Monday, March 24, 2014

ကရိုင်းမီးယားသိမ်းယူရေး ဥပဒေ သမ္မတပူတင် လက်မှတ်ထိုး၊ ရင်းနှီးမြှုပ်နှံသူများ ရုရှားမှထွက်ခွာ





ယူကရိန်းနိုင်ငံ ကရိုင်းမီးယားဒေသကို ရုရှားနိုင်ငံတွင်းသို့ ထည့်သွင်း ဖွဲ့စည်းရေး ဥပဒေကို သမ္မတ ဗလာဒီမာပူတင်က လက်မှတ် ရေးထိုးလိုက်ပြီး အမေရိကန်က အရေးယူ ပိတ်ဆို့မှုများ လုပ်ဆောင်ရန် ဆုံးဖြတ်လိုက်ပြီးနောက် ရင်းနှီးမြှုပ်နှံသူများ ရုရှားမှ ထွက်ခွာလျက် ရှိကြောင်း Reuters သတင်းတွင် ဖော်ပြထားသည်။

ထိုသို့ ရုရှားသမ္မတပူတင်က လက်မှတ် ရေးထိုးလိုက်ပြီး ကရိုင်းမီးယားနှင့် စီဗတ်စတိုပို အုပ်ချုပ်ရေး ဒေသသစ်နှစ်ခု ဖွဲ့စည်းလိုက်ကြောင်းကို ရုရှားနိုင်ငံပိုင် သတင်းတွင် ထုတ်လွှင့် ဖော်ပြလိုက်သည်။

ယင်းကဲ့သို့ သိမ်းပိုက်ဖွဲ့စည်းမှုကို ကရိုင်းမီးယားဒေသခံ ရုရှားလူမျိုးများက လက်ခံကြိုဆိုလိုက်ပြီး ဆင်ဖာရိုပို မြို့တော်တွင် ရုရှားလူမျိုး ထောင်ပေါင်းများစွာ စုဝေးပြီး ပျော်ပွဲရွှင်ပွဲများ ကျင်းပလျက်ရှိသည်။
“လူအများစုက ဒီလိုဖြစ်လာဖို့ လိုလားနေပါတယ်။ ရုရှားဆီ ပြန်သွားဖို့ မဟုတ်ပါဘူး။ ကျွန်တော်တို့ နိုင်ငံတော်ကြီးဆီကို ပြန်သွားဖို့ပါ။ တိုးတက်မှုတွေ ရလာမယ်။ ရုရှားဆီ ရင်းနှီးမြှုပ်နှံမှုတွေ ရလာမယ်လို့ မျှော်လင့်တယ်” ဟု ဒေသခံအသက် ၃၂ နှစ်အရွယ် အန်နာဇီဗတ်စီဗာက ပြောကြားသည်။

ရုရှားလူမျိုးများမှာ ယင်းကဲ့သို့ အောင်ပွဲခံနေကြသော်လည်း ကရိုင်းမီးယားဒေသခံ ယူကရိန်း လူမျိုးများနှင့် တာတာ လူမျိုးများသည် အိမ်တွင်းအောင်း နေထိုင်နေကြပြီး ရုရှားတပ်ဖွဲ့ဝင်များမှာ ကျူးကျော်သူများ ဖြစ်ကြောင်း ဒေသခံ ယူကရိန်းလူမျိုးတစ်ဦးက ပြောကြားသည်။

ကရိုင်းမီးယား လူဦးရေ စုစုပေါင်း၏ ၅၈ ရာခိုင်နှုန်းမှာ ရုရှားလူမျိုးများ ဖြစ်ပြီး အခြားသော လူမျိုးများမှာ ယူကရိန်းနှင့် တာတာလူမျိုးများ ဖြစ်သည်။

ရုရှားသမ္မတ ပူတင်က ကရိုင်းမီးယားဒေသကို ယင်းကဲ့သို့ သိမ်းယူလိုက်ခြင်းကို အမေရိကန်နှင့် အနောက်နိုင်ငံများက ပြင်းပြင်းထန်ထန် ကန့်ကွက်လိုက်ပြီး ပူတင်၏ အနီးကပ် လူယုံများကို အရေးယူ ပိတ်ဆို့လိုက်သည်။

၁၉၉၀ ပြည့်လွန်နှစ် စိန့်ပီတာ စဘတ်မြို့တော်ဝန်ဘဝမှ ရုရှားသမ္မတ အဖြစ်သို့ ပူတင် ရာထူးတိုးမြှင့် ရောက်ရှိလာရာ လမ်းကြောင်း တစ်လျှောက်တွင် လက်တွဲခဲ့သူများကို အမေရိကန် ပြည်ထောင်စုက အရေးယူ ပိတ်ဆို့မှုများ လုပ်ဆောင်ခဲ့သဖြင့် သံတမန်ရေးရာ ထိပ်တိုက်ရင်ဆိုင်မှုမှာ ပိုမိုနက်ရှိုင်း လာခဲ့ရသည်။

အမေရိကန် အရေးယူပိတ်ဆို့သည့် စာရင်းတွင် ရေနံနှင့်ကုန်ပစ္စည်း ရောင်းဝယ်ရေး ကုန်သည်တစ်ဦး ဖြစ်သူ ဂနဒီ၊ အာကန်ဒီ ညီအစ်ကိုများ၊ ရေနံပိုက်လိုင်း ဆောက်လုပ်ရေး ကန်ထရိုက်များနှင့် ပတ်သက်နေသည့် ဘောရစ်၊ ပူတင်၏ ဝန်ထမ်း အကြီးအကဲနှင့် လက်ထောက်၊ စစ်ထောက်လှမ်းရေး အကြီးအကဲ၊ ရထားလုပ်ငန်း အကြီးအကဲတို့ ပါဝင်သည်။

ပူတင်၏ အနီးကပ် လူယုံများက အမေရိကန် ပြည်ထောင်စု၏ အရေးယူမှုကို လှောင်ပြောင်ခဲ့ကြသော်လည်း မော်စကို စတော့ဈေးနှုန်းများမှာ အမေရိကန် ပြည်ထောင်စုက ရုရှားအဓိက စီးပွားရေး နယ်ပယ်များကို အရေးယူ ပိတ်ဆို့မည်ဟု ခြိမ်းခြောက်လိုက်ပြီးနောက် သိသိသာသာ လျော့ကျသွားသည်။

ထို့အပြင် ရုရှားနှင့် ဆက်ဆံရေးကို ကမ္ဘာ့နိုင်ငံများက ပြန်လည် ဆန်းစစ်နေပြီး ကရိုင်းမီးယားဒေသ ပြင်ပသို့ ရုရှားတပ်ဖွဲ့ဝင်များ မစေလွှတ်ရန် အမေရိကန်သမ္မတ အိုဘားမား၏ အမျိုးသားလုံခြုံရေး အကြံပေးက သတိပေးလိုက်သည်။

ရုရှားစွမ်းအင်အပေါ် အဓိကမှီခိုနေမှု (ဥရောပရေနံနှင့် သဘာဝဓာတ်ငွေ့ သုံးစွဲမှုစုစုပေါင်း သုံးပုံတစ်ပုံ ရုရှား ထောက်ပံ့ထားခြင်း) ကို လျှော့ချသွားမည်ဟု ဥရောပနိုင်ငံများက ပြောကြားလိုက်ပြီး ယူကရိန်းရှိ ကြားဖြတ် အစိုးရအဖွဲ့ကို ထောက်ခံကြောင်း ဥရောပသမဂ္ဂ အဖွဲ့ဝင် ၂၈ နိုင်ငံက ထုတ်ပြန်လိုက်သည်။

ခရိုင်းမီးယားက ယူကရိန်းရဲ့ နောက်ဆုံး စစ်အခြေစိုက်စခန်း ရုရှားသိမ်းပိုက်
=======================================

ခရိုင်းမီးယား ဒေသက နောက်ဆုံး ကျန်နေသေးတဲ့ အဓိက ယူကရိန်း စစ်စခန်းကို ရုရှားတပ်တွေက သိမ်းလိုက်ပါပြီ။ ရုရှားတပ်ဖွဲ့တွေဟာ သေနတ်တွေ ပစ်ဖောက်ပြီး သံချပ်ကာကားတွေနဲ့ Belbek လေတပ်အခြေစိုက်စခန်းရဲ့ ဂိတ်တွေကို စနေနေ့ က ချိုးဖျက် ဝင်ရောက်ခဲ့ကြတာပါ။

ယူကရိန်းတပ်ဖွဲ့တွေက မခုခံခဲ့ပါဘူး။ သူတို့လက်နက်တွေကို လက်နက်တိုက်ထဲ မထည့်ခင်မှာ ယူကရိန်းစစ်သားတွေက သူတို့ နိုင်ငံတော်သီချင်းကို သီဆိုခဲ့ကြပါတယ်။ ယူကရိန်းစစ်သားတစ်ဦးထက်မနည်း ဒဏ်ရာရခဲ့ပါတယ်။

စစ်စခန်းသိမ်းတာကို သတင်းယူတဲ့ သတင်းထောက်နဲ့ ကင်မရာသမားတချို့ကို ရုရှားစစ်သားတွေက ကြမ်းကြမ်းတမ်းတမ်း ပြုမူဆက်ဆံပြီး ပစ္စည်းကိရိယာတွေကို သိမ်းယူခဲ့ပါတယ်။

Belbek လေတပ်စခန်းဟာ ခရိုင်းမီးယားကို ရုရှားက သိမ်းလိုက်တာမှာ နောက်ဆုံးကျန်နေသေးတဲ့ အဓိက စစ်စခန်းဖြစ်ပါတယ်။

စနေနေ့တရက်ထဲမှာပဲ ရုရှားလိုလားသူတွေက Novofedorovka မှာရှိတဲ့ ယူကရိန်းရေတပ်စခန်းထဲ အတင်းဝင်ရောက်ဖို့ ကြိုးစားခဲ့ကြပါသေးတယ်။ ယူကရိန်းတွေဘက်က မီးခိုးဗုံးတွေသုံးပြီး တုံ့ပြန်ခဲ့ပါတယ်။ အခုထိတော့ လူအုပ်က စခန်းကို သိမ်းလိုက်သလားဆိုတာ ရှင်းရှင်းလင်းလင်း မသိရသေးပါဘူး။

VOA

0 အကြံပြုခြင်း: