Wednesday, June 18, 2014

ဦးဥတ္တရအား တရားရုံးထုတ်မည့်နေ့တွင် ဗြိတိသျှသံအရာရှိ သက်သေထွက်ဆိုမည်


မဟာသန္တိသုခကျောင်းတိုက်ကိစ္စ အင်းစိန်ထောင်၌ ထိန်းသိမ်းခံ အင်္ဂလန်ဆရာတော် ဦးဥတ္တရအား တရားရုံးထုတ်မည့်နေ့တွင် ဗြိတိသျှသံအရာရှိ သက်သေထွက်ဆိုမည်

 18-6-2014
 အေးမြတ်မွန်၊ သက်ထား

မဟာသန္တိသုခကျောင်းတိုက်ဖြစ်ရပ်နှင့်ပတ်သက်၍ အင်းစိန်ထောင်တွင် ထိန်းသိမ်းခံထားရသော အင်္ဂလန်ဆရာတော် ဦးဥတ္တရအပါအ၀င် သံဃာငါးပါးအား တရားရုံးထုတ်မည့်နေ့ ဇွန် ၂၀ ရက်တွင် ဗြိတိသျှသံရုံးမှအရာရှိက သက်သေထွက်ဆိုပေးမည်ဖြစ်ကြောင်း အဆိုပါသံရုံး၏ ပြောရေးဆိုခွင့်ရှိသူတစ်ဦးကဆိုသည်။

"ဒီနေ့မနက်မှာ ဗြိတိန်သံရုံးအရာရှိက အင်းစိန်ထောင်ကိုသွားပြီး ဦးဥတ္တရနဲ့ တွေ့ခဲ့ပါတယ်။ ဗြိတိန်နိုင်ငံသားက သူတစ်ယောက်တည်းဖြစ်တဲ့အတွက် သူ့ကိုကူညီပေးသွားဖို့ လုပ်ဆောင်သွားဖို့ရှိပါတယ်။ ၂၀ ရက်နေ့ တရားရုံးထုတ်တဲ့အခါမှာလည်း ဗြိတိသျှသံရုံးအရာရှိကလာပြီး သက်သေအနေနဲ့ ထွက်ဆိုပေးပါမယ်" ဟု ဗြိတိသျှသံရုံးမှ တာဝန်ရှိသူတစ်ဦးကဆိုသည်။

ထို့ပြင် ဖမ်းဆီးခံ သံဃာတော်ငါးပါးအနက်မှ လန်ဒန်ဆရာတော် ဦးဥတ္တရအတွက် ဗြိတိသျှသံရုံးအနေဖြင့် ကူညီဆောင်ရွက်ပေးလျက်ရှိပြီး အမြန်ဆုံးလွှတ်ပေးနိုင်ရန် သက်ဆိုင်ရာတာဝန်ရှိသူများနှင့် ဆွေးနွေးဆောင်ရွက်လျက်ရှိကြောင်း ဗြိတိသျှသံရုံးမှ အဆိုပါတာဝန်ရှိသူ၏ ပြောပြချက်အရ သိရသည်။

"ကျွန်တော်တို့ အင်္ဂလန်က နိုင်ငံခြားရေး ဒုတိယ၀န်ကြီးနဲ့ မြန်မာနိုင်ငံက နိုင်ငံခြားရေးဒုဝန်ကြီးတို့က ဦးဥတ္တရကိစ္စနဲ့ပတ်သက်ပြီး တွေ့ဆုံဆွေးနွေးပြီးသွားပါပြီ။ လက်ရှိမှာတော့ အဲဒီလောက်ပဲ ပြောပြနိုင်ပါသေးတယ်" ဟု ဗြိတိသျှသံရုံးမှ ပြောရေးဆိုခွင့်ရှိသူတစ်ဦးကဆိုသည်။

ဗြိတိသျှသံရုံးအရာရှိက ဆရာတော်ဦးဥတ္တရအား သွားရောက်တွေ့ဆုံခဲ့ရာတွင် ဆရာတော်၏ကျန်းမာရေးအခြေအနေ၊ စားဝတ်နေရေးများကိုမေးမြန်းကာ ထောင်အာဏာပိုင်များကိုလည်း ဆရာတော်၏ စားသောက်ရေး၊ နေထိုင်ရေးနှင့်ပတ်သက်၍ ပြည့်ဝစွာဆောင်ရွက်ပေးရန် တိုက်တွန်းခဲ့ကြောင်း ၎င်းကဆက်လက်ပြောကြားသည်။

ထို့ပြင် ဖမ်းဆီးထိန်းသိမ်းခံဆရာတော် ဦးဥတ္တရနှင့်ပတ်သက်၍ ဗြိတိန်အစိုးရအနေဖြင့် တုံ့ပြန်မှုအမြန်ဆုံး ပြုလုပ်ပေးရန် Ber mondsey & Old Southwark လွှတ်တော်အမတ် Simon Hughes မှ တိုက်တွန်းလိုက်သည်ဟူ၍ လန်ဒန်အခြေစိုက် လူမှုကွန်ရက်ဝက်ဘ်ဆိုက်တစ်ခုဖြစ်သည့် Londonse 1 တွင် ဖော်ပြထားကြောင်း သိရသည်။

မဟာသန္တိသုခကျောင်းတိုက်တွင် သီတင်းသုံးသည့် ပီနန်ဆရာတော်ကြီး ဦးပညာဝံသ၏ တပည့်ရင်း ဦးဥတ္တရ (လန်ဒန်ဆရာတော်) အပါအ၀င် သံဃာတော်ငါးပါးကို တိုင်းသံဃနာယကအဖွဲ့၏ ညွှန်ကြားချက်အရ ၂၀/၉၀၊ ပုဒ်မ-၂၉၅(က)ဖြင့် ဇွန် ၁၃ ရက်တွင် လူဝတ်လဲစေကာ အင်းစိန်ထောင်သို့ ပို့ဆောင်ထားပြီး ဇွန် ၂၀ ရက်တွင် ရုံးထုတ်စစ်ဆေးမည်ဖြစ်ကြောင်း သိရသည်။

ဖမ်းဆီးထိန်းသိမ်းခံသံဃာတော်များမှာ ဦးဥတ္တရ (လန်ဒန်ဆရာတော်)၊ ဦးသုန္ဒရ၊ ဦးပညာဝရ (လန်ဒန်ဆရာတော်)၊ ဦးနန္ဒိယ၊ ဦးတေဇိန္ဒ(နိုင်ငံတော်ပရိယတ္တိ သာသနာ့တက္ကသိုလ်၊ ကယားဆောင်အဆောင်မှူး) တို့ဖြစ်ကြပြီး ဆရာတော်ငါးပါးစလုံးမှာ အာဂန္တုအနေဖြင့် လာရောက်သီတင်းသုံးသည့် သံဃာတော်များသာဖြစ်ကြောင်း ပီနန်ဆရာတော်က မိန့်ကြားထားသည်။


 Eleven Media Group

0 အကြံပြုခြင်း: