Friday, May 9, 2014

ညမထွက်ရ အမိန့် ညမထွက်ရ အမိန့် ဘင်္ဂါလီတွေ ဘက်ကိုတော့ မရောက်သေးဘူး



The Voice Weekly

စစ်တွေတွင် ညကိုးနာရီ နောက်ပိုင်း လမ်းပေါ် ရှိသူများကို ဖမ်းမည်

ရန်ကုန်၊ မေ ၈

ပဋိပက္ခများ မကြာခဏ ဖြစ်ပွားလေ့ရှိသည့် ရခိုင်ပြည်နယ် စစ်တွေမြို့တွင် ညမထွက်ရ အမိန့်ကို ချိုးဖောက်ကာ ည ၉ နာရီကျော်တွင် လမ်းပေါ်ထွက်သူများ ရှိနေသဖြင့် လာမည့် ရက်သတ္တတစ်ပတ်မှ စတင်ကာ ညကိုးနာရီ နောက်ပိုင်း လမ်းထွက်သူများကို ဖမ်းဆီး အရေးယူသွားမည် ဖြစ်ကြောင်း စစ်တွေမြို့နယ် မြို့နယ်ရဲတပ်ဖွဲ့မှူးက ပြောကြားသည်။

စစ်တွေမြို့တွင် ည ၉ နာရီကျော်မှ နံနက် ၅ နာရီအထိ ညမထွက်ရအမိန့် ပြစ်မှုဆိုင်ရာ ကျင့်ထုံး ဥပဒေပုဒ်မ ၁၄၄ ထုတ်ပြန်ထားသော်လည်း ကား၊ ဆိုင်ကယ်၊ စက်ဘီးများ သွားလာနေခြင်း၊ အရက်ဆိုင်၊ စားသောက်ဆိုင်များ ဖွင့်လှစ်ထားခြင်း စသည့်တို့ကို လုပ်ဆောင်နေ၍ မေလ ၅ ရက်နေ့မှ စတင်ကာ သတိပေးမှုများ ပြုလုပ်နေကြောင်း ၎င်းကဆိုသည်။
“ရပ်ကွက်တိုင်းမှာ သတိပေး စာရွက်တွေကို ကပ်ထားတယ်။ ဒီအပတ်ကုန်လောက်မှပဲ ဖမ်းဆီးတာ စမယ်” ဟု မြို့နယ်ရဲတပ်ဖွဲ့မှူးက ပြောဆိုသည်။

လက်ရှိတွင် ည ၉ နာရီ နောက်ပိုင်း လမ်းပေါ်၌ တွေ့ရှိသူများကို အုပ်ချုပ်ရေး အဖွဲ့များက ပညာပေးမှုများကိုသာ ပြုလုပ်လျက် ရှိကြောင်း ၎င်းက ရှင်းပြသည်။
“ဘင်္ဂါလီတွေ ဘက်ကိုတော့ မရောက်သေးဘူး။ အဆင့်ဆင့် လုပ်သွားမှာပါ။ လောလောဆယ် မြို့ပေါ်ပဲ ပညာပေးတာပါ” ဟု မြို့နယ်ရဲတပ်ဖွဲ့မှူးက ပြောဆိုသည်။

ည ၉ နာရီကျော် နောက်ပိုင်းတွင် အပြင်မထွက်ရန် ရပ်ကွက်အုပ်ချုပ်ရေးမှူး များမှ တစ်ဆင့် သတိပေးချက်များကို ရပ်ကွက်တိုင်းရှိ နေရာအသီးသီးတွင် စာရွက်ဖြင့် ကပ်ထားသည်ကို တွေ့ရှိရကြောင်း စစ်တွေမြို့ခံများထံမှ သိရှိရသည်။

“ပုဒ်မ ၁၄၄ ဟာ ဘင်္ဂါလီတွေထက် ရခိုင်တွေနဲ့ပဲ သက်ဆိုင်သလို ဖြစ်နေတယ်” ဟု စစ်တွေမြို့ မြို့မိမြို့ဖ တစ်ဦးဖြစ်သူ ဦးသန်းထွန်းက ပြောကြားသည်။

ရခိုင်ပြည်နယ် စစ်တွေမြို့တွင် ၂၀၁၂ ခုနှစ် ဇွန်လတွင် ဖြစ်ပွားခဲ့သည့် ပဋိပက္ခမှ စတင်ကာ ကျင့်သုံးခဲ့သည့် ညမထွက်ရ အမိန့်ကို အချိန် အတိုးအလျော့ လုပ်ခဲ့သော်လည်း အပြီးသတ် ရုပ်သိမ်းမှု ပြုလုပ်ခဲ့ခြင်း မရှိသေးပေ။

0 အကြံပြုခြင်း: