Wednesday, April 9, 2014

သည်မိုးနဲ့သည်လေထဲ သည်လူတွေနဲ့ ခရီးဆက်ရဖို့


http://7daydaily.com
Tuesday, April 8, 2014
သင်းရီ

နှစ်ပေါင်း ၃၀ အကြာတွင်မှ တစ်ကျော့ပြန်ပြီး ကောက်ခံလာသော မြန်မာနိုင်ငံ၏ သန်းခေါင်စာရင်းကို မတ်လ ၃၀ ရက်မှစတင်ကောက်ခံခဲ့ရာသည်နေ့ ဧပြီလ ၇ ရက်ဆိုလျှင် ၉ရက် တင်းတင်း ပြည့်တော့မည်ဖြစ်သည်။ နောက်ထပ် သုံးရက်အကြာ ဧပြီလ ၁၀ ရက်တွင် တစ်နိုင်ငံလုံးအတိုင်းအတာအရ စာရင်းကောက်ယူမှုတွေပြီး ဆုံးတော့မည်ဖြစ်၏။

သန်းခေါင်စာရင်းဆိုသည်က တိုင်းပြည်တစ်ပြည်တိုးတက်အောင် ဆောင်ရွက်ရေးမှာ မည်မျှပင်အရေးပါလှပါကြောင်း၊  သန်းခေါင်စာရင်းကောက်ယူရာမှ ရရှိလာသည့်အချက်အလက်များကို အခြေခံလျက် နိုင်ငံတော်၏ စီမံကိန်းအရပ်ရပ်ကိုရေးဆွဲ အကောင်အထည် ဖော်ရမှာဖြစ်သည့်အကြောင်း၊  ထို့ကြောင့်လည်း ပြည်သူများက  အချက်အလက်များကိုတိကျအောင်  ကူညီဖြေဆိုပေးကြစေလိုပါကြောင်း စသည်များကို သတင်းစာတွေထဲမှတစ်မျိုး၊ ရုပ်သံလှိုင်းတွေထဲမှတစ်ဖုံ နည်းမျိုးစုံအသွင်မျိုးစုံဖြင့်နိုင်ငံတော်အစိုးရနှင့် ပြည်သူ့အင်အားဦးစီးဌာနတို့က  အကြိမ်ကြိမ်အထပ်ထပ် အာပေါက်လောက်အောင်လွှင့်ထုတ် ကြေညာနေခဲ့သည်မှာ လနှင့်ပင် ချီ၍ကြာခဲ့ပြီဖြစ်၏။

တစ်နိုင်ငံလုံးအတိုင်းအတာ ဖြင့်  စာရင်းဇယားတိတိကျကျ ရအောင်ကောက်ယူရမည်ဖြစ်၍ လည်း   စာရင်းစစ်နှင့်စာရင်း ကောက်အင်အားပေါင်း တစ်သိန်းတစ်သောင်းကျော်ကို တိုင်းပြည် နှင့်အဝန်း အနယ်နယ်အရပ်ရပ်၌ ကြိုတင်သင်တန်းတွေပေးခဲ့သည်။

ထိုသို့သင်တန်းပေး၍ စာရင်းကောက်စာရင်းစစ်များအဖြစ် ဆောင်ရွက်စေရာ၌ပင် စေတနာ့ဝန်ထမ်းလုပ်အားပေး အဖြစ်နှင့် တာဝန်ပေးခိုင်းစေသည်မဟုတ်။ စာရင်းကောက်နှင့်စာရင်းစစ်များအားလုံးကို သင်တန်းရက်များတွင် တစ်ရက်တစ်သောင်းကျပ်နှင့် စာရင်းကောက်ရက်များတွင် တစ်ရက်ခုနစ်ထောင်ကျပ်အပြင် တူညီဝတ်စုံများပေးကာ တာဝန်အပ်နှင်းခဲ့ခြင်းဖြစ်သည်။

သို့ဖြစ်၍ သည်သန်းခေါင် စာရင်းကောက်ယူရေးစီမံကိန်း၏ ကုန်ကျစရိတ်မှာ တစ်နိုင်ငံလုံး အတိုင်းအတာနှင့်ဆိုလျှင် နည်းနည်းနောနောကုန်ကျခဲ့လေမည်မဟုတ်ဟု ခန့်မှန်းကြည့်မိသည်။

ထိုသို့ငွေကုန်ကြေးကျများသည့်  စီမံကိန်းဖြစ်သော်လည်း တိုင်းပြည်တစ်ပြည်တိုးတက်ရေးအတွက် အလွန်အရေးပါလှသော အခြေခံစာရင်းအချက်အလက် ဖြစ်သောကြောင့် ကမ္ဘာ့ကုလသမဂ္ဂ လက်အောက်ခံ  ကမ္ဘာ့လူဦးရေ ရန်ပုံငွေ အဖွဲ့အစည်းလို အဖွဲ့အစည်းမျိုးအပါအဝင်နိုင်ငံတကာက မြန်မာနိုင်ငံသန်းခေါင်စာရင်းကောက်ယူနိုင်ရေးအတွက် ရန်ပုံငွေတွေအမြောက်အမြားထည့်ဝင် ကူညီလှူဒါန်းခဲ့ကြသည်။

ထိုသို့သောစာရင်းဇယား တစ်ခုကို နိုင်ငံနှင့်အဝန်း ကောက်ယူပြုစုရာတွင် ဘာသာရေး၊ လူမျိုးရေးအမည်ပြဿနာအချို့ ရှိနေသဖြင့် စာရင်းအတိအကျရနိုင်ရေး ကောက်ခံရန် အခက်အခဲရှိနေသောရခိုင်ပြည်နယ်အတွင်းမှ ဒေသအချို့လို ကချင်ပြည်နယ်မှ ဒေသအချို့လိုနေရာမျိုးတွေမှာ စာရင်းကောက်ယူရန် အခက်အခဲအချို့ရှိနေသည်ဟု သတင်းတွေထဲတွင် ကြားနေ ဖတ်နေရသည့်တိုင် တစ်နိုင်ငံလုံး အတိုင်းအတာတွင်မူ  အခက်အခဲရှိလှသည်ဟုမကြားခဲ့ရ။

လိုအပ်သည့်စာရင်းဇယားတွေ အပြည့်အဝရရှိအောင်မြင်ပါစေဟုလည်း စိတ်ဝင်တစားနှင့် စောင့်ကြည့်နေမိသည်။ ဟိုဟိုသည်သည် နားစွင့်ကြည့်မိတော့ ပြည်သူတွေကလည်း ကောက်ယူမည့် သန်းခေါင်စာရင်းအပေါ် စိတ်ဝင်တစားဖြင့်  ဖြေဆိုပေးရန် အသင့်ရှိနေကြကြောင်း လက်လှမ်းမီရာ မိတ်ဆွေများထံမှ ကြားနေရသည်။

အခြားသူတွေကိုထား၊ ကျွန်တော်နှင့်ကျွန်တော်နေထိုင်ရာခုနစ်ထပ်တိုက်ရှိ ဘယ်ညာ ၁၄ ခန်းကမူ စိတ်ပါလက်ပါပင် စောင့်မျှော်နေခဲ့ကြသည်ကတော့ သေချာသည်။

‘‘...နေ့...ရက်...အချိန်တွင် လာရောက်၍ စာရင်းကောက်ယူပါမည်။ ဖြေဆိုနိုင်သူအိမ်ထောင်ဦးစီး(သို့မဟုတ်) အိမ်ထောင်စု၏ အကြောင်းအရာများကို  ဖြေဆိုပေးနိုင်မည့်  အိမ်ထောင်စုသား တစ်ဦးဦး  စောင့်နေပေးပါရန် မေတ္တာရပ်ခံအပ်ပါသည်။ သို့မဟုတ် လူကြီးမင်း၏အိမ်သို့ မည်သည့်အချိန်တွင်  လာရောက် ကောက်ယူရမည်ကို ရပ်ကွက်အုပ်ချုပ်ရေးမှူးများမှတစ်ဆင့် အသိပေးပါရန် မေတ္တာရပ်ခံအပ်ပါသည်’’ ဆိုသည့် အကြောင်းကြားစာလေးကို ရက်ကြိုပြီး အိမ်တိုင်းစေ့အရောက်လာပေးထားသည်ကြောင့်လည်း ဘဝင်ခွေ့မိရ သေး၏။ သည်တော့လည်း ရောင်းသူဝယ်သူအသံတူဆိုသလို သူတို့စာရင်းကောက်ယူရေးအဖွဲ့ တွေလာမည်ဆိုသည့်နေ့ နေ့လယ်မှာ ဘယ်ကိုမျှခြေမဆန့်တော့ဘဲ အိမ်မှာအသင့်အနေအထားဖြင့် စောင့်ရသည်။  ရေနွေးကြမ်းနှင့် အမြည်းလေးပင်  စာရင်းကောက်သူတွေအမောပြေဖို့  ပြင်ထားမိလိုက်သေး။

 မှတ်မှတ်ရရ အဲသည်နေ့ နေ့လယ်က ရေးဖော်ရေးဖက် စာရေးဆရာမတစ်ယောက် အိမ်ကိုအလည်လာသဖြင့် စကားစမြည်ပြောရင်း စောင့်ရတော့ တမင်ထိုင်စောင့်ရသလိုမျိုး ပျင်းစရာမကောင်းဘဲတောင် ရှိနေခဲ့သေးသည်။

 ‘‘ဒီနေ့ သန်းခေါင်စာရင်းကောက်တဲ့အဖွဲ့တွေလာမယ်ဆိုလို့ သူတို့ကိုလည်း မျှော်နေရသေးတယ် ဆရာမရေ...’’ကျွန်တော် ပြောတော့ ဧည့်သည်ဆရာမက ‘‘ကျွန်မတို့ဘက်ကိုတော့ တမြန်နေ့က လာသွားပြီ။  ကျွန်မရဲ့ အခန်းတံခါးမှာက ကျွန်မရဲ့သင်တန်းဆိုင်းဘုတ်ပြားလေးချိတ်ထားတော့ ဦးဆောင်လာတဲ့ စာရင်းကောက်ဆရာမက ဒီအခန်း လူမရှိဘူးဆိုပြီးတော့ မကောက်ခဲ့ဘဲ ကျော်သွားလို့ ကပျာကသီ ဆင်းပြေးလိုက်သွားပြီး ကျွန်မ ကျန်နေခဲ့ပါတယ် ကောက်သွားပါဦးလို့ ပြောရသေးတယ်’’ပြောသဖြင့် ‘‘သည်လိုတော့ နမော်နမဲ့ မလုပ်သင့်ဘူး၊ သည်အတိုင်းသာ ဟိုမှာကျန်၊ သည်မှာကျန်ဆိုရင် စာရင်းအမှန်ဘယ်ရတော့မှာလဲ’’ ဟု နှစ်ယောက်သားမှတ်ချက်ပေး မိရသေး၏။

နေအတော်စောင်း၍ ဧည့်သည်ဆရာမပြန်သွားသည့်တိုင် ကျွန်တော့်မှာဖြင့် စာရင်းကောက်အဖွဲ့ကို ၀တ္တရားအတိုင်းထိုင်စောင့်နေရဆဲရှိရသည်။ ခုလာနိုး ခဏနေလာနိုးနှင့် ဘာအလုပ်မှ မလုပ်နိုင်ဘဲစောင့်ရသည်မှာ နေလုံးပင်ပျောက်ချိန်ထိ။

စာရင်းကောက်သူတွေကတော့ မှောင်သည်ထိ ရောက်မလာခဲ့ကြတော့။

  နောက်နေ့ရောက်မှ ဟိုဘက်ခန်း၊ သည်ဘက်ခန်းတွေဆီ စနည်းနာတော့ သူတို့အခန်းတွေ ကိုတော့ကောက်သွားသည်တဲ့။ ကျွန်တော့်အခန်းကိုတော့ လူမရှိဘူးထင်လို့ ကောက်မသွားခဲ့တာ ဖြစ်မယ်ထင်ရဲ့နှင့် ပြောသံဆိုသံတွေကြားတော့ ကျွန်တော့်စိတ်ထဲ ပိုပြီးမကျေမလည်ဖြစ်မိရသည်။

ကျွန်တော့်အိမ်မှာက မိသားစုဝင် ခုနစ်ဦးရှိသည်။ ထိုနေ့လယ်တုန်းက  သူတို့ကို  တမင်ထိုင်စောင့်နေသည့် ကျွန်တော်နှင့်အတူ   မိသားစုဝင်သုံးဦးလည်းရှိ နေသည်။ ဧည့်သည်ဆရာမရောဆို  အိမ်မှာလူငါးယောက်ရှိနေသည်။  တံခါးလည်းမခေါက်၊ ဘဲလ်လည်းမတီးနှင့် လူမရှိဘူးဟု မည်ကဲ့သို့သောကိုယ်ပိုင်ဆုံးဖြတ်ချက်နှင့် ဆုံးဖြတ်သွားသဖြင့် ကျွန်တော့်အခန်းကျန်နေခဲ့ရပါသလဲ။ ကျွန်တော့်စိတ်ထဲမှာ မကျေမလည်ဖြစ်မိရသည်။

တိတိကျကျရရှိရန်လိုအပ်နေသော သည်စာရင်းဇယားအတွက် အဘယ်ကြောင့်များ ပေါ့ပေါ့တန်တန် နမော်နမဲ့လုပ်ရပါသလဲ။ စိတ်ထဲမှာမကျေနပ်။

 ယခု ကျွန်တော့်လက်တစ်ကမ်းအတွင်းမှာပင်  စာရင်းကောက်သူများ၏ တာဝန်မကျေမှုက ကျွန်တော့်အိမ်ထောင်စုတစ်ခု။ ဧည့်သည်ဆရာမ၏ အိမ်ထောင်စုတစ်ခု။ နှစ်ခုရှိနေပြီ။ တစ်တိုင်းပြည်လုံးမှာများ ခုအတိုင်းသာ နမော်နမဲ့တွေလုပ်နေကြမည်ဆိုလျှင် လူပင်ပန်းရကျိုး၊ ငွေကုန်ရကျိုးနပ်ပါတော့မလားတွေးပြီး စိတ်မကောင်းဖြစ်မိရသည်။ ရလာသည့်စာရင်းအမှားတွေနှင့် တိုင်းပြည်တိုးတက်ရေးစီမံကိန်းကို ဘယ်လို  တွက်ချက်ကြပါမလဲ တွေးမိတော့လည်း  ရင်မောရသည်။

သို့နှင့်သည်မနက်တော့ ကျွန်တော်၏ နိစ္စဓူဝစတိုင်အတိုင်း အင်တာနက်မှာထိုင်ပြီး သတင်းဌာနသုံးလေးခုမှာ တက်လာနေသည့်သတင်းတွေကို ထိုင်ဖတ်မိတော့ တမြန်နေ့ကတည်းကပင် စတင်၍ ရင်ထဲမှာဖြစ်ပေါ် နေခဲ့သည့် စာရင်းကောက်တွေအပေါ် ကျွန်တော့်မကျေလည်မှုသည် ကျွန်တော့်ဘက်ကအလွန်မဟုတ်ကြောင်း ပို၍ပင် ထင်ရှားသွားသည်။

ကချင်၊ ရှမ်း၊  တနင်္သာရီ စသည့်ဒေသများတွင်  အချို့စာရင်းကောက်ယူသူများက တိုင်းရင်းသားလူမျိုးအမည်များထည့်သွင်းရာ၌ တိကျမှန်ကန်မှုမရှိကြသည့်အကြောင်း၊ ရေးသွင်းရမည့် ကုတ်နံပါတ်များကို ခပ်ပေါ့ပေါ့ပင် အမှားမှားအယွင်းယွင်းဖြင့် ရေးသွင်းနေကြကြောင်းတွေ သတင်းတွေထဲမှာဖတ်ရတော့ စိတ်မကောင်းဖြစ်မိရသည်။

ပြည်နယ်တွေလို ဝေးဝေးလံလံမဟုတ်သော ရန်ကုန်လိုမြို့ ကြီးပေါ်မှာပင် ပြီးပြီးရောသဘော ဆောင်ရွက်နေမှုတွေရှိနေကြောင်းလည်း သတင်းထဲမှာဖတ်ရသည်။

အမျိုးသမီးလေးတွေနေသည့်အဆောင်တစ်ခုသို့  လာရောက်စာရင်းကောက်ယူသည့်အဖွဲ့က လူများလွန်းသည်။ ထို့ ကြောင့် သက်ဆိုင်ရာနေရပ်များသို့ပြန်ပြီးတော့သာ စာရင်းပေးကြရန်ပြောလျက် စာရင်းမကောက်ဘဲ ပြန်သွားကြသည်တဲ့...။

နောက်အမျိုးသမီးအဆောင်တစ်ခုတွင်လည်း နေထိုင်သူ ၁၂ ဦး ရှိသည့်အနက်  လောလောဆယ်တွင်  နှစ်ဦးသာရှိသဖြင့် လူစုံသည့်အချိန်တွင် လာရောက် ကောက်ယူပေးရန်  ပြောသော်လည်းစာရင်းကောက်အဖွဲ့က နောက်တစ်ကြိမ်မလာလိုတော့သဖြင့် ရှိနေသည့်သူတွေကိုပင် ကျန်လူများအတွက်ပါမေးကာ ပြီးပြီးရော စာရင်းထည့်သွားကြသည်တဲ့...။

အချက်အလက်မှန်မှန်ကန်ကန်ရရေးထက် မြန်မြန်ဆန်ဆန်ပြီးရေးကိုသာ လောပြီး ပြီးစလွယ်လုပ်နေကြသည်တဲ့။  ဆိုသည့်အခါ စိတ်ထဲအတော်မကောင်း ဖြစ်မိရသည်။

တိုင်းပြည်အတွက် အလွန်အရေးကြီးသည့် စာရင်းဇယားတစ်ခု အလွဲလွဲအချော်ချော်ဖြစ်သွားမည်ကို စိတ်မကောင်းဖြစ်ရသည်ဆိုခြင်းထက်  အဲသည်စာရင်းကို  လိုက်လံကောက်ယူနေကြသည့် စာရင်းကောက်တွေ၏ စိတ်အခြေခံစရိုက်တွေအတွက် စိတ်မကောင်းဖြစ်မိရခြင်းဖြစ်၏။

အဲသည်စာရင်းကောက်တာ ဝန်ယူထားကြသူများသည် မိမိယူထားသောတာဝန်အပေါ် အဘယ့်ကြောင့် ပေါ့ပေါ့တန်တန်နှင့်ပြီးပြီးရော ထမ်းဆောင်နေကြပါသနည်း။ ငါ့လက်ထဲရှိတာ ငါလုပ်ချင်သလိုလုပ်လို့ရသည်အတွေးမျိုးတွေ ဘာကြောင့်ဖြစ်ပေါ်နေကြပါသနည်း။ မိမိတာဝန်ယူထားပြီးသည့် အလုပ်တစ်ခုအပေါ် အဘယ့်ကြောင့် စေတနာမပါနိုင်ဘဲဖြစ်နေကြပါသနည်း။ အဲသည်လိုမျိုး ဓလေ့စရိုက်တွေနှင့် တိုင်းပြည်ဘာညာကြီးကြီးကျယ်ကျယ်တွေထိ ခဏထား ၎င်းတို့၏ တစ်ကိုယ်ရေဘဝများကိုပင် မည်သို့စနစ်တကျကောင်းမွန်အောင် တည်ဆောက်နိုင်ကြပါမည်လဲ။

စာရင်းဆိုသည်က ခုမှားလည်း နောက်အမှန်ရအောင် ကောက်ဖို့လွယ်သည်။ စိတ်အခြေခံစရိုက်ဆိုသည်က ပြင်ဖို့ခက်ပါဘိ။ တိုင်းပြည်တစ်ပြည် တိုးတက်ခြင်း၊ ဆုတ်ယုတ်ခြင်းဆိုသည်မှာ အဲသည်တိုင်းပြည်ထဲမှာ မှီတင်းနေထိုင်ကြသည့် တိုင်းသူပြည်သားတွေရဲ့ အရည်အချင်း၊ စိတ်နေ၊  ဓလေ့စရိုက်တွေပေါ်မှာ လုံးဝမှီတည်နေတာမျိုးသာဖြစ်ကြောင်း ဖတ်ထားမှတ်ထားဖူးသည်။

သို့ဆိုလျှင် ...ဟု အတွေးကို ခပ်ရှည်ရှည်ဆက်မိတော့ ရင်ထဲမှာနင်သည်။

သင်းရီ

0 အကြံပြုခြင်း: