Wednesday, May 14, 2014

လက်တွေ့ကျကျ ဖြေရှင်းပါ



The Voice Weekly

အသစ်ဖောက်လုပ်ထားသည့် ကွန်ကရစ် အမြန်လမ်းမကြီးပေါ်တွင် မော်တော်ယာဉ် တိမ်းမှောက်မှုများ မကြာခဏ ဆိုသလို ကြားသိနေရသည်။ အဆိုပါ မော်တော်ယာဉ် တိမ်းမှောက်မှုများ အားလုံးကို ပြန်ကြားရေး ဝန်ကြီးဌာနက ကွပ်ကွဲစီမံနေသည့် အစိုးရအာဘော် သတင်းမီဒီယာ အားလုံးတွင် လမ်းကြောင့် မဟုတ်ဘဲ ယာဉ်မောင်းနှင့် မော်တော်ယာဉ်များ ကြံ့ခိုင်မှု အားနည်းချက်ကသာ အဓိက ဖြစ်ကြောင်း အစဉ်တစိုက် ပြောဆိုရေးသားထားသည်။

ကမ္ဘာပေါ်ရှိ နိုင်ငံအားလုံးနီးပါးတွင် အဝေးပြေးလမ်းမများကို နိုင်လွန် ကတ္တရာကိုသာ အသုံးပြုကြသော်လည်း မြန်မာနိုင်ငံတွင်မူ ကွန်ကရစ်လမ်းကိုသာ အသုံးပြုခြင်းမှာလည်း များစွာထူးခြားလှသည်။ ထိုသို့ ကွန်ကရစ်လမ်း အသုံးပြုရခြင်းကို ပြည်ပမှ ကတ္တရာဝယ်ယူမှု လျှော့ချနိုင်ပြီး နိုင်ငံခြားငွေ သက်သာစေရန်ဟု ဆောက်လုပ်ရေး ဝန်ကြီးဌာန (ဝါ) အစိုးရက အကြောင်းပြခဲ့သည်။

စင်စစ်အားဖြင့် နိုင်ငံတကာမှ ပညာရှင်များသည် အဝေးပြေးလမ်းများ ဖောက်လုပ်မည့် လမ်းတစ်လျှောက် ဒေသများ၏ တစ်နှစ်လုံး ပျမ်းမျှအပူချိန်၊ မိုးရွာသွန်းမှု၊ အောက်ခံ မြေအမျိုးအစား၊ အများစု အသုံးပြုသည့် တာယာအမျိုးအစား၊ အရှိန်မြှင့်မောင်းသည့် အချိန်တွင် လမ်းနှင့် တာယာ ပွတ်တိုက်မှုကြောင့် ထွက်ပေါ်လာနိုင်သည့် အပူချိန်၊ လမ်းအပူချိန်၊ တာယာ၏အပူချိန်၊ ထိုအပူအချိန်ကို မူတည်ကာ တာယာနှင့် လမ်းအကြား စွဲကပ်နိုင်စွမ်း၊ အကွေ့နေရာများတွင် ကြုံတွေ့ရမည့် ဗဟိုခွာအားချိန်ဆမှု စသဖြင့် နှစ်ပေါင်းများစွာ စနစ်တကျ သုတေသန ပြုထားသော အချက်များအပေါ် မူတည်ကာ ဘေးထွက်ဆိုးကျိုး အနည်းဆုံး နိုင်လွန်ကတ္တရာကို အများဆုံး အသုံးပြုနေကြခြင်း ဖြစ်သည်။

မြန်မာနိုင်ငံတွင် အဆိုပါ အဝေးပြေး လမ်းမကြီး အပါအဝင် ရန်ကုန်မြို့တော်အတွင်းရှိ လမ်းမကြီး အချို့ကိုလည်း ကွန်ကရစ်ဖြင့် အစားထိုးလာခြင်းမှာ နိုင်ငံခြားငွေ သက်သာရန်ဆိုသော အစိုးရ၏ အကြောင်းပြချက်မှာ မလုံလောက်ပေ။ ကွန်ကရစ်လမ်း ခင်းရာတွင် အသုံးပြုရသည့် ဘိလပ်မြေ စက်ရုံများ၊ သဲနှင့် ကျောက်ကန်ထရိုက် လုပ်ပိုင်ခွင့်ရနေသူ များကိုလည်း ဆန်းစစ်ကြည့်ရန် လိုပေမည်။ ထို့အပြင် နိုင်ငံခြားငွေ သက်သာရန်ဆိုသော အကြောင်းပြချက်ကိုလည်း နိုင်လွန်ကတ္တရာ မဖြစ်မနေ အသုံးပြုရမည့် လမ်းများကို ကွန်ကရစ် အစားထိုးကာ သက်သာသွားသော နိုင်ငံခြားငွေနှင့် တန်ဖိုးချင်းယှဉ်၍ မရသည့် လူ့အသက်ပေါင်း များစွာဖြင့် ချိန်ထိုး ကြည့်သင့်လှသည်။

ကွန်ကရစ်၏ သဘာဝမှာ အပူကိုတွန်းကန်သည့် သဘောရှိပြီး တာယာနှင့် ပွတ်တိုက်ပါက အပူချိန်ကို ပိုမြင့်မားကာ တာယာကို ဒုက္ခပေးတတ်သည်။ အခန့်မသင့်ပါက ကွဲထွက်သွားတတ်သည်။ နိုင်လွန်ကတ္တရာတွင် တစ်နှစ်ခန့် သုံး၍ရသော တာယာတစ်စုံကို ကွန်ကရစ်လမ်းတွင် မောင်းပါက သုံးလကျော်ကျော်ခန့်သာ အသုံးခံပေသည်။ ဆိုလိုသည်မှာ မော်တော်ယာဉ်များ၏ တစ်နှစ်စာတာယာဖိုး ကုန်ကျစရိတ်၊ တာယာကွဲထွက်ကာ ယာဉ်တိမ်းမှောက်နိုင်သည့် အန္တရာယ်တို့နှင့် ချိန်ထိုးကြည့်လျှင်ပင် ကွန်ကရစ်လမ်းများ၏ အပိုကုန်ကျစရိတ်နှင့် အန္တရာယ်ရှိမှု အတိုင်းတာကို အလွယ်တကူ သိရှိနိုင်သည်။

လက်ရှိ ဖြစ်ပေါ်နေသော အဝေးပြေးလမ်း ယာဉ်တိမ်းမှောက်မှု ပြဿနာများကို သက်ဆိုင်ရာ တာဝန်ရှိသူများ အနေနှင့် မလွတ်မကျွတ်သော နာနာဘာဝများအတွက် သဲပုံစေတီတည်ခြင်းနှင့် အစာရေစာ ကျွေးခြင်းများ လုပ်ဆောင်နေသည်ထက် မျက်မှောက်ပကတိ အခြေအနေများ ယထာဘူ တကျကျ၊ နည်းလမ်းမှန်မှန်၊ ကျိုးကြောင်းဆက်စပ်မှုရှိရှိ ဆန်းစစ် ဝေဖန်သုံးသပ်ကာ ကွန်ကရစ်လမ်းပေါ်တွင် ထပ်ပိုးနိုင်လွန်ကတ္တရာ ခင်းခြင်းကဲ့သို့ လက်တွေ့ကျသည့် ပြုပြင်ပြောင်းလဲခြင်းမျိုးကိုသာ အလျင်အမြန် ဆောင်ရွက်သင့်ကြောင်း ထောက်ပြလိုရင်း ဖြစ်သည်။

အယ်ဒီတာ (၁၃-၅-၂၀၁၄)

0 အကြံပြုခြင်း: