Monday, December 29, 2014

ဆီးသီးဗန်းနှင့် ဦးခင်အောင်မြင့်၊ ဦးရဲထွဋ်နှင့် Facebook ပေါ်မှ အမေးအဖြေများ



Eleven Media Group
 Yesterday at 8:50pm ·  ·


(ထင်ရှားကျော်ကြား ၂၀၁၄)

ဆီးသီးဗန်းနှင့် ဦးခင်အောင်မြင့်၊ ဦးရဲထွဋ်နှင့် Facebook ပေါ်မှ အမေးအဖြေများ

(Written By: နေထွန်းနိုင်)

အစိုးရ ဝန်ကြီးဌာနများ၏ ခွင့်ပြုဘတ်ဂျက်အပေါ် လာဘ်စားမှုများအား “ပွဲဈေးတန်း ဆီးသီးဗန်းမှောက်ခြင်း” ဟု တင်စားပြောဆိုခဲ့သော အမျိုးသားလွှတ်တော်ဥက္ကဋ္ဌ ဦးခင်အောင်မြင့်၊ ဦးခင်အောင်မြင့်၏ ပြောကြားချက်ကို ပြန်လည်တုံ့ပြန်ခဲ့သော ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးရဲထွဋ်၊ ဦးရဲထွဋ်၏ ပြန်လည်တုံ့ပြန်ချက်အပေါ် အခြေခံပြီး ဦးရဲထွဋ် Facebook ပေါ်မှ အမေးအဖြေများမှာလည်း ပြည်သူလူထုအကြား ဂယက်ရိုက်ခဲ့သော ကိစ္စရပ်များ ဖြစ်ခဲ့ခြင်းကြောင့် ၂ဝ၁၄ ခုနှစ်အတွင်း ထင်ရှားသော အဖြစ်အပျက် တစ်ခုအဖြစ် Weekly Eleven News ဂျာနယ်က ဖော်ပြလိုက်သည်။

စက်တင်ဘာ ၁၆ ရက်က ပြုလုပ်သည့် အမျိုးသားလွှတ်တော် အစည်းအဝေး၌ ဦးခင်အောင်မြင့်က အစိုးရဝန်ကြီးဌာနများ၏ ဘတ်ဂျက်ငွေ လာဘ်စားမှုများကို ထုတ်ဖော်ပြောကြားခဲ့ခြင်း ဖြစ်သည်။

“ပွဲဈေးတန်းမှာ ဆီးသီးဗန်း မှောက်ကျသလိုပဲ။ မှောက်လည်းကျရော ဟိုလူက တစ်ဆုပ်နှိုက်စား၊ ဒီလူက တစ်ဆုပ်နှိုက်စား ဆီးသီးက တစ်ဝက်လောက်ပဲ ကျန်တော့တယ်။ ဘတ်ဂျက်က အဲဒီလို ဖြစ်နေတယ်” ဟု ဦးခင်အောင်မြင့်က ဆိုသည်။

အဆိုပါ ပြောကြားချက်သည် အစိုးရသစ်လက်ထက် စီမံကိန်းများ ဆောင်ရွက်ရန် ဝန်ကြီးဌာန အသီးသီးက တောင်းခံလာသည့် ဘတ်ဂျက်များကို လွှတ်တော်က ခွင့်ပြု ပေးနေသည့်တိုင် လာဘ်စားမှုများကြောင့် ဘတ်ဂျက်၏ တစ်ဝက်ကိုသာ အမှန်တကယ် အသုံးပြုနေရခြင်းအား ရည်ညွှန်းခဲ့ခြင်းဖြစ်သည်။

ဦးခင်အောင်မြင့်၏ ပြောကြားချက်ကို အစိုးရဝန်ကြီးဌာနများကိုယ်စား ဦးရဲထွဋ်က စက်တင်ဘာ ၁၉ ရက်၌ ဒီမိုကရေစီတူဒေး သတင်းစာမှ တုံ့ပြန်ပြောကြားခဲ့သည်။

“တိုင်းပြည်ရဲ့ ကြီးလေးတဲ့တာဝန်ကို ယူထားရတဲ့ အမျိုးသားလွှတ်တော်ဥက္ကဋ္ဌက အစိုးရဝန်ကြီးဌာနတွေရဲ့ အားနည်းချက်ကို ပြောတာ လက်ခံပါတယ်။ သို့သော် မိမိရဲ့တာဝန် လေးနက်မှုကြောင့် သူပြောတဲ့ စကားတွေဟာ ပိုပြီး တိတိကျကျဖြစ်ဖို့ ကောင်းတယ်။ ဘယ်ဝန်ကြီးဌာနလဲ၊ ဘာဖြစ်နေလဲ၊ တိကျစွာပြောရင်တော့ ပိုကောင်းပါတယ်” ဟု ဦးရဲထွဋ်က ဆိုခဲ့သည်။

ဦးရဲထွဋ်က ယင်းကဲ့သို့ တုံ့ပြန်ပြီးချိန်တွင် The Daily Eleven သတင်းစာ၏ သတင်းထောက်ချုပ် ကိုမာန်သူရှိန်က The Daily Eleven သတင်းစာတွင် “ဦးရဲထွဋ်တုံ့ပြန်၍ ဦးခင်အောင်မြင့်ကိုယ်စား ကျွန်တော်ပြောချင်သည်” ဆောင်းပါးကို ရေးသားခဲ့သည်။

ကိုမာန်သူရှိန်၏ ဆောင်းပါးတွင် ဦးခင်အောင်မြင့်၏ ဆိုလိုရင်း၊ ဦးရဲထွဋ် တုံ့ပြန်ချက်အပေါ် မေးခွန်းထုတ်မှုများကို ထည့်သွင်းခဲ့သည်။

၂ဝ၁၂ ခုနှစ်မှ ၂ဝ၁၄ ခုနှစ်အတွင်း ကျန်းမာရေးနှင့် ပညာရေး ကဏ္ဍများအတွက် ချထားပေးသည့် ဘတ်ဂျက်ငွေမှာ ကျပ်ဘီလျံပေါင်း ၄၄ဝဝ နီးပါး ရှိခဲ့သော်လည်း အဆိုပါ ကဏ္ဍနှစ်ရပ်တွင် ပြည်သူလူထုအတွက် ပြန်အသုံးပြုမှု၌ အဆောက်အအုံများ အရည်အသွေးမမီ ဖြစ်နေခြင်း၊ တင်ပြငွေနှင့် အမှန်တကယ် အသုံးပြုစရိတ် ကွာဟမှုများ ရှိနေခြင်းတို့ကို ကိုမာန်သူရှိန်က ပြောဆိုခဲ့ပြီး ဦးခင်အောင်မြင့်ကလည်း ထိုအချက်များကို သက်သေနှင့်တစ်ကွ လွှတ်တော်တွင် ပြောခဲ့ပြီးဖြစ်သည်ဟု ရေးသားခဲ့သည်။

ယခင်အစိုးရနှင့် ယခုအစိုးရလက်ထက် တင်ဒါခေါ်ယူမှု ကွာခြားပြီး ယခုအစိုးရ လက်ထက်တွင် ပိုမိုပွင့်လင်းမြင်သာကြောင်း ဦးရဲထွဋ်၏ ပြောစကားကို ကိုမာန်သူရှိန်က ထောက်ပြရာ၌ 7Day ဂျာနယ်တွင် ဖော်ပြခဲ့သော “ထူးမခြားနား လေလံပွဲများ ဆောင်းပါး” ကို သက်သေပြ၍ ရေးသားခဲ့သည်။

“တင်ဒါနဲ့ ပတ်သက်ရင် တင်ဒါမှာ တာဝန်ယူရတဲ့ အစိုးရအရာရှိနဲ့ အဖွဲ့အဆင့်ဆင့်မှာ လာဘ်ပေး၊ လာဘ်ယူမှု လုပ်နေတာ ထင်ရှားတယ်။ ဒါကို သိချင်ရင် သူတို့ ပိုင်ဆိုင်မှုတွေနဲ့ သူတို့ရဲ့ မူရင်းလစာကို စစ်လိုက်ရုံပဲ။ ဒီလို တိတ်တိတ်ပုန်း ကျိတ်လုပ်တဲ့ ကိစ္စမျိုးတွေကို အတိအကျ ပြောပါ။ တိတိကျကျပြောပါ ဆိုတာကတော့ သူခိုးလက်ခံလည်းပြ သူခိုးလည်းပြဆိုပြီး ခိုင်းသလို ဖြစ်နေပါတယ်” ဟု ကိုမာန်သူရှိန်က ရေးသားခဲ့သည်။

ထို့နောက် အစိုးရ ဝန်ကြီးဌာနများ အဂတိလိုက်စားမှုများ၊ လာဘ်ပေးလာဘ်ယူမှုများ ရှိနေခြင်းကို ပေါ်လွင်စေရန်အတွက် အစိုးရ တာဝန်ရှိသူများ ရရှိနေသည့် လစာနှင့် ပိုင်ဆိုင်မှုများကို တွက်ချက်ပြခဲ့သည်။

“နိုင်ငံတော်သမ္မတ လစာက တစ်လ ကျပ် ၁၅ သိန်းနဲ့ ၃၆ လ သိန်း ၅၄ဝ၊ အခု ပြင်ဆင်လိုက်တဲ့ တစ်လ သိန်း ၅ဝ နဲ့ ဩဂုတ်လကုန်ထိ ငါးလစာ သိန်း ၂၅ဝ။ သမ္မတ သက်တမ်းတစ်လျှောက် ၄၁ လစာအတွက် စုစုပေါင်း သိန်း ၇၉ဝ ရပါမယ်။ အစိုးရသစ်လက်ထက် ၄၁ လလုံးလုံး တောက်လျှောက် ပြည်ထောင်စုဝန်ကြီး ဖြစ်တဲ့သူက ကျပ် ၃၆၆ သိန်း ရပါမယ်။ ဒုဝန်ကြီးက ၂၆၂ သိန်းရပါမယ်။ ညွှန်ချုပ်အဆင့်က တစ်ဦးကို သုံးနှစ်ခွဲကျော်အတွင်းမှာ လစာကျပ်သိန်း ၈ဝ နီးပါးပဲ ရပါမယ်။ အခုအစိုးရသစ် သက်တမ်း ၄၁ လအတွင်းမှာ ဝန်ကြီးဖြစ်တဲ့သူက ဘာမှမစားသောက်၊ မသုံးဘဲ ရသမျှ စုထားရင်တောင် ကျပ် ၃၆၆ သိန်းပဲ ရမယ်။ တိုက်ခန်းကျဉ်းကျဉ်း ဝယ်ဖို့တောင် နေရာကောင်းမှာဆို မရဘူး။ ဒုဝန်ကြီးလည်း ထိုနည်းလည်းကောင်းပဲ။ ညွှန်ချုပ်အဆင့် တိုက်ခန်းတောင် မဝယ်နိုင်ဘူး” ဟု ကိုမာန်သူရှိန်က ရေးသားသည်။

သို့သော် လာဘ်ပေးလာဘ်ယူလုပ်နိုင်သည့် စီးပွားရေးအရ ဆက်စပ်သည့်ဌာနများရှိ ညွှန်ချုပ်အဆင့် ဝန်ထမ်း အများအပြားမှာ တိုက်ခန်းများစွာ၊ မြေကွက်များနှင့် ကားများစွာ ဝယ်စီးနိုင်သည့် အခြေအနေတွင် ရှိနေသည်ဟု ဆက်လက်ထောက်ပြခဲ့သည်။

“ကျွန်တော်တို့ အယ်ဒီတာတွေထဲမှာ တစ်လ ကျပ်ငါးသိန်းကနေ ကျပ်ခုနစ်သိန်းကြား ရကြပါတယ်။ ဒီသုံးနှစ်ခွဲ ကာလအတွင်းမှာ အယ်ဒီတာတွေက တစ်ဦးလစာငွေ ကျပ်သိန်း ၂ဝဝ ကနေ အမြင့်ဆုံး ကျပ်သိန်း ၂၈ဝ အထိ ရှိပါတယ်။ ညွှန်ချုပ်တစ်ယောက် လစာထက်ပိုပါတယ်။ ဒါပေမဲ့ အယ်ဒီတာတွေဟာ အိမ်ငှားခ၊ စားစရိတ်၊ ဆေးကုစရိတ်၊ သွားစရိတ်၊ လာစရိတ်တွေနဲ့ အိမ်ပိုင်ဝယ်နိုင်ဖို့ကတော့ လုံးဝကို မဖြစ်နိုင်သေးတဲ့ အနေအထားပါ။ ဒါပေမဲ့ ကျွန်တော်တို့ အယ်ဒီတာတွေထက် တရားဝင်လစာ နည်းပေမယ့် ညွှန်ချုပ်အဆင့် အရာရှိတွေရဲ့ ပိုင်ဆိုင်မှုတွေကို ကြည့်လိုက်ပါလား” ဟု ကိုမာန်သူရှိန်က ရေးသားခဲ့သည်။

ထိုဆောင်းပါး၌ပင် ဦးရဲထွဋ်အနေဖြင့် ဦးခင်အောင်မြင့်အား တိတိကျကျ ထောက်ပြရန် မေးခွန်းထုတ်ခြင်းထက် စံနမူနာပြ အနေဖြင့် ဦးရဲထွဋ်ကိုယ်တိုင် ပိုင်ဆိုင်မှုနှင့် လစာကို နှိုင်းယှဉ်ပြစေလိုကြောင်း ပြောကြားခဲ့ပါသည်။

ကိုမာန်သူရှိန်၏ ဆောင်းပါးအပေါ် တုံ့ပြန်မှုအား စက်တင်ဘာ ၂၂ ရက်တွင် ပြည်ထောင်စုလွှတ်တော်ရှိ သတင်းထောက်များကို ဦးရဲထွဋ်က ပြောကြားခဲ့သည်။

“ကျွန်တော်တို့ရဲ့ ဥပဒေအရ ကျွန်တော့်ရဲ့ ပိုင်ဆိုင်မှုကို သိချင်ရင် ဥပဒေကြောင်းအရ တောင်းဆိုမှပဲ ရမယ်။ ဆိုပါတော့ ခင်ဗျားတို့ အဂတိလိုက်စားမှု တိုက်ဖျက်ရေး ကော်မရှင်ကို တိုင်ချင်တိုင်။ ဒါမှမဟုတ် ကျွန်တော် အဂတိလိုက်စားတယ် ထင်ရင် Eleven အနေနဲ့ ဖွင့်ချပြီးရေး။ အဲဒီအခါကျရင် ကျွန်တော် ဥပဒေဘက်ကနေ ရင်ဆိုင်ဖို့ အသင့်ပဲ” ဟု ဦးရဲထွဋ်က ဆိုသည်။

ထို့ပြင် “.... အခုအချိန်ထိ ဝန်ကြီးအိမ်တောင် ပြောင်းမနေသေးဘူး။ ဝန်ကြီးအိမ်လည်း ကျွန်တော် ပြောင်းနေမှာ မဟုတ်ဘူး။ ညွှန်ချုပ်တုန်းက ဆောက်ထားတဲ့အိမ်လေး ရှိတယ်။ အိမ်သေးသေးလေးတစ်လုံး ရှိတယ်။ အဲဒီကိုပဲ ကျွန်တော်ပြောင်းပြီးနေမှာ။ အဲဒါလည်း ကျွန်တော့်ပိုင်ဆိုင်မှု တစ်ခုပေါ့ဗျာ” ဟု ဆက်လက်ပြောကြားသည်။

ဦးရဲထွဋ်က ၎င်း၏ ဖြေကြားမှုများကို Facebook ပေါ်တွင် ဆက်လက်ဖော်ပြခဲ့ပြီးနောက်ပိုင်း Facebook သုံးစွဲသူများကြား၌ သာမက အများပြည်သူကြား၌ပါ ဦးရဲထွဋ်၏ ပိုင်ဆိုင်မှုနှင့် ပတ်သက်ပြီး မေးခွန်းထုတ်မှုများ ဖြစ်လာခဲ့သည်။

မေးခွန်းထုတ်မှုများတွင် Aung Myint ဆိုသော အမည်ဖြင့် လူမှုကွန်ရက် Facebook သုံးစွဲသူ တစ်ဦးက ဦးရဲထွဋ်၏ ဇနီးသည် ကင်ဆာဖြစ်ချိန်တွင် ကုန်ကျခဲ့သောငွေ ကျပ်သိန်း ၂ဝဝ ကျော် အသုံးပြုခဲ့ရခြင်းနှင့် ပတ်သက်ပြီး ပြောဆိုခဲ့ရာ ဦးရဲထွဋ်က “ကို Aung Myint ခင်ဗျားပြောသလိုပဲ။ ကျွန်တော့်ဇနီးကို ဆေးကုတာ ပြည်တွင်းရော၊ ပြည်ပမှာပါ ပေါင်းလိုက်ရင် သိန်းနှစ်ရာနီးပါး ကုန်ပါတယ်။ ဘယ်က ပိုက်ဆံရလဲဆိုတော့ ကျွန်တော့်မှာ ငွေမရှိတဲ့အတွက် အကျိုးအကြောင်း ဖော်ပြပြီး လျှောက်ထားတဲ့အတွက် ဆူဇူးကီး R+ တစ်စီး ဝယ်ခွင့်ရတယ်။ အဲဒီအချိန်က ကားဈေးတွေကောင်းတော့ အဲဒါကိုရောင်းပြီး ဆေးကုပါတယ်။ စက်မှုဝန်ကြီးဌာနမှာ မှတ်တမ်းရှိပါတယ်။ သွားကြည့်ပါ။ အလဲဗင်းကို မေးကြည့်။ အဲဒီအချိန်က သူတို့ဂျာနယ်မှာ ကျွန်တော်ပင်တိုင် ရေးနေတဲ့အတွက် သူတို့တောင် ကူညီဖူးပါတယ်။ ဘာမှလျှို့ဝှက်စရာအကြောင်း မရှိပါဘူး...” ဟု ပြန်ဖြေခဲ့သည်။

ထိုအချိန်မှာပင် နရဲစွမ်အမည်ဖြင့် Facebook သုံးစွဲသူ တစ်ဦးကလည်း ဦးရဲထွဋ်တွင် တိုက်ခန်းသုံးခန်း ပိုင်ဆိုင်ထားကြောင်း၊ ထိုတိုက်ခန်းများမှာ အမှတ် ၁၆၇၊ ခြောက်လွှာ၊ လမ်း ၅ဝ ရှိ ကွန်ဒိုခန်းကို သိန်း ၁၆ဝဝ ဖြင့် ဝယ်ယူထားခြင်း၊ ၄၈ လမ်းတွင် ပေ ၄ဝ x ၆ဝ တစ်ခန်းနှင့်ပေ ၄ဝ ပတ်လည် တစ်ခန်းကို ၁ စတုရန်းပေလျှင် ငွေကျပ် ၁၅ဝဝဝဝ၊ ကြိုတင်အရစ်ကျ စနစ်ဖြင့် ဝယ်ယူထားခြင်းတို့ဖြစ်ကြောင်း Facebook တွင် ထုတ်ဖော်ရေးသားခဲ့သည်။ ထို့အတူ (MJN) အဖွဲ့ဝင်သတင်းထောက် ကိုဖြိုးဝေဝင်း (Renai Ssance Facebook Account ပိုင်ရှင်) က ဦးရဲထွဋ် ပိုင်ဆိုင်ထားသည်ဟု ယူဆရသော တိုက်ခန်းနှစ်ခန်း ကိစ္စနှင့် ပတ်သက်ပြီး လူကိုယ်တိုင်အားဖြင့် လည်းကောင်း၊ လူမှုကွန်ရက် Facebook တွင် ပြန်လှန်မေးခွန်းထုတ်၍လည်း မေးမြန်းမှုများ ပြုလုပ်ခဲ့သည်။ ၈၈ မျိုးဆက် ကျောင်းသားဟောင်း ဦးဇော်ဝင်းနှင့် အခြားသူများကလည်း နရဲစွမ်၏ ဖော်ပြချက်ကို ဦးရဲထွဋ် Facebook တွင် ပြန်လည်ရေးသားပြီး မေးခွန်းထုတ်ခဲ့ကြသည်။

ထိုနောက်ပိုင်းတွင် ဦးရဲထွဋ် Facebook ၌ သတင်းထောက် ကိုဖြိုးဝေဝင်းနှင့် ဦးရဲထွဋ်၊ အခြားသူများနှင့် ဦးရဲထွဋ်တို့အကြား အပြန်အလှန် အမေးအဖြေများ ဆက်ဖြစ်ခဲ့ပြီး သတင်းထောက် ကိုဖြိုးဝေဝင်းက မေးခွန်းများကို Facebook ပရိသတ်တစ်ဦး၊ သတင်းထောက်တစ်ဦး အနေဖြင့် ပြည်သူ့ဘဏ္ဍာစား ဆင်းရဲသော ဝန်ကြီးတစ်ဦးက တိုက်ခန်းများ ဝယ်ယူထားသဖြင့် မေးမြန်းခြင်းဟု ပြောခဲ့သည်။

ပိုင်ဆိုင်မှုအတွက် မေးခွန်းများနှင့် ပတ်သက်ပြီး Facebook ပေါ်၌ သတင်းထောက် ကိုဖြိုးဝေဝင်းအား နောက်ဆုံးဖြေကြားခဲ့သော ဦးရဲထွဋ်၏ ဖြေကြားချက်တွင် “... သတင်းထောက်တစ်ယောက်အနေနဲ့ ခင်ဗျားသိချင်တယ်ဆိုရင် ခင်ဗျား စဉ်းစားနိုင်ဖို့ တစ်ခုတော့ ပြောပါ့မယ်။ လွန်ခဲ့တဲ့ ၁ဝ နှစ်လောက်က ခင်ဗျား မြို့ကြီးတစ်မြို့မှာ မြေတစ်ကွက် ရင်းနှီးမြှုပ်နှံထားတယ် ဆိုကြပါစို့။ အခု ပြန်ရောင်းရင် ဘယ်လောက်ရှိမယ်ဆိုတာ ခန့်မှန်းကြည့်ပေါ့ဗျာ။ လစာ တစ်ခုတည်းနဲ့ ခင်ဗျားတွက်နေရင် မလုံလောက်ပါဘူး။ ကျွန်တော့်ကို စာမျက်နှာပေါ်က တရားဝင် ရေးလာရင် ရင်ဆိုင်ဖို့ လိုအပ်တဲ့ အချက်များ ဖြစ်တဲ့အတွက် အွန်လိုင်းမှာ အသေးစိတ် ကြိုမပြောထားတာကိုတော့ နားလည်ပေးပါ။ နောက်ထပ် ကျွန်တော် ဆွေးနွေးရန် မရှိတော့ပါဘူး။ ကျေးဇူးတင်ပါတယ်” ဟု ပြောကြားခဲ့ပြီး မေးခွန်းထုတ်မှုများ၌ ပါဝင်သော တိုက်ခန်းနှစ်ခန်း ပိုင်ဆိုင်ထားသည့် ကိစ္စကိုမူ ယတိပြတ် ငြင်းချက်ထုတ်ခဲ့ခြင်း မရှိပေ။

ထိုသို့ ပြောကြားပြီးနောက်ပိုင်းတွင် ဇနီးသည်ကို ဆေးကုရာ၌ ငွေမရှိ၍ ဆူဇူးကီး R+ တစ်စီး လျှောက်ထားပြီး ထိုကားကို ပြန်လည်ရောင်းချခြင်းမှ ရသောငွေဖြင့် အသုံးပြုခဲ့ကြောင်း၊ လွတ်တော်တွင် ပြောကြားစဉ်က အိမ်သေးသေးလေးတစ်လုံး ပိုင်ဆိုင်ထားကြောင်း ပြောဆိုမှုများ ရှိခဲ့သော်လည်း ဦးရဲထွဋ်တွင် တိုက်ခန်းနှစ်ခန်း ပိုင်ဆိုင်ထားကြောင်း အခိုင်အမာ ပြောဆိုမှုများ ရှိလာသည်။

သို့သော် ဦးရဲထွဋ်သည် အခြားသော ပြည်ထောင်စုဝန်ကြီးများနှင့် နှိုင်းယှဉ်ပါက ၎င်း၏ ပိုင်ဆိုင်မှုမှာ အဆမတန် နည်းပါးသူ တစ်ဦး ဖြစ်ပါသည်။ ထိုကဲ့သို့ ပိုင်ဆိုင်မှု အလွန်နည်းပါးသည့် ပြည်ထောင်စုဝန်ကြီး တစ်ဦးပင်လျှင် ပိုင်ဆိုင်မှုနှင့် ပတ်သက်ပြီး Facebook နှင့် ပြည်သူများအကြားတွင် ထောက်ပြမှုများ၊ အမေးအဖြေများနှင့် ငြင်းခုံမှုများစွာ ဖြစ်ခဲ့သည်။

ထိုအချက်ကို ကြည့်ခြင်းအားဖြင့် ဦးရဲထွဋ်ထက် အဆပေါင်းရာချီ ချမ်းသာနေသော အစိုးရအဖွဲ့ဝင်များ၏ ပိုင်ဆိုင်မှုများနှင့် ပတ်သက်၍ ယခုထက် ပိုမိုပြင်းထန်သော ဝေဖန်မှုများ ဖြစ်ပေါ်လာနိုင်သည့် အခြေအနေတွင် ရှိနေသည်။

သေချာသည့် အချက်တစ်ခု အနေဖြင့် ၂ဝ၁၄ ခုနှစ်အတွင်း ပေါ်ပေါက်ခဲ့သော ဆီးသီးဗန်းကိစ္စ နည်းတူ သမ္မတ၊ ဒုတိယသမ္မတများ၊ အစိုးရအဖွဲ့ဝင် ပြည်ထောင်စုဝန်ကြီးများ၊ တိုင်းဒေသကြီး အစိုးရအဖွဲ့ဝင် ဝန်ကြီးများ၊ ၎င်းတို့၏ သားသမီး၊ မိသားစုဝင်များ၏ ပိုင်ဆိုင်မှုများ၊ ကြွယ်ဝချမ်းသာမှုများနှင့် ပတ်သက်သော ထောက်ပြမှုများမှာ ၂ဝ၁၅ ခုနှစ်အတွင်း ပြည်သူများအကြားတွင် သာမက မီဒီယာများတွင်ပါ ဝေဖန်ထောက်ပြ မေးခွန်းထုတ်မှုများ ပိုမိုပြင်းထန်စွာ ဖြစ်ပေါ်လာနိုင်သည်။

(ပုံစာ - နရဲစွမ်၏ ရေးသားမှုနှင့် ဦးရဲထွဋ်၏ အပြန်အလှန် ပြောဆိုမှုများ)

0 အကြံပြုခြင်း: