Tuesday, July 22, 2014

“ အကြမ်းဖက်မှု လျော့နည်း စေချင်တာလား၊ Facebook ကို ထိန်းချုပ်ခြင်တာလား ”

r
စည်သူအောင်မြင့်
မဇ္ဈိမ သတင်းစာ၊ ၂၂-၇-၁၄။ စာ- ၉။

ပြီးခဲ့တဲ့ ဇူလိုင် ၂၀ ရက်နေ့က ရန်ကုန် MICT Park မှာ Community Forum on Responsible Social Media in Myanmar လို့ နာမည်ပေးထားတဲ့ ဆွေးနွေးပွဲ တစ်ခု ကျင်းပခဲ့ပါတယ်။ ထူးခြားချက်ကတော့ ပွဲကို သမ္မတ ရုံးဝန်ကြီးဌာနက စီစဉ်ခဲ့တာဖြစ်ပြီး မြန်မာနိုင်ငံထဲက အိုင်တီ နည်းပညာဆိုင်ရာ ကျွမ်းကျင်သူတွေ အပြင် ဖေ့ဘွတ်ခ်နဲ့ ဂူဂဲလ်က တာဝန်ရှိသူတွေပါ ပါဝင်ကြတဲ့ ပွဲ ဖြစ်လို့ပါပဲ။ ဆွေးနွေးပွဲ ခေါင်းစဉ်ကို တာဝန်ယူမှု၊ တာဝန်ခံမှု ရှိတဲ့ လူမှုကွန်ယက် မီဒီယာလို့ နာမည်တပ်နိုင်မယ် ထင်ပါတယ်။ ဒီ ဆွေးနွေးပွဲ ဘာကြောင့် ကျင်းပဖြစ်ပါသလဲ၊ သမ္မတ ရုံးရဲ့ ရွယ်ရည်ချက်ဟာ ဘာဖြစ်နိုင်မလဲ၊ ဆိုရှယ်မီဒီယာတွေနဲ့ ပါတ်သက်ရင် ဘယ်လို သဘောထားသင့်သလဲ ဆိုတာ ဒီကနေ့ ဆွေးနွေးတင်ပြသွားပါ့မယ်။
ပထမ တစ်ချက်ကတော့ ဒီ ဆွေးနွေးပွဲ ဖြစ်ပေါ်လာရတဲ့ အကြောင်းရင်းပါ။ မန္တလေးမှာ ဘာသာရေး လူမျိုးရေးဆန်တဲ့ အကြမ်းဖက်မှုကြီး ဖြစ်ပွားလာတော့ ဒီ အကြမ်းဖက်မှု ဖြစ်ပေါ်လာအောင် ဖေ့ဘွတ်ခ် လူမှုကွန်ယက် စာမျက်နှာတွေကနေ ဖြန့်ချီခဲ့တယ်လို့ သမ္မတ ရုံးက ယူဆ တယ်လို့ ဆိုပါတယ်။ ဒါကြောင့် ဖေ့ဘွတ်ခ် ကနေ အမုန်းတရားဖြန့်တာ၊ အကြမ်းဖက်ဖို့ လှုံ့ဆော်မှု လုပ်တာတွေကို ထိန်းချုပ်ဖို့ အမေရိကန်အခြေစိုက် ဖေ့ဘွတ်ခ် ကုမ္ပဏီနဲ့ ပူးပေါင်းဆောင်ရွက်ခဲ့တယ်လို့ သမ္မတရုံး တာဝန်ရှိသူ မှူးဇော်က သတင်းထုတ်ပြန်ခဲ့ပါတယ်။ မှတ်မှတ်ရရ အဲဒီ ကာလ ဖေ့ဘွတ်ခ် အသုံးပြုတာကို ခေတ္တရပ်ဆိုင်း လိုက်တာမျိုးတောင် ရှိခဲ့ပါတယ်။
ဒီနေရာမှာ မေးစရာ မေးခွန်း စပြီး ပေါ်လာတာက သမ္မတရုံး၊ ဒါမှမဟုတ် သမ္မတ နဲ့ အစိုးရအဖွဲ့ဟာ အကြမ်းဖက်မှုတွေကို ဖြစ်ပွားစေတဲ့ အမုန်းတရား ဖြန့်ဖြူးတာ၊ အကြမ်းဖက်ဖို့ လှုံ့ဆော်တာတွေကို တကယ်ပဲ အာရုံစိုက်သလား ဆိုတာပါ။ သမ္မတ မိန့်ခွန်းမှာ အကြမ်းဖက်မှုကို ဖြစ်စေတဲ့ အမုန်းတရား ဖြန့်ဖြူးမှုတွေကို အရေးယူမယ်၊ ထိထိရောက်ရောက် အရေးယူမယ်၊ ပြင်းပြင်းထန်ထန် အရေးယူမယ် ခဏခဏပြောပေမယ့် ဖန်တရာတေနေတဲ့ ဆီသည်မ လက်သုတ်ပုဝါလိုတောင် ဖြစ်နေပါပြီ။ ဘယ်သူမှလည်း အယုံအကြည် မရှိတော့ပါဘူး။ ရှက်စရာ အလွန်ကောင်းတဲ့ မိန့်ခွန်းတွေလို့တောင် ပြောရင် ရနိုင်ပါတယ်။
သမ္မတရုံးက ပြောသလိုဆို အမုန်းတရားတွေ ဖြန့်ချီနေတာ၊ အကြမ်းဖက်မှုတွေ လုပ်နေတာတွေဟာ ဖေ့ဘွတ်ခ် တစ်ခုထဲ ရှိသလား ဆိုပြီး မေးရမလိုတောင် ဖြစ်နေပါတယ်။ ကောင်းပါပြီ ဖေ့ဘွတ်ခ်ကို မြန်မာနိုင်ငံထဲမှာ လုံးဝ ပိတ်ပင်လိုက်ရင် အကြမ်းဖက်မှုတွေ လုံးဝ ထပ်မဖြစ်တော့ပါဘူး၊ မတူကွဲပြားတဲ့ လူမျိုးတွေ၊ မတူကွဲပြားတဲ့ ဘာသာဝင်တွေ အေးအတူ ပူအမျှ နေကြပါ့မလားဆိုပြီး မှူးဇော်နဲ့ သမ္မတရုံးက ဥာဏ်ကြီးရှင်တွေကို မေးလိုပါတယ်။ ဖြေနိုင်ရင်တော့ ဖြေကြပါ။ လက်ရှိ အခြေအနေ အင်တာနက် ဆိုတာ ဘာမှန်းမသိတဲ့၊ လျှပ်စစ်မီးတောင် ကောင်းကောင်း မရတဲ့ ဒေသတွေမှာတောင် အမုန်းတရားကနေ တဆင့် ဘာသာရေး လူမျိုးရေးဆန်တဲ့ အကြမ်းဖက်မှုမျိုးတွေ အချိန်မရွေးဖြစ်နိုင်ခြေ ရှိတယ်ဆိုတာ လူကြီးမင်းတို့ သိကြ၊ လက်ခံကြ၊ နားလည်ကြမယ် ထင်ပါတယ်။
အကြောင်းကတော့ အမုန်းတရား ဖြန့်ဖြူးသူတွေဟာ လူစုလူဝေးမှာလည်း ထင်ထင်ရှားရှား တရားဟောလို့ ရနေပါတယ်။ အဲဒီ ပြောဟောထားတဲ့ အမုန်းတရားတွေကို စာရွက်တွေပေါ်မှာ ပုံနှိပ်ပြီးဖြစ်စေ၊ ဗီဒီယိုရိုက်ပြီး ဓာတ်ပြားနဲ့ ဖြစ်စေ၊ ဖြန့်လို့ရနေပါတယ်။ ဖြန့်နေကြပါတယ်။ ဗီနိုင်းပိုစတာတွေ ချိတ်ပြီး ဖြန့်ဖြူးလို့ရနေပါတယ်။ ပုံမှန် ပုံနှိပ် မီဒီယာ လမ်းကြောင်းကနေလည်း ဖြန့်နေကြပါတယ်။ အဲဒါတွေကိုပဲ အင်တာနက်ပေါ်တင်ပြီး ယူကျု့ကနေ ဖြစ်စေ၊ ၀က်ဘ်ဆိုက်ထဲကနေ ဖြစ်စေ၊ ဖေ့ဘွတ်ခ် ကနေ ဖြစ်စေ ဖြန့်လို့ရနေပါတယ်။ အခုလောလောဆယ် ထူးထူးဆန်းဆန်း ဖြစ်နေတာက သမ္မတရုံးနဲ့ အစိုးရဟာ အဲဒီ အမုန်းတရား ဖြန့်ဖြူးနေတာတွေကို ရပ်တန့်သွားအောင် တစ်လုံးတစ်ပါဒ တောင်မှ မဟပဲ ဖေ့ဘွတ်ခ် ကိစ္စ ပြောလာတာမျိုးပါ။ အခုလို လူကြားကောင်းအောင်၊ လူမြင်ကောင်းအောင် ဆီမီနာတွေ ကွန်ဖရင့်တွေ လုပ်ပြလာတာမျိုးပါ။
အခုကိုပဲ ဖေ့ဘွတ်ခ် အကောင့်န်တွေကို မိုဘိုင်းဖုန်း နံပါတ်တွေနဲ့ ချိတ်ဆက်ထားဖို့ စ ပြီး စကား စ လာပါပြီ။ ဒါဆိုရင် အဲဒီ မိုဘိုင်းဖုန်းနံပါတ်တွေကို ဘယ်သူက အားလုံး သိခွင့်ရှိမလဲ၊ ဘယ်အကြောင်းအရာမျိုးတင်ရင် ဘယ်သူက တားမြစ်ခွင့်၊ ပိတ်ပင်ခွင့် ရှိမလဲ မေးစရာ မေးခွန်း ရှိလာပါပြီ။ အားလုံးကို အစိုးရကပဲသိ၊ အစိုးရကပဲ ထိန်းချုပ်မယ် ဆိုရင်တော့ လက်ရှိ သမ္မတရုံးရဲ့ လုပ်နေကိုင်နေတဲ့ ရည်ရွယ်ချက်ဟာ ဖေ့ဘွတ်ခ်ကို ထိန်းချုပ်ဖို့ လုပ်နေတယ်ဆိုတာ အလွန်ထင်ရှားပါတယ်။ ဘာ အမုန်းတရားဖြန့်ဖြူးနေတာကိုမှ၊ ဘယ်လို အကြမ်းဖက်ဖို့ လှုံ့ဆော်နေသူတွေကိုမှ အရေးယူ ကိုင်တွယ်ဖို့ မဖြစ်နိုင်ပါဘူး။
တကယ်တော့ တိုင်းပြည်ကို နိုင်ငံတကာ အလည်မှာ အရှက်ရစရာဖြစ်အောင်၊ နိုင်ငံ့ပုံရိပ် ကျဆင်းစေအောင် လုပ်နေတာဟာ ဖေ့ဘွတ်ခ် မဟုတ်ပါဘူး။ အမုန်းတရား ဖြန့်ဖြူးမှု၊ အကြမ်းဖက်ဖို့ လှုံ့ဆော်မှုတွေသာ ဖြစ်ပါတယ်။ အဲဒီ လူတွေဟာ အခြားသော ပုံနှိပ်စာရွက်၊ ဓာတ်ပြား၊ ဗွီနိုင်း၊ စာအုပ် စာစောင်၊ ၀က်ဘ်ဆိုက်တွေနည်းတူ ဖေ့ဘွတ်ခ်ကို သုံးကြတာပါ။ လက်ရှိ သမ္မတရုံးရဲ့ လုပ်ဆောင်ချက်ဟာ အရှေ့အလယ်ပိုင်းမှာ ကားပေါ်ဗုံးတင်ပြီး လူတွေသေအောင် ဗုံးခွဲနေတဲ့ ကိစ္စ၊ ဗုံးတင်သူ ဗုံးခွဲသူတွေအကြောင်း မဆွေးနွေးပွဲ ကားတွေကို ဘယ်လို ထိန်းချုပ်ရင် ကောင်းမလဲ စည်းရုံးနေတာနဲ့ တူပါတယ်။ ကားပေါ် ဗုံးတင်ခွဲရင် ငါတို့ကလွဲပြီး ဘယ်သူမှ ကားမစီးစေနဲ့ ပိတ်၊ ဆိုင်ကယ်ပေါ် ဗုံးတင်ခွဲရင် ငါတို့လူတွေကလွဲပြီး ဆိုင်ကယ်တွေ မစီးစေနဲ့ ပိတ် ဆိုတဲ့ အတွေးအခေါ်မျိုးပါ။
မြန်မာနိုင်ငံဟာ ရာစုနှစ် တစ်ဝက်ကျော်ကျော် စစ်အာဏာရှင် စနစ် လက်အောက်ရောက်ခဲ့ပြီး တိုင်းပြည် အကြီးအကျယ် နစ်နာခဲ့ရပြီးပါပြီ။ အဲဒီ စနစ်ဆိုးရဲ့ ဒါဏ်ကိုလည်း နေ့တိုင်း ညတိုင်း ဆက်ပြီး ခံစားနေရဆဲပါ။ သတင်းကောင်းကောင်း မရေးတတ်လို့ ရေးချင်သလို ရေးလိုက်တဲ့ သတင်းထောက်တွေ၊ ဖေ့ဘွတ်ခ် ကောင်းကောင်း မသုံးတတ်ပဲ ရေးချင်တာ ရေးတင်လိုက်မိတဲ့ ပြည်သူတွေ အမြောက်အများ ရှိတာ အမှန်ပါ။ တစ်ယောက်ချင်း လုပ်တာ ကိုင်တာတွေအတွက် တစ်ယောက်ချင်းစီက တာဝန်ယူရမှာ ဖြစ်ပေမယ့် လူတွေအများကြီး အဲလို ဖြစ်နေတယ် ဆိုရင်တော့ ပညာရေးကို အောက်ဆုံးအဆင့်ရောက်အောင် လုပ်ခဲ့တဲ့ အရင် စနစ်ဆိုးကိုပဲ အပြစ်ဖို့ရမှာ ဖြစ်ပါတယ်။
အခုဆို သမ္မတ၊ လွှတ်တော်အကြီးအကဲ၊ တပ် အကြီးအကဲ နဲ့ စစ်ခေါင်းဆောင်တွေ၊ စစ်ခေါင်းဆောင် ဟောင်းတွေဟာ အတိတ်ကို ပြည်ဖုံးကားချ၊ အတိတ်က အပြစ်တွေ ပြန်မပြောနဲ့၊ တည်ငြိမ်ပြီး ဖွံ့ဖြိုးတိုးတက်တဲ့ ဒီမိုကရေစီ နိုင်ငံဖြစ်အောင် သွားကြမယ်လို့ တဖွဖွ ပြောဆိုနေကြပါတယ်။ ဒါပေမယ့် တိုင်းပြည်ကို အကြီးအကျယ် ဒုက္ခရောက်စေတဲ့ နိုင်ငံတကာ အလည်မှာ မျက်နှာငယ်စေတဲ့ အမုန်းတရား ဖြန့်ဖြူးမှုကိစ္စတွေ၊ အကြမ်းဖို့ လှုံ့ဆော်တာတွေ၊ အကြမ်းဖက်တာတွေကို ဒီကနေ့ အချိန်ထိ မွေးမြူထားတာ အံ့သြစရာ တွေ့မြင်နေရပါတယ်။ ဒါကလည်း အဲဒီ အမုန်းတရား၊ လှုံ့ဆော်မှု၊ အကြမ်းဖက်မှုတွေဟာ ငါတို့ စစ်ဗိုလ်ချုပ်ဟောင်းတွေ၊ စစ်ဗိုလ်ချုပ်တွေရဲ့ အကျိုးစီးပွားကို မထိခိုက်ဘူး၊ အတိုက်အခံ အင်အယ်လ်ဒီ နဲ့ ပြည်သူတွေကိုပဲ ထိခိုက်စေတယ် ဆိုတဲ့ စဉ်းစားနည်းနဲ့များ မွေးမြူထားလေရော့သလား စဉ်းစားစရာ ဖြစ်စေပါတယ်။
သမ္မတ ရုံး၊ အစိုးရအဖွဲ့နဲ့ ပြည်ထဲရေး ၀န်ကြီးဌာန အနေနဲ့ အရင် စစ်အာဏာရှင်ခေတ်ကလို တိုင်းပြည်ကို နစ်မွန်းအောင် မလုပ်သင့်တော့ပါဘူး။ ဒီအတွက် ဖေ့ဘွတ်ခ်ကို ထိန်းချုပ်ဖို့ လုပ်တဲ့ စိတ်ကူးတွေကို ခဏဘေးဖယ်ထားပြီး အမုန်းတရားဖြန့်ဖြူးမှုတွေ၊ အကြမ်းဖက်ဖို့ လှုံ့ဆော်တာတွေ၊ အကြမ်းဖက်တာတွေကို ရပ်တန့်သွားအောင်၊ တည်ငြိမ်ပြီး ဖွံ့ဖြိုးတိုးတက်တဲ့ တိုင်းပြည်ဖြစ်အောင် စ လုပ်ကြပါတော့လို့ တိုက်တွန်း နှိုးဆော်လိုက်ရပါတယ်။
စည်သူအောင်မြင့်။

0 အကြံပြုခြင်း: