Friday, February 28, 2014

အခွင့်ထူးခံတွေဆီက ဒီလိုအခွန်တွေ မကောက်တော့ဘူးလား



Eleven Media Group

မကြာသေးမီက အခွန်စိစစ်ကြပ်မတ်ရေး ဘုတ်အဖွဲ့က ရပ်ကွက်ထဲ၊ ဈေးများထဲအထိ အခွန်ကောက်ခံမည်ဟု ထုတ်ဖော်ပြောကြားခဲ့သည်။

အောက်ခြေတွင် ရရှိမည့်အခွန်များ လစ်ဟင်းမှုမရှိစေရန် ကောက်ခြင်းဖြစ်ပြီး အခြေခံပြည်သူများ အခွန်မပေး၍ နိုင်ငံတော်အခွန်လည်း နစ်နာနေသည့်အတွက် ကောက်သည်ဟု အကြောင်းပြချက် ပေးထားသည်။

ဘေးကျပ်နံကျပ် ပြည်သူ

တစ်လကျပ် ၁၂ဝဝဝဝ၊ တစ်ရက် ကျပ် ၄ဝဝဝ အထက် ဝင်ငွေရှိသော အခြေခံပြည်သူများထံမှ ဝင်ငွေခွန် ကောက်ခံသည့် နိုင်ငံမှာ အာဆီယံနိုင်ငံများအတွင်း မြန်မာတစ်နိုင်ငံ တည်းသာရှိသည်။

၎င်းအပြင် နိုင်ငံ့ဝန်ထမ်းများကိုလည်း အလွတ်မပေးဘဲ လစာထဲမှ ဝင်ငွေခွန်ကိုလည်း ကောက်ယူလျက်ရှိသည်။

ယခု အိမ်ဆိုင်လေးများနှင့် ဈေးသည်လေးများပင် ကုန်သွယ်လုပ်ငန်းခွန်ကို မလွတ်တမ်း ကောက်ခံမည် ဆိုသည့်အတွက် မလွတ်တမ်း ပေးဆောင်ကြရတော့မည်။

ဝင်ငွေဥပဒေအတိုင်း တိတိကျကျ ကောက်မည်ဆိုပါက ဆိုက်ကားသမားများ၊ တက္ကစီယာဉ်မောင်းများ အထိပင် ဝင်ငွေခွန် ပေးဆောင်ရမည်ဖြစ်ရာ အခြေခံပြည်သူများအတွက် နောက်ထပ်ဘေးကျပ် နံကျပ်ဖြစ်စရာ တစ်ခုထပ်တိုး လာတော့မည်ဖြစ်သည်။

ပန်းပန်ဆဲ ခရိုနီ

၂ဝ၁၃ ခုနှစ် ဒီဇင်ဘာ ၂၁ ရက်က Myanmar Peace Center တွင်ကျင်းပသည့် ဆွေးနွေးတစ်ခု၌ နိုင်ငံတော်သမ္မတရုံး ပြည်ထောင်စုဝန်ကြီး တစ်ဦးဖြစ်သူ ဦးအောင်မင်းက ငြိမ်းချမ်းရေး အဖွဲ့များသို့ ကားလိုင်စင် ထုတ်ပေးထားမှုမှာ အစီးရေ ၁၁၁ဝ ဖြစ်ကြောင်း တရားဝင်ထုတ်ပြန်ခဲ့သည်။

အခွန်မဲ့ဖြင့် ကားအစီးရေ ၃၇ဝ၊ ရာခိုင်နှုန်း ၆ဝ သာ အခွန်ဆောင်ရမည့် ကားအစီးရေက ၇၄ဝ စုစုပေါင်း ၁၁၁ဝ ဖြစ်သည်ဟု ထုတ်ဖော်ပြောကြား ခဲ့ခြင်းဖြစ်သည်။

ငြိမ်းချမ်းရေးအတွက်ပေးသည့် ကားပါမစ်များဟု ဆိုသော်လည်း ငြိမ်းချမ်းရေးအဖွဲ့များမှ တစ်စောင် သိန်း ၅ဝဝ မှ ကျပ်သိန်း ၁၅ဝဝ အထိသာ (နောက်ဆုံးဈေး တစ်စောင်ကျပ်သိန်း ၁၅၅ဝ) ရရှိခဲ့သည်။

ကြားပွဲစားများမှတစ်ဆင့် ပါမစ်ရရှိသွားသည့် လုပ်ငန်းရှင်တစ်စုမှာမူ အခွန်အရပ်ရပ် ကင်းလွတ်ခွင့်၊ ၆ဝ ရာခိုင်နှုန်းသာ အခွန်ပေးရမည့် အခွင့်အရေးကို အပြည့်အဝ အသုံးချပြီး အနိမ့်ဆုံး အမေရိကန်ဒေါ်လာ ၁ဝဝဝဝဝ ဝန်းကျင်မှ အမြင့်ဆုံး အမေရိကန်ဒေါ်လာ ၅ဝဝဝဝဝ ဝန်းကျင်အထိ တန်ဖိုးရှိသော BMW, Lexus, Bentley, Lamborghini, Rolls-Royce ကဲ့သို့ ဘယ်မောင်း ကားသစ်များအထိ တင်သွင်းစီးနင်း ခဲ့ကြသည်ဖြစ်ရာ ငြိမ်းချမ်းရေးကားပါမစ် ဆိုသည်မှာ လူတစ်စု ပန်းပန်ရန် အတွက်သာ ဖြစ်ခဲ့သည်။

ကားအစီး ၁၁၁၀၊ ငြိမ်းချမ်းရေးနဲ့ ပြည်သူက လက်ဗလာ၊ ခရိုနီတွေအိတ်ထဲ ထည့်သွားတဲ့အခွန်ငွေ ဘယ်လောက်လဲ

အနိမ့်ဆုံး အမေရိကန်ဒေါ်လာ ၁ဝဝဝဝဝ ဝန်းကျင်ရှိသည့် Lexus, BMW ကား အမျိုးအစားအတွက် အခွန်ပေးဆောင် တင်သွင်းမည်ဆိုလျှင် အခွန်အရပ်ရပ် ကျပ်သိန်းပေါင်း ၁၁ဝဝ မှ ၂ဝဝဝ နီးပါးအထိ ပေးဆောင်ရမည်ဖြစ်ပြီး စုစုပေါင်း ကျပ်သိန်းပေါင်း ၁၉ဝဝ ဝန်းကျင် ကျသင့်မည်ဖြစ်သည်။

အမေရိကန်ဒေါ်လာ ၅ဝဝဝဝဝ ဝန်းကျင် အထိရှိသည့် Rolls-Royce ကား တစ်စီးအတွက် ပေးဆောင်ရမည့် အခွန်ငွေအရပ်ရပ်မှာ တစ်စီးလျှင် ကျပ်သိန်းပေါင်း ၈၅ဝဝ ကျော်အထိ ပေးဆောင်ရပြီး စုစုပေါင်းကျပ်သိန်းပေါင်း ၁၃၅ဝဝ နီးပါးအကုန်အကျခံမှ စီးနင်းခွင့်ရမည်ဖြစ်သည်။ ထို့အတွက် အခွန်အရပ်ရပ် ကင်းလွတ်ခွင့် တင်သွင်းသည့် ကားအစီးရေ ၃၇ဝ တစ်ခုတည်းအတွက်ပင် အနည်းဆုံး အခွန်ငွေ ကျပ် ၁၂၂ ဘီလျံမှ အများဆုံးကျပ် ဘီလျံ ၉ဝဝ ဝန်းကျင်အထိ နစ်နာသွားသည်။

အခွန်မဲ့အစီး ၃၇ဝ အပါအဝင် ရာခိုင်နှုန်း ၆ဝ သာ အခွန်ဆောင်ရမည့် အစီးများ အပါအဝင် စုစုပေါင်းအစီးရေ ၁၁၁ဝ အတွက်ဆိုလျှင် နိုင်ငံတော်ကရမည့် အခွန်ငွေမည်မျှ နစ်နာသွားမည်ကို မှန်းဆကြည့်နိုင်ပေသည်။

ငြိမ်းချမ်းရေး အဖွဲ့များအနေဖြင့်လည်း ကားပါမစ်မှရငွေမှာ ကျပ်ဘီလျံ ၅ဝ ကျော်မှ ၁ဝဝ ဝန်းကျင်အထိသာ ရရှိခဲ့ပြီး နစ်နာခဲ့ရပြန်သည်။ (အချို့အဖွဲ့များ တစ်စောင်လျှင် ကျပ်သိန်း ၂ဝဝ ဖြင့်သာ ရောင်းချခဲ့မှုများရှိပြီး အမြင့်ဆုံးနှုန်းဖြင့် တွက်ထားခြင်းဖြစ်သည်)

9E\1000 ကျော်ကားများအတွက် ပြည်သူအချို့ပေးတဲ့ နာမည်သစ်

ငြိမ်းချမ်းရေးပါမစ်ဖြင့် တင်သွင်းလာသည့် ကားများကို စီးနင်းနေသူ အများစုမှာ ယခင်အစိုးရ၊ ယခုအစိုးရလက်ထက် ခရိုနီ လုပ်ငန်းရှင်ကြီးများ၊ ဝန်ကြီးသားသမီး ဆွေးမျိုးများ ဖြစ်ကြသည်။

၎င်းတို့အားလုံးနီးပါးသည် လူတစ်ဦး၊ တစ်စုလျှင် ကုမ္ပဏီပေါင်း ၂ဝ ကျော်မှ ၃ဝ နီးပါးအထိ ပိုင်ဆိုင်လုပ်ကိုင် ကြသော်လည်း ကုမ္ပဏီတစ်ခု၊ နှစ်ခုအတွက်သာ အခွန်ဆောင်ပြထားသူများ ဖြစ်ကြသည်။

“ငြိမ်းချမ်းရေး ကားပါမစ်နဲ့ သွင်းတဲ့ကားတွေကို 9E\1000 ကျော် နံပါတ်တွေပေးတယ်။ စီးတဲ့သူတွေ အားလုံးကလည်း အရင်လက် ထက်ရော၊ အခုလက်ထက်မှာပါ နိုင်ငံတော် သွင်းရမယ့် အခွန်တွေမသွင်းဘဲနဲ့ လုပ်ရင်း ချမ်းသာလာတဲ့ သူတွေများတယ်။ နိုင်ငံတော်သွင်းရမယ့် အခွန်မသွင်းတဲ့ သူတွေက ထပ်ပြီး အဲဒီငွေတွေနဲ့ ကျပ်သိန်းပေါင်း ၁၄ဝဝဝ လောက်တန်တဲ့ကားကို ကျပ်သိန်းပေါင်း ၅ဝဝဝ လောက်နဲ့ အခွန်ရှောင်ပြီး ထပ်စီးတာလေ။ အဲဒါကြောင့် ကျွန်တော်တို့ အသိုင်း အဝိုင်းမှာတော့ ဟိုဘက်မှာလည်း ခိုး၊ ဒီဘက်မှာလည်း အခွန်ထပ်ခိုးထားတဲ့ ကားတွေဆိုတော့ သူခိုးကားလို့ နာမည်ပြောင်ပေး ထားတယ်”ဟု ကားဝယ်ရောင်း ကိုဝင်းထွဋ်က ပြောကြားသည်။

ပြည်သူတွေရဲ့ ပြောကြားချက်

“ပြန်ကောက်ရမှာပါ။ ငြိမ်းချမ်းရေး ကားပါမစ်တချို့ကို ဝယ်ယူဖူးတဲ့သူတွေ ရှိပါတယ်။ သူတို့တွေက တန်ဖိုးနည်းကားတွေ သွင်းကြတာပါ။ အဲဒီလိုဝယ်တဲ့အခါ အာမခံချက် ၄ ချက်ကို လက်မှတ်ထိုးရပါတယ်။ အဲဒီ ၄ ချက်ထဲမှာ အခွန်ပြန်ကောက်ရင် ပေးဆောင်ပါမယ်ဆိုတဲ့ အချက်ပါတယ်။ အခုငြိမ်းချမ်းရေးပါမစ်နဲ့ သွင်းတဲ့ကားတွေက ကိုယ်ပိုင်အမည်ပေါက်တွေနဲ့လုပ်ပြီး စီးကြတာ။ သူတို့ရော အဲဒီလိုဝန်ခံချက်လက်မှတ် မထိုးရဘူးလား။ ငြိမ်းချမ်းရေး အဖွဲ့အမည်နဲ့ မဟုတ်တဲ့အတွက် အခွန်ပြန်ကောက်ရပါမယ်။ ရပ်ကွက်ထဲအထိ ဈေးထဲအထိ အခွန်လိုက်ကောက်မယ့် အချိန်မှာ ဒီလိုအခွန်ငွေ ကျပ်သိန်းပေါင်းများစွာ ရှောင်ကွင်းစီးနင်း အခွင့်ထူးခံတာမျိုးကတော့ မရှိသင့်ဘူး။ ငြိမ်းချမ်းရေးအဖွဲ့တွေ ထိုက်တန်အောင် ရတယ်ဆိုရင်တော့ တစ်မျိုးပါ။ အခုက အဖွဲ့လည်းမရ၊ နိုင်ငံတော်လည်း အခွန်နာတယ်”ဟု ကားဆောင်းပါးရှင် အရည်ကျိုက သုံးသပ်ပြောကြားသည်။

စက်မှုလုပ်ငန်းရှင် ဦးကျော်သူက“နိုင်ငံတစ်နိုင်ငံမှာ ဥပဒေတစ်ခုပဲ ရှိသင့်တယ်။ သူ့တို့ကျတော့ လွှတ်ပေး၊ ပြည်သူကျ ကောက်တယ်ဆိုရင် ဥပဒေမဟုတ်ဘူး။ ရေရှည်မှာ ဒါတွေက ထောက်စရာတွေ များလာလိမ့်မယ်။ အဲဒီလိုဆိုရင် သူတို့ကလည်း လုပ်ချင်တာလုပ်၊ ပြည်သူကလည်း လုပ်ချင်တာလုပ် ဖြစ်လာမှာပေါ့။ ကျွန်တော့်အမြင်အရတော့ အမည်ပေါက်နဲ့ စီးနေတဲ့ ကားတွေကို ဥပဒေအရ ပြန်ကောက်သင့်တယ်။ အခြေခံ ပြည်သူဆီကပဲ လည်ပင်းညှစ်ပြီး တစ်ဖက်သူတို့လို လူမျိုးတွေကျ လွတ်နေမယ်ဆိုရင် ဒါဥပဒေလို့ မခေါ်ဘူးလို့ ကျွန်တော်မြင်တယ်”ဟု သုံးသပ်သည်။

ရန်ကင်းမြို့နယ်နေ ဆောက်လုပ်ရေးလုပ်ငန်း လုပ်ကိုင်နေသည့် ကိုညွန့်ကလည်း “အရင်ဆုံးပြောချင်တာက ပြည်သူဆီက မကောက်ခင် အခွင့်ထူးခံတွေဆီက အရင်ရအောင် ကောက်ကြည့်ပါ။ ဘယ်နေရာဖြစ်ဖြစ် မျှတဖို့လိုတယ်။ ရပ်ကွက်ထဲအထိ လမ်းဘေး ဈေးသည်ကအစ အခွန်လိုက်မကောက်ခင် ဒီလိုအခွင့်ထူးခံတွေဆီက ရအောင် ပြန်ကောက်ကြည့်ဖို့ပါပဲ”ဟု ပြောကြားသည်။

“အခြေခံ ပြည်သူတစ်ယောက် ဈေးအသက်သာဆုံး ၁၃ဝဝ စီစီ ကားတစ်စီးဝယ် စီးရင်တောင် ကျပ် သိန်း ၅ဝ ကျော်လောက် အခွန်ပေးစီးရတယ်။ ငြိမ်းချမ်းရေးအဖွဲ့တွေ ထိုက်တန်အောင် ရသလား။ အဖွဲ့တွေလည်း မရ နိုင်ငံတော်ကလည်း အခွန်ကျပ်ဘီလျံပေါင်း အများကြီးနာသွားပြီ။ နောက်ဆုံး လူတစ်စုက အခွန်ကျပ်သိန်းထောင်ချီ ကင်းလွတ်ခွင့်နဲ့ စီးနင်းနေတာ မျိုးကတော့ ပြန်ကောက်ဖို့လိုတယ်”ဟု ကားလုပ်ငန်းရှင် ဦးမိုးကျော်စွာက ဆိုသည်။

“နိုင်ငံသားတိုင်း အခွန်ပေးဆောင်ရမယ့် တာဝန်ရှိတဲ့အတွက် မည်သူမဆို အခွန်ပေးရမယ်။ ပုရွက်ဆိတ်လည်း ပုရွက်ဆိတ် အလျောက်၊ ဆိတ်လည်း ဆိတ်အလျောက်၊ ဆင်လည်း ဆင်အလျောက် ဘယ်သူမဆို အခွန်ဆောင်ရမယ်။ ဆင်က ဆိတ်လောက်ပဲ အခွန်ဆောင်တာ၊ ဆိတ်က ပုရွက်ဆိတ် လောက်ပဲ အခွန်ဆောင်တာမျိုး မဖြစ်အောင် အားလုံးတစ်ပြေးညီရအောင် အခွန်ကောက်သင့်ပါတယ်။ မျှတမှု ရှိရပါမယ်”ဟု မြန်မာနိုင်ငံ ငါးလုပ်ငန်းအဖွဲ့ချုပ် အတွင်းရေးမှူး ဦးဝင်းကြိုင်က အခွန်နှင့်ပတ်သက်၍ ပြောပြ သည်။

မိတ္ထီလာမြို့မှ ဆိုင်လုပ်ငန်းလုပ်ကိုင်သူ ကိုကျော်နိုင်ဝင်းက “အခြေခံပြည်သူတွေ တကယ့်လက်တွေ့ဘဝကို သိချင်ရင် ဆင်းကြည့်လိုက်ပေါ့။ အမြဲတမ်း အခြေခံ ပြည်သူတွေ အိတ်ကပ်ထဲက ဘယ်လိုညှစ်ထုတ်ပြီး ခရိုနီနဲ့ လူတစ်စုကျ အခွင့်အရေးတွေရ၊ အခွန်ပြန်မဆောင်၊ ရအောင်လည်း မတောင်းဘူး။ အခု ငြိမ်းချမ်းရေး အမည်ပေါက်နဲ့ မဟုတ်ဘဲ ကိုယ်ပိုင်အမည်နဲ့ စီးနေတဲ့သူတွေ ရှက်တတ်ရင် ကိုယ့်အသိစိတ်နဲ့ကိုယ်တောင် လာဆောင်သင့်တယ်။ ကောက်ရမယ့် သူတွေကလည်း သူများပြောမှမဟုတ်ဘူး။ ရှက်တတ်ရင် အရင်ကတည်းက ကောက်ထားသင့်တယ်။ ထစ်ခနဲရှိ အခြေခံပြည်သူဆီကပဲ ဆိုတာမျိုး များလာရင်တော့ပေါက်ကွဲဖို့ပဲ ကျန်တော့တယ်။ ပြည်သူတွေအားလုံး အခွန်ဆောင်ရမှာ မှန်တယ်၊ အခွင့်ထူးခံတွေမရှိအောင် လုပ်ပြဖို့တော့ လိုတယ်”ဟု ပြောကြားသည်။

“နိုင်ငံတကာမှာ သာသနာရေး၊ ဘုန်းကြီးကလွဲပြီး ကျန်တာအကုန် အခွန်ကောက်တယ်။ အားလုံး အခွန်ကောက်ရပါမယ်”ဟု Farmer Auto မှ ဒေါက်တာစိုးထွန်းကလည်း ပြောကြားသည်။

9E\1000 ကျော်ကားတွေ ဥပဒေအရ အခွန်ပြန်ပေးရမည်

ကားတစ်စီးတင်သွင်းလျှင် အကောက်ခွန်၊ ကုန်သွယ်လုပ်ငန်းခွန်၊ ကညန မှတ်ပုံတင်ကြေး သုံးမျိုးအား အခွန်ပေးဆောင် စီးနင်းရန် သတ်မှတ်ထားသည်။

ကုန်သွယ်လုပ်ငန်းခွန်နှင့် အကောက်ခွန်မှာ တည်ဆဲဥပဒေအရ ပြဋ္ဌာန်းထားသည့် အခွန်နှုန်းများဖြစ်ပြီး မည်သူမျှ အခွန်ကင်းလွတ်ခွင့် မရှိချေ။ ကညန မှတ်ပုံတင်ကြေးမှာမူ ဥပဒေအရ ပြဌာန်းထားခြင်း မဟုတ်သည့်အတွက် ငြိမ်းချမ်းရေး ခေါင်းစဉ်ဖြစ်၍ လည်းကောင်း၊ ပါမစ်ဝယ်ယူကုန်ကျ စရိတ်အဖြစ် လည်းကောင်း လျှော့ပေါ့သက်သာ၍ရသည်။

ထို့အတွက် ဥပဒေအရ 9E\1000 ကျော် ကားများ၊ ငြိမ်းချမ်းရေးပါမစ်ဖြင့် တင်သွင်းထားသည့် ကားများအားလုံး ကုန်သွယ် လုပ်ငန်းခွန်နှင့် အကောက်ခွန်ကို ပြန်လည်ကောက်ခံ သင့်သည်ဟုလည်း လုပ်ငန်းရှင်အချို့က ပြောကြားသည်။

ကုန်သွယ်လုပ်ငန်းခွန်နှင့် အကောက်ခွန်နှစ်မျိုးကို ပြန်လည်ကောက်ခံခြင်းဖြင့် ကားတစ်စီးလျှင် အနိမ့်ဆုံး ကျပ် ၅၁၄ သိန်းမှ အမြင့်ဆုံး ကျပ်သိန်း ၃၆ဝဝ ကျော်အထိရရှိ မည်ဖြစ်ပြီး ပျမ်းမျှတစ်စီးလျှင် ကျပ်သိန်း ၂ဝဝဝ ဝန်းကျင်ပြန်လည် ရရှိနိုင်သည့်အတွက် ကားအစီး ၁ဝဝဝ ကျော်အတွက်ဆိုပါက ကျပ်ဘီလျံ ၂ဝဝ ကျော်အထိ နိုင်ငံအတွက် ပြန်လည်ရရှိမည်ဖြစ်သည်။

“ငြိမ်းချမ်းရေးအတွက်လည်း ဖြစ်တယ်၊ တစ်ဖက်မှာ ပါမစ်ဝယ်ရတဲ့ ကုန်ကျစရိတ် ကလည်းရှိတယ်။ အဲဒီအတွက် ကညန မှတ်ပုံတင်ကြေးကို သုညရာခိုင်နှုန်း ပေးလို့ရပါ တယ်။ ဒါပေမဲ့ အကောက်ခွန်နဲ့ ကုန်သွယ်လုပ်ငန်းခွန်ကတော့ ဥပဒေအရ ပြဋ္ဌာန်းထားတာ ဖြစ်လို့ ဘယ်သူမှလည်း ကင်းလွတ်ခွင့်မရပါဘူး။ ငြိမ်းချမ်းရေးပါမစ် ဝယ်ဖူးတဲ့သူ တွေသိပါတယ်။ အခွန်ပြန်ကောက်ရင် ပေးပါမယ်ဆိုတဲ့ အာမခံချက် လက်မှတ်ထိုးရတဲ့ ပါမစ်မျိုး ဝယ်ဖူးတဲ့သူတွေရှိပါတယ်။ ဒီလို အာမခံချက်ထိုးပြီးမှ ကိုယ်ပိုင်အမည်ပေါက် လုပ်ကြပါတယ်။ အခုလည်း ငြိမ်းချမ်းရေးအဖွဲ့ အမည်နဲ့ မဟုတ်တဲ့ ကား၊ ကိုယ်ပိုင်အမည် ဖောက်ထားတဲ့ကားတွေဆိုရင် ကုန်သွယ်လုပ် ငန်းခွန်နဲ့ အကောက်ခွန်ကို ပြန်ကောက်လို့ ရပါတယ်”ဟု ကိုအရည်ကျိုက ဆက်လက် ပြောကြားသည်။

Distinct Trading မှ ကိုထွဋ်ထိပ်က “ကားသွင်းစီးတဲ့သူတိုင်း ဥပဒေအတိုင်း အခွန်အတိအကျ ပေးဆောင်ပြီး ပြည်သူတွေ စီးကြတာပါ။ ငြိမ်းချမ်းရေး အဖွဲ့အစည်းအမည်နဲ့ အသုံးပြုတာကတော့ ကင်းလွတ်ခွင့် ပေးလို့ရ ပါတယ်။ ကိုယ်ပိုင်အမည်ပေါက်နဲ့ စီးတဲ့သူတွေကိုတော့ ကုန်သွယ်လုပ်ငန်းခွန် ၂၅ ရာခိုင်နှုန်း၊ အကောက်ခွန် ရာခိုင်နှုန်း ၄ဝ၊ တွက် နည်းအရဆိုရင် စုစုပေါင်း ၇၅ ရာခိုင်နှုန်း လောက်ကျမယ်။ ဒါကိုတော့ ဥပဒေအရ ပြ|ာန်းထားတဲ့အတိုင်း ပေးဆောင်သင့်တယ်။ အခုစီးနေတဲ့ သူတွေကလည်း ဒီပမာဏကို ပေးနိုင်တဲ့သူတွေချည်းပါပဲ”ဟု ဆိုသည်။

လူတစ်ဦး၊ လူတစ်စုတည်း ကုမ္ပဏီ ၂ဝ မှ ၃ဝ အထိ တည်ထောင်လုပ်ကိုင်နေသူများ က ကုမ္ပဏီတစ်ခု၊ နှစ်ခုအတွက်သာ အခွန် ဆောင်ပြပြီး ဒီမိုကရေစီခေတ်သို့ လျှောက်လှမ်းနေသည့်တိုင် ကြီးမားစွာ အခွန်ရှောင် ခြင်း၊ ရှောင်ရန် အခွင့်အရေး ပေးထားခြင်းများ ရရှိနေသည့် အခွင့်ထူးခံများ ရှိနေသမျှ နိုင်ငံသည်လည်း တိုးတက်မည့်ဘက်သို့ ဦးတည်မည် မဟုတ်ပေ။

မျှတသည့်အခွန်စနစ်သို့ သွားလိုလျှင် အခွင့်ထူးခံများထံမှ ယခုကဲ့သို့ လက်တစ်လုံးခြား အခွန်ရှောင်တိမ်းမှု၊ အခွန်ရှောင်တိမ်းရန် အခွင့်အရေး ပေးထားသည့် ရင်းနှီးမြှုပ်နှံမှု ဥပဒေကဲ့သို့သော အခြေအနေများကို ပြန်လည်ပြင်ဆင်ပြီး လုပ်ဆောင်မှသာ ရရှိမည်ဖြစ်သည်။

ကားအမျိုးအစားအလိုက် ဥပဒေအရ ပြန်လည်ကောက်ခံသင့်သည့်အခွန်ပမာဏ

(ကားအမျိုးအစား=Rolls-Royce Phantom 2013, ကားတန်ဖိုး=၄၉၀၀ သိန်း, အကောက်ခွန်=၁၉၆၀ သိန်း, ကုန်သွယ်ခွန်=၁၇၁၅ သိန်း, စုစုပေါင်းအခွန်=၃၆၇၅ သိန်း)

(ကားအမျိုးအစား=Rolls-Royce Phantom 2013, ကားတန်ဖိုး=၃၉၂၀ သိန်း, အကောက်ခွန်=၁၅၆၈ သိန်း, ကုန်သွယ်ခွန်=၁၃၇၂ သိန်း, စုစုပေါင်းအခွန်=၂၉၄၀ သိန်း)

(ကားအမျိုးအစား=Rolls-Royce Ghost 2013, ကားတန်ဖိုး=၂၄၅၀ သိန်း, အကောက်ခွန်=၉၈၀ သိန်း, ကုန်သွယ်ခွန်=၈၅၇ သိန်း, စုစုပေါင်းအခွန်=၁၈၃၇ သိန်း)

(ကားအမျိုးအစား=Bentley Mulsanne 2013, ကားတန်ဖိုး=၂၉၄၀ သိန်း, အကောက်ခွန်=၁၁၇၆ သိန်း, ကုန်သွယ်ခွန်=၁၀၂၉ သိန်း, စုစုပေါင်းအခွန် ၂၂၀၅ သိန်း)

(ကားအမျိုးအစား=Bentley Continental 2013, ကားတန်ဖိုး=၂၆၄၆ သိန်း, အကောက်ခွန်=၁၀၅၈ သိန်း, ကုန်သွယ်ခွန်=၉၂၆ သိန်း, စုစုပေါင်းအခွန်=၁၉၈၄ သိန်း)

(ကားအမျိုးအစား=Lamborghini Avendator 2013, ကားတန်ဖိုး=၃၈၂၂ သိန်း, အကောက်ခွန်=၁၅၂၉ သိန်း, ကုန်သွယ်ခွန်=၁၃၃၇ သိန်း, စုစုပေါင်းအခွန် ၂၈၆၆ သိန်း)

(ကားအမျိုးအစား=Lamborghini Gallardo 2013, ကားတန်ဖိုး=၂၄၅၀ သိန်း, အကောက်ခွန်=၉၈၀ သိန်း, ကုန်သွယ်ခွန်=၈၅၇ သိန်း, စုစုပေါင်းအခွန်=၁၈၃၇ သိန်း)

(ကားအမျိုးအစား=Lexus 2013, ကားတန်ဖိုး=၆၈၆ သိန်း, အကောက်ခွန်=၂၇၄ သိန်း, ကုန်သွယ်ခွန်=၂၄၀ သိန်း, စုစုပေါင်းအခွန်=၅၁၄ သိန်း)

(ကားအမျိုးအစား=BMW M3 2013, ကားတန်ဖိုး=၆၈၆ သိန်း, အကောက်ခွန်=၂၇၄ သိန်း, ကုန်သွယ်ခွန်=၂၄၀ သိန်း, စုစုပေါင်းအခွန်=၅၁၄ သိန်း)

မှတ်ချက်။ ။Lexus နှင့် Bentley Continental Flying Spur ဈေးနှုန်းများမှာ ကားတန်ဖိုးအမှန်ဈေးပေါ်တွင် တွက်ချက်ထားခြင်း မဟုတ်ဘဲ CIF ဈေးနှုန်းပေါ်တွင်သာ တွက်ချက်ထားခြင်းဖြစ်ပြီး စုစုပေါင်းတန်ဖိုးမှာ ဖော်ပြထားသည့်ပမာဏထက် ပိုမည်ဖြစ်သည်။ တင်သွင်းမှုများသည့် ကားအမျိုးအစား အချို့ကိုသာ ဖော်ပြထားခြင်းဖြစ်သည်။ ကုန်သွယ်လုပ်ငန်းခွန်နှင့် အကောက်ခွန်တို့မှာ ဥပဒေအရပြဋ္ဌာန်းထားခြင်းဖြစ်၍ ပြန်လည်ကောက်ခံသင့်သည့် အခွန်များဖြစ်သည်။

(ရန်ကုန်မြို့တွင်း စီးနင်းနေသည့် Rolls-Royce ကားတစ်စီးကိုတွေ့ရစဉ်)

0 အကြံပြုခြင်း: