Saturday, July 19, 2014

သား ဗိုလ်ချုပ်အောင်ဆန်းကို အရမ်းချစ်တာပဲတဲ့။


By Yoke Ga Zoe
ဒီနေ့ ဗိုလ်ချုပ်အောင်ဆန်းပြတိုက်ကိုရောက်တယ်။ ပန်းခြံဘက်မှာ ကားရပ်ပြီး လမ်းလျှောက်ဝင်ကြတယ်။ မနက်အစောကြီးထဲက သွားနေသူတွေမှ အများကြီးတွေ့လို့ ၀မ်းသာမိတယ်။ ဗိုလ်ချုပ်ပြတိုက်လမ်းထဲမှာ အအေးစတုဒီသာတိုက်သူတွေလဲရှိတယ်။ လမ်းတစ်လျှောက်တော့ မီးသက်တွေ ကြက်ခြေနီတွေနဲ့ ရဲတွေ စောင့်နေတယ်။ လမ်းတစ်ဝက်လောက်ရောက်တော့ ရဲတပ်ဖွဲ့က လမ်းပိတ်လိုက်တယ်။ ဆက်သွားလို့မရတော့ဘူး။ ဘာကြောင့်လဲ လူပြည့်နေလို့ ခဏစောင့်ပေးရတာလားလို့သွားမေးတော့လည်း မဟုတ်ပါဘူးလို့သာဖြေတယ်။ ဘာကြောင့်လမ်းပိတ်သလဲ ရှင်းမပြဘူး။ ဒီမှာပဲ ခဏစောင့်ကြပါ။ ပြီးရင်အားလုံးကိုသွားခွင့်ပြုပါမယ်တဲ့။ ဒီလိုနဲ့ လူတွေလဲ တဖြည်းဖြည်းများလာတယ်။ Tourist တွေတောင်ပါတယ်။ နာရီဝက်ကျော်လောက် စောင့်လိုက်ရတယ်။ နောက်တော့ လမ်းဖယ်ကြ လမ်းဖယ်ကြဆိုပြီး လူတွေကို ဖယ်ခိုင်းတယ်။ အဲ့ဒီတော့မှ သဘောပေါက်တယ် လမ်းရှင်းဆိုင်ကယ်တွေ လက်နက်ကိုင်အစောင့်ကားတွေခြံရံလို့ VIP ကားမဲကြီး တွေထွက်လာတယ်။ ဘယ်သူဘယ်ဝါရယ်တော့ မသိပါဘူး။ အိုကွယ် အာဇာနည်နေ့မှာတောင် ဗိုလ်ချုပ်ပြတိုက်လာတာ VIP တွေပြတိုက်လာနေလို့ မိုးရေထဲရပ်စောင့်ရတဲ့ လူထုရဲ့ဘ၀ပဲ။ လမ်းဖွင့်လိုက်တော့မှလူထုကြီးလဲ ပြတိုက်ဘက်ကို ဆက်လျှောက်ကြတယ်။ မိုးကတော့ တဖွဲဖွဲပဲ။ အပေါက်ဝမှာလဲ ဗမာ့ထုံးစံအတိုင်း လူတွေတိုးနေပြန်တယ်။ တစ်ချို့တွေက မသိတော့ လက်ပွေ့အိတ်တွေ ဖုန်းတွေပါလာလို့ နောက်ပြန်လှည့်ကြ။ ပစ္စည်းအပ်တဲ့နေရာကိုပြန်သွားကြနဲ့ ဆိုတော့ လူတော်တော်လေးကျပ်သွားတယ်။ ထီးနဲ့ ပိုက်ဆံအိပ်အသေးလေးတွေတော့ ယူခွင့်ပြုပါတယ်။ လုံခြုံရေးတွေ စစ်ဆေးတာကို ဖြတ်ပြီးတော့ ဗိုလ်ချုပ်အိမ်ရှိတဲ့ ကုန်းပေါ်ကို အသာလျှောက်ခဲ့တယ်။ ဗိုလ်ချုပ်စီးခဲ့တဲ့ကားကြီးကို အိမ်အပြင်မှာပြသထားပါတယ်။ အဲ့ဒီနားမှာ ဖိနပ်ချွှတ်ကြပါ ဖိနပ်ချွှတ်ကြပါလို့အော်ပြီး ကျွတ်ကျွတ်အိတ်တွေကို ၀န်ထမ်းတွေကဝေနေတယ်။ ဟင် ဘယ်လိုပါလိမ့် ဖိနပ်ဘာလို့ချွှတ်ခိုင်းပါလိမ့်ဆိုပြီးတွေးမိတယ်။ သြော် လူတွေကလဲများ မိုးတွင်းလဲဖြစ်ပြန်တော့ အိမ်ပေါ်တက်ရင် ညစ်ပေကုန်မှာစိုးလို့နဲ့တူပါတယ်လို့ တွေးမိပြီး ဖိနပ်တွေ အိတ်နဲ့ထည့်ပြီး ဆင်ဝင်လှေကားအတိုင်း ဗိုလ်ချုပ်အိမ်ပေါ်တက်ခဲ့တယ်။ အဲ့ဒီမှာ စတွေ့တာပဲဗျာ။ ပြည်သူတွေကိုသာ ဖိနပ်ချွှတ်ခိုင်းတာ ပြတိုက်ဝန်ထမ်းတွေကတော့ ဖိနပ်တွေ တလွှားလွှားနဲ့ဗျို့။ မျက်နှာတွေကလဲ ပြုံးရွှင်ချိုသာမရှိကြ။ National Museum ဆိုတဲ့ရင်ထိုးတွေ ထိုးထားတဲ့ အပြာဝတ်အမျိုးသမီးတွေပဲ။ လူထုကတော့ ဗိုလ်ချုပ်အိမ်မို့ လေးစားသမှုရော ညစ်ပေမှာစိုးလို့ရော ဖိနပ်လေးတွေ အိတ်နဲ့ထည့်ကိုင်လာတာကို သူတို့ကတော့ အိမ်ထဲမှာဖိနပ်တွေ တလွှားလွှားနဲ့ သွားလာနေတာ ဘယ်လောက်စော်ကားလိုက်တဲ့ မြင်ကွင်းလဲဆိုပြီး ဒေါသကကြွလာတယ်။ အိမ်အ၀င်ဝက ပြခန်းမှာ လူတစ်ယောက်ကို စကိုင်းနက်ကအင်တာဗျူးနေတယ်။ သူဖြေသွားတာ တစ်စွန်းတစ်စကြားလိုက်တာက အားလုံးဖိနပ်ချွှတ်ထားရချိန်မှာ ၀န်ထမ်းတွေကဖိနပ်စီးထားတာ မြင်ရတာ မသင့်လျော်တဲ့အကြောင်းပြောသွားတယ်။ ကိုယ်လဲ သည်းမခံနိုင်တော့လို့အပေါ်ထပ်ကိုတက်တဲ့ လှေကားနားမှာ ရပ်နေတဲ့ ၀န်ထမ်းအမျိုးသမီးကို လက်ညှိုးထိုးပြီး ပြည်သူလူထုကတောင် ဖိနပ်မစီးတာ ခင်ဗျားတို့ကဖိနပ်တွေနဲ့ ဘာသဘောတွေလဲဆိုပြီး အော်ပြောလိုက်မိတယ်။ လူတွေလဲ သူတို့ကို သတိထားမိသွားတယ်။ အဲ့ဒီမိန်းမမျက်နှာကြီး ကွက်ကနဲပျက်သွားပြီး ကျနော့ကို တစ်ခုခုပြန်ပြောတယ်။ လူတွေကများနေတော့ သေချာမကြားလိုက်မိဘူး။ ဒါပေမယ့် သူလဲ ချာကနဲလှည့်ထွက်သွားပြီး လှေကားနောက်က အပြင်ခန်းမှ ဖိနပ်သွားချွှတ်တယ်။ အပေါ်ထပ်မှာတော့ ဘယ်သူမှ ဖိနပ်မစီးပါဘူး။ ဗိုလ်ချုပ်တို့ အိပ်ခန်း၊ ကလေးများ အိပ်ခန်း၊ စာကြည့်ခန်းနဲ့ စာအုပ်စင် စတာတွေကြည့်ပြီး လူက ၀မ်းနည်းသလိုလိုဖြစ်လာတယ်။ သားကိုလဲ တွေ့သမျှ မြင်သမျှရှင်းပြရတယ်။ သူမေးသမျှ မေးခွန်းတွေ ဖြေလာရတယ်။ ဒီလိုနဲ့ နောက်ဖက်လှေကားကနေပြန်ဆင်းလာခဲ့တယ်။ လှေကားအဆင်းက ကျွတ်ကျွတ်အိတ်တွေပြန်သိမ်းတဲ့ ၀န်ထမ်းအဒေါ်ကြီးကတော့ ဖော်ဖော်ရွေရွေရှိပါတယ်။ ကိုယ်လဲ အိပ်တွေကို သတ်မှတ်ထားတဲ့ ဇလုံထဲထည့်ပေးလိုက်တယ်။ အဲ့ဒီမှာ နောက်ကခေါ်သံကြားလို့ လှည့်ကြည့်တော့ အမ်အာတီဗွီကပါ ကလေးတွေနဲ့မို့ အင်တာဗျူးချင်လို့ဆိုပြီး လာမေးတယ်။ အခုလိုပြတိုက်ကိုလာရတဲ့ ရည်ရွည်ချက်ကဘာလဲ ဘယ်လိုခံစားရသလဲ စသည်ဖြင့်ပေါ့။ ကိုယ်ကတော့ ပြန်ဖြေလိုက်ပါတယ်။ အခုလို ကလေးတွေနဲ့ လာရတာက သူလဲ သိတတ်လာတဲ့ အရွယ်ရောက်လာတော့ ကိုယ့်နိုင်ငံသမိုင်းကို သိစေချင်တယ် အာဇာနည်တွေအကြောင်းကိုသူတို့ သိရှိနားလည်စေချင်လို့ခေါ်လာပြတဲ့အကြောင်း.. ပြောရင်းနဲ့ ဘာလို့မှန်းမသိဘူး ငိုချင်လာတယ် အသံတောင် ကျယ်ကျယ်မပြောနိုင်တော့ဘူး။ နောက်ဆုံးတစ်ခွန်းတော့ ပြောလိုက်ပါတယ် အခုလိုပြတိုက်ထဲမှာ ပြည်သူတွေတောင် ဖိနပ်မစီးတာ ၀န်ထမ်းတွေက ဖိနပ်တွေစီးနေတာမြင်ရတာ မသင့်လျော်တဲ့အကြောင်းတော့ထည့်ပြောလိုက်တယ်။ လွှင့်တာ မလွှင့်တာတော့ သူတို့အပိုင်းပေါ့။

အပြန်လမ်းမှာ ဗိုလ်ချုပ်ကြေးရုပ်နားမှာ လူတွေတိုးနေတာတွေ့တယ်။ ဒါနဲ့ ယဉ်ထိန်းရဲကိုလှမ်းမေးလိုက်တယ် ဒီနားမှာ ဥသြဆွဲမှာလားပေါ့။ သူကလဲ မသိဘူးတဲ့။ အချိန်ကလဲ ၁၀ နာရီထိုးခါနီးပြီဆိုတော့ အာဇာနည်ကုန်းဘက်မသွားတော့ပဲ ဗိုလ်ချုပ်ကြေးရုပ်မှာပဲ အလေးပြုဖို့ ဆုံးဖြတ်လိုက်တယ်။ လူငယ်တွေ ကျောင်းသားတွေ ပြည်သူလူထုတွေ အများကြီးပဲ။ တွန်းလှည်းနဲ့ ထီသည်က လမ်းဘေးမှာရပ်ပြီး သူ့စပီကာလေးနဲ့ မေလှမြိုင်သီချင်း အလေးပြုပါသည်ကိုဖွင့်နေတယ်။ အရင် စစ်အစိုးရခေတ်ကတည်းက ဗိုလ်ချုပ်သီချင်းတွေဖွင့်ပြီး စမ်းချောင်းထဲမှာလှည့်နေတဲ့ ထီသည်တစ်ယောက်ကို သွားသတိရမိတယ်။ သူပဲလား တစ်ခြားထီသည်လားတော့ မမှတ်မိပါ။ ဒေါင်းအလံတွေ တစ်ဝက်လွှင့်ထားတဲ့ ကျောင်းသားအဖွဲ့တွေက ဦးဆောင်ပြီးအလေးပြုကြတယ်။ ကားတွေက ဟွန်းတီးတယ်။ ကားတွေ လူတွေ အကုန်လုံး ရပ်တန့်ပြီး အလေးပြုကြတယ်။ အလေးပြုပြီးတော့ နိုင်ငံတော်သီချင်းကို အားလုံးသီဆိုကြတယ်။ နိုင်ငံတော်သီချင်းဆိုတာကို ဗီဒီယိုရိုက်ရင်း လူကမျက်ရည်တွေဝိုင်းလာမိတယ်။ ဒီနိုင်ငံနဲ့ ပါတ်သတ်တဲ့ ခံစားချက်တွေပေါင်းဆုံသွားတယ်လို့ပဲထင်ပါတယ်။ အဖြေမရှိဘူး။ အပြန်လမ်းမှာ ကျနော့်သားက ပြောလာတယ် ဖေဖေ သား ဗိုလ်ချုပ်အောင်ဆန်းကို အရမ်းချစ်တာပဲတဲ့။ ဒီနှစ် အာဇာနည်နေ့အတွက် ကျေနပ်မိတယ်။

0 အကြံပြုခြင်း: