မဲများကိုလည်း ခိုးယူခဲ့တယ်။ အခု မိမိတို့ ရင်ဆိုင်နေရတဲ့ အစိုးရဟာ အဲဒီအတုအပရွေးကောက်ပွဲကနေ တက်လာတဲ့အစိုးရတစ်ရပ်သာ ဖြစ်ကြောင်း မမေ့ကြဖို့ လိုတယ်။ ၂၀၀၀ ပြည့်နှစ်များက တွက်ထားတဲ့အတိုင်း ဒီအစိုးရက အပစ်ရပ်ကို ဖျက်ဆီးပစ်လိုက်တယ်။ ထိုးစစ်များကို လုပ်တယ်။ ပြီးတော့ အပစ်ရပ်ရေး ပြန်လုပ်တယ်။ ဒါဟာ အချိန်ဆွဲခြင်းတစ်မျိုးပါပဲ။
အပစ်ရပ်ဆွေးနွေးလို့ ကောင်းလာတာနဲ့ ကာချုပ်မင်းအောင်လှိုင်က တပ်မတော်မူ(၆)ချက်ဆိုပြီး ဆိုလာပါတယ်။ အခု အပစ်ရပ်ရေးအတွက် Single Text တစ်ခု ရခါနီးမှာ ငြိမ်နေတဲ့ကရင်နယ်မှာ တိုက်ပွဲသံ ပြန်ကြားရပါတယ်။ ရှမ်းနဲ့ ကချင်ဘက်မှာ ရာဇသံတွေ ပေးပြီး ထိုးစစ်ဆင်နွှဲပြန်ပါတယ်။ ဒါဟာ ဖိနှိပ်နေကျနည်းတစ်နည်းပါပဲ။ ဒီတော့ မင်းအောင်လှိုင်က တပ်မတော်မူ (၆)ချက်ကို ထုတ်ပြီး အပစ်ရပ်ချင်ရင် လိုက်နာရမယ်လို့ ဆိုလာခဲ့ပါတယ်။ အဲဒီမူ (၆)ချက်က ဘာများပါလဲ။

၁။ လူသစ်စုဆောင်းခြင်း၊ အင်အားတိုးချဲ့ခြင်းမပြုရ။
၂။ အခွန်ကောက်ခြင်းမပြုရ။
၃။ ခွင့်ပြုချက်မရဘဲ စခန်းအသစ်တည်ခြင်း၊ သွားလာခြင်းမပြုရ။
၎။ အစိုးရအုပ်ချုပ်ရေးကို ဝင်ရောက်စွက်ဖက်ခြင်းမပြုရ။
၅။ လူသတ်ခြင်းမပြုရ။
၆။ အစိုးရပြည်သူ့စစ်တပ်ဖွဲ့ကို ထိပါးခြင်းမပြုရ။
ဒီမူ(၆)ချက်က အထူးအဆန်းမဟုတ်ပါဘူး။ ခေတ်နဲ့ မညီတော့တဲ့ အရင်က အချက်များကို ဖြုတ်ပြီး တိုင်းရင်းသားများကို လုံးပါးပါးစေမဲ့ အချက်များကိုတော့ တိုင်းရင်းသားတွေ မကုန်မချင်း ဆက်ထားတဲ့ သဘောပါ။ ဒီတော့ တပ်မတော်က တိုင်းရင်းသားတို့အပေါ် ထားရှိတဲ့ သဘောထားမှာ အာဏာရှင်နေဝင်းခေတ်က စပြီး ဒီကနေ့အထိ မပြောင်းမလဲ တည်ရှိနေဆဲလို့ ပြောနိုင်ပါတယ်။ နည်းနည်း လေ့လာကြည့်ရအောင်ပါ။
နံပါတ်(၁)အချက်ဟာ ဖြတ်လေးဖြတ်ခေတ်က (၄)ချက်မြောက်၊ ၁၀-ချက်ခေတ်က (၂)ချက်မြောက်၊ (၁၄)ချက်ခေတ်က (၃) (၄) (၅)ချက်မြောက်နဲ့ အတူတူပဲ ဖြစ်တယ်။
နံပါတ်(၂)အချက်ဟာ ၄-ချက်ခေတ်က (၂)ချက်မြောက်၊ ၁၀-ချက်ခေတ်က (၃) (၄)ချက်မြောက်၊ ၁၄-ချက်ခေတ်က (၆) (၁၂)ချက်မြောက်နဲ့ အတူတူပဲ ဖြစ်တယ်။
နံပါတ် (၃)အချက်ဟာ ၄-ချက်ခေတ်က (၃)ချက်မြောက်၊ ၁၀-ချက်ခေတ်က (၁) (၉)ချက်မြောက်၊ ၁၄-ချက်ခေတ်က (၇) (၈) (၁၁)ချက်မြောက်နဲ့ အတူတူပဲ ဖြစ်တယ်။
နံပါတ် (၄)အချက်ဟာ ၁၀-ချက်ခေတ်က (၅)ချက်မြောက်၊ ၁၄-ချက်ခေတ်က (၁၀)ချက်မြောက်နဲ့ အတူတူပဲ ဖြစ်တယ်။
နံပါတ် (၅)အချက်ဟာ ၁၄-ချက်ခေတ်က (၂)ချက်မြောက်နဲ့ အတူတူပဲ ဖြစ်တယ်။
နံပါတ် (၆)အချက်ဟာ ၁၀-ချက်တုန်းက (၆) (၇) (၈)ချက်မြောက်၊ ၁၄-ချက်တုန်းက (၁) (၉) (၁၃) (၁၄)ချက်မြောက်နဲ့ အတူတူပဲ ဖြစ်တယ်။

တပ်မတော်မူ (၆)ချက်ကို ဘယ်သူက လက်မခံတာလဲ
တပ်မတော်မူ (၆)ချက်ကို တိုင်းရင်းသားတို့က လက်မခံတာ မဟုတ်ဘူး` တပ်မတော်ကိုယ်တိုင်က လိုက်နာဖို့ သဘောမတူခြင်းဖြစ်တယ်။ သဘောတူညီချက်ဆိုတာ နှစ်ဖက်စလုံး လိုက်နာရမှာ ဖြစ်တယ်။ တိုင်းရင်းသားတို့က နိုင်ငံရေးတွေ့ဆုံဆွေးနွေးနိုင်ရေး မျှော်လင့်ချက်နဲ့ ဒီမူတွေနဲ့ နှစ်ပေါင်း(၂၀)ကျော် လိုက်နာခဲ့တယ်။ ဒါပေမဲ့ မြန်မာ့တပ်မတော်ကဘက်က လိုက်နာခဲ့ခြင်းမရှိဘူး။ ဒါကြောင့် မြန်မာ့တပ်မတော်က စစ်ရေးအရ အင်အားသာခဲ့တယ်။ တိုင်းရင်းသားတို့ဘက်ကတော့ တန်းတူရေးကို မပြောနဲ့ဦး။ နိုင်ငံရေးဆွေးနွေးဖို့ အခုမှ အနံ့ရနိုင်ခဲ့တာပါ။ ဒီတစ်ခါမှာ နိုင်ငံရေးဆွေးနွေးပွဲတွေနဲ့ အချိန်ဆွဲဖို့ အစီအစဉ် ရှိနေမှာပါ။ အပစ်ရပ်နိုင်တာ ကောင်းပါတယ်။ ဒါပေမဲ့ တပ်မတော်မူ (၆)ချက်ကိုတော့ သတိထားရပါ့မယ်။ အပစ်ရပ်သဘောတူညီချက်များကို မသိရမချင်းတော့ စိုးရိမ်မကင်းဖြစ်မှုတွေ ရှိနေမှာပါ။

အတိတ်က သင်ခန်းစာကို ရယူပြီး တပ်မတော်က ချမှတ်တဲ့မူကို တပ်မတော်ကိုယ်တိုင် လိုက်နာဖို့ လိုအပ်တယ်လို့ တိုင်းရင်းသားတို့က ယုံကြည်ကြပါတယ်။ တပ်မတော်က လိုက်နာဖို့ ဝန်လေးနေခဲ့ရင် အခြားအဖွဲ့အစည်းတစ်ခုခုကိုလည်း လိုက်နာစေလို့ မသင့်တော်ပါဘူး။ ဒီလောက်ဆို တပ်မတော်မူ (၆)ချက်နဲ့ တိုင်းရင်းသားတို့အပေါ် တပ်မတော်ရဲ့ သဘောထားအမှန်ကို ပြည်သူတို့ သိရှိနားလည်ကြလောက်ပါပြီ။ အခု ကာချုပ်မင်းအောင်လှိုင်က ပြည်သူ့စစ်နည်းဗျူဟာကိုပါ ထည့်ပြောလာတော့ နေဝင်းရဲ့ ဖြတ်လေးဖြတ်ခေတ်နဲ့ တစ်ပုံစံထဲ ဖြစ်နေတယ်ဆိုတာ သိထားကြရမှာ ဖြစ်တယ်။

မှတ်ချက်-ဒီဆောင်းပါးကို ၂၀၁၄ ခုနှစ်၊ အောက်တိုဘာလမှာ ဖော်ပြခဲ့ပြီဖြစ်တယ်။ အခု အပစ်ရပ်ကြတော့မဲ့အချိန်မှာ မင်းအောင်လှိုင်က တပ်မတော်မူ(၆)ချက်ကို ပြန်ပြောလာလို့ ဒီဆောင်းပါးကို ပြန်တင်ပြခြင်းဖြစ်တယ်။

0 အကြံပြုခြင်း: