Tuesday, October 29, 2013

နိုင်ငံရေးဆွေးနွေးပွဲကြီးမှ ဖွဲ့ စည်းပုံအခြေခံဥပဒေသာ ပေါ်ပေါက်မည်





ကုန်ခဲ့ သော အောက်တိုဘာ-၂၆-ရက် နေ့ တွင် ကရင်အမျိုးသားစည်းရုံးရေးအဖွဲ့ နှင့် သျှမ်းပြည်ငြိမ်းချမ်းရေးကောင်စီတို့ ၏ ဆွေးနွေးပွဲမှ ကြေညာချက်ကို လက်ခံဖတ်ရှူရရှိသည် ။ ၄င်းတို့ ၏
ကြေညာချက်၌ မုဘောင်-၅-ချက်ကို ဖေါ်ပြထားသည် ။ ပထမအချက်၌ နိုင်ငံရေးဆွေးနွေးပွဲတွင် လက်နက်ကိုင်အဖွဲ့ အစည်းများအားလုံး ၊ နိုင်ငံရေးပါတီများ ၊ လူမှုအဖွဲ့ အစည်းများ ၊ လွှတ်တော်အမတ်များ ၊ ဗမာ့တပ်မတော် ၊ အစိုးရစသည်တို့ ပါဝင်ရမည် ။ စတုတ္ထအချက်တွင် နိုင်ငံရေးဆွေးနွေးပွဲ၌ အခြေခံဥပဒေ ၊ အာဏာခွဲဝေမှု ၊ လုံခြုံရေး ၊ မြေယာခွဲဝေမူ ၊ သယံဇါတခွဲဝေမှု စသည့်အရေးကြီးသော အချက်အလက်များ ပါဝင်မည် ဟု တွေ့ ရှိရသည် ။ ဤနိုင်ငံရေးဆွေးနွေးပွဲကြီးကို တစ်နိုင်ငံလုံး အပစ်အခတ်ရပ်စဲရေး လက်မှတ်ထိုးပြီး -၂-လအတွင်း နိုင်ငံရေးမူဘောင်ကို စတင်ဆွေးနွေးရန်နှင့် -၄-လအတွင်း ကျင်းပရန်ဟုလည်း ကြေညာချက်၌ ဖေါ်ပြထားသည် ။

မြန်မာနိုင်ငံတွင် လွပ်လွပ်ရေးရရှိပြီး -၁၉၄ရ-ခုနှစ် နိုင်ငံတော်ဖွဲ့ စည်းအုပ်ချုပ်ပုံ အခြေခံဥပဒေသည် စစ်အာဏာရှင် စနစ်ကို သေချာလှပ တိကျစွာ ဖန်တီးထားခဲ့ သော ဗိုလ်ချုပ်နေ၀င်းကြောင့် ပျက်စီးသွားရသည် ။ ယခုအချိန်ထိ လွပ်လွပ်သောနိုင်ငံတစ်နိုင်ငံလို ဒီမိုကရေစီအနှစ်သာရကို ပြည်သူတစ်ရပ်လုံး မခံစားရသေးချေ ။ ဖြစ်လိုက်ကြသည့် ပြည်တွင်းစစ်ကလည်း ၄င်းအချိန်မှ ယနေ့ ထိ ဖြစ်နေဆဲ ။ ယခုမျက်မှောက်တွင်မူ လက်နက်ကိုင်တိုင်းရင်းသားအဖွဲ့ အစည်းများက တစ်နိုင်ငံလုံး အပစ်အခတ်ရပ်စဲရေးကို တောင်းဆိုနေကြသည်မှာ ကြာမြင့်ပြီဖြစ်သည် ။ ခုတော့ကရင်အမျိုးသားအစည်းအရုံးအဖွဲ့ နှင့် သျှမ်းပြည်နယ်ငြိမ်းချမ်းရေးကောင်စီတို့ က တစ်နိုင်ငံလုံးအပစ် အခတ်ရပ်စဲရေးကို ကြိုးပမ်းဆောင်လာကြပြီဖြစ်သည် ။

အပစ်ရပ်စဲရေးသည် လက်နှစ်ဖက်ကို ကွေ့ ကောက်ယှက်နွယ်ကာ အရက်ခွက်ကို ချီးယား လုပ်ပြီး လက်မှတ်ထိုးရုံနှင့် မပြီး ။ နှစ်ဖက်လက်နက်ကိုင် အဖွဲ့ တို့  လုံးဝမပစ်ခတ်ရအောင် စစ်မှန်သော အပစ်အခတ်ရပ်စဲရေးကို ဆောင်ရွက်ရန်လိုသည် ။ ယခုတွေ့ မြင်နေရသည်မှာ တစ်နေ့ က လက်မှတ်ထိုးပြီး နောက်တစ်နေ့ တွင် နယ်မြေကို သိလို၍ စစ်ဆင်ရေးပြုလုပ်ကာ အပစ်အခတ်ရပ်စဲရေးကို ချိုးဖေါက်နေသောကြောင့် ကြားရသူအပေါင်း စိတ်ပျက်ကြရသည် ။ ထို့ ကြောင့် စစ်မှန်သော အပစ်အခတ်ရပ်စဲရေးကို ပြုလုပ်ရန်လိုသည် ။

ယခုကြေညာချက်တွင် မူဘောင်များကို ချမှတ်ထားရာ ဆွေးနွေးမည့်အချက်တစ်ချက်မှာ အခြေခံဥပဒေကိစ္စကို ဆွေးနွေးမည်ဆိုသောအချက် ပါဝင်သည်ကို တွေ့ ရသည် ။ စင်စစ်အားဖြင့် တိုင်းရင်းသားလက်နက်ကိုင်အဖွဲ့ များနှင့် နိုင်ငံရေးသမားတို့ သည် -၂၀၀၈-ခုနှစ် နိုင်ငံတော်ဖွဲ့ စည်းအုပ်ချုပ်ပုံအခြေခံဥပဒေကို လက်ခံကြသူများ မဟုတ်ကြ ။ တိတိကျကျ ပြောရလျှင် လွှတ်တော်ထဲတွင် ရှိနေကြသော နိုင်ငံရေးပါတီများ-လွှတ်တော်ကိုယ်စားလှယ်များလို တော်ကြာ တောင်ပြောမြောက်ပြော ကြသူများမဟုတ် ။ သို့ ကြောင့်လည်း -၂၀၀၈-ခုနှစ် နိုင်ငံတော်ဖွဲ့ စည်းအုပ်ချုပ်ပုံအခြေခံဥပဒေကို တွေ့ ဆုံဆွေးနွေးရန်အချက်ကို ထည့်သွင်းဖေါ်ပြထားခြင်းမှာ နိုင်ငံရေးဆွေးနွေးပွဲကြီး၏ ပင်မအသက်သွေးကြောဖြစ်သည်ဟုလည်း ပြော၍ရသည် ။ တစ်နိုင်ငံလုံး အပစ်အခတ်ရပ်စဲရေး ဖြစ်သွားပြီ ဆိုလျှင် မြန်မာနိုင်ငံသည် ငြိမ်းချမ်းသာယာသော- သေနတ်သံ တစ်ချက်မှ မပေါက်ကွဲရသော နိုင်ငံဖြစ်သွားမည်မှာ သေချာသည် ။ တစ်နိုင်ငံလုံး ငြိမ်းချမ်းမှ နိုင်ငံတော်၏ ဖွဲ့ စည်းအုပ်ချုပ်ပုံ အခြေခံဥပဒေကို ရေးဆွဲချမျတ် အကောင်အထည် ဖေါ်ဆောင်၍ ရမည်ဖြစ်သည် ။ မငြိမ်းချမ်းသမျှ နိုင်ငံတော်ဖွဲ့ စည်းအုပ်ချုပ်ပုံအခြေခံဥပဒေသည် ဂုဏ်သိက္ခာနှင့် ပြည့်စုံသော ဥပဒေမဟုတ်ကြောင်း ယခုမျက်မှောက်ကာလ၌ သက်သေပြနေပြီးဖြစ်သည် ။
မည်သို့ ပင်ဆိုစေ တစ်နိုင်ငံလုံးအပစ်အခပ်ရပ်စဲရေးသည် မြန်မာနိုင်ငံငြိမ်းချမ်းရေးကို ဦးတည်သောကြောင့် မြန်မာနိုင်ငံတိုင်းရင်းသား လူမျိုးပေါင်းစုံတို့ က ၀မ်းပမ်းတသာ ကြိုဆိုလက်ခံရမည်ဖြစ်သည် ။

တစ်ချိန်တည်းမှာပင် ညောင်နှစ်ပင်ညီလာခံဟု ခေါ်သော -၁၉၉၃-ခုနှစ်မှ -၂၀၀၈-ခုနှစ်အထိ ရေးဆွဲရပြီး -၂၀၁၀-ခုနှစ် တွင် အတည်ပြုထားသော -၂၀၀၈-ခုနှစ် နိုင်ငံတော်ဖွဲ့ စည်းအုပ်ချုပ်ပုံ အခြေခံဥပဒေကို -၂၀၁၅-ခုနှစ်ထိ ဆက်လက်ထားရှိကြရတော့မည်ထင်သည် ။ အဘယ့်ကြောင့်ဆိုသော် တစ်နိုင်ငံလုံး အပစ်အခပ်ရပ်စဲရေး လက်မှတ်ထိုပြီး-၂-လအကြာမှာ နိုင်ငံရေးဆွေးနွေးပွဲကြီးကို ကျင်းပမည်ဖြစ်ရာ ၄င်းကဲ့ သို့ 
တွေ့ ဆုံဆွေးနွေးပွဲကြီးကို -၂၀၁၅-နှစ်တွင်မှ ကျင်းပရန်ဟုလည်း ကြေညာထားသည် ။ ၂၀၁၅-မတိုင်မှီ ဖွဲ့ စည်းအုပ်ချုပ်ပုံအခြေခံဥပဒေကို ပြင်ဆင်ကြရန် ပြည်တွင်းမှ ကြံစည်နေကြသော်လည်း ပြည်ပမှ တကယ့်တိုင်းရင်းသားလက်နက်ကိုင် တော်လှန်ရေးအဖွဲ့ အစည်းများမှ ၄င်းတို့ ၏ ကြိုးပမ်းနေခြင်းကို ဂရုမစိုက်ကြ ။ -၂၀၁၅-ခုနှစ် အလွန်မှ အခြေခံဥပဒေကိစ္စကို နိုင်ငံရေးဆွေးနွေးပွဲကြီးကညစတင်ဆွေးနွေးမည်ဟု ကြေညာထားရာ -၂၀၀၈-ခုနှစ် နိုင်ငံတော်ဖွဲ့ စည်းအုပ်ချုပ်ပုံ အခြေခံဥပဒေကား ပန်းပန်လျက်ပါဘဲဟု ပြော၍ရသည် ။ အကယ်၍ ပြင်ဆင်ရေးဆွဲကြသည့်တိုင်အောင် တစ်နိုင်ငံလုံး အပစ်အခပ်ရပ်စဲရေးမှ ဖြစ်ပေါ်လာသည့် ပြည်တွင်းငြိမ်းချမ်းရေးဆွေးနွေးပွဲကြီးမှ လက်မခံလျှင် မြောင်းဘေးရောက်သွားမည့် ဖွဲ့ စည်းအုပ်ချုပ်ပုံအခြေခံဥပဒေဖြစ်မည်မှာ သေချာသည် ။

စင်စစ်အားဖြင့် မြန်မာနိုင်ငံ၏ ပကတိနိုင်ငံရေးအခြေအနေသည် ပြည်တွင်းနိုင်ငံရေးပါတီများ၏ အစိုးရအပေါ် ရှိနှင့်နေသော ပေါ်လီစီများကြောင့် ပြည်တွင်းမငြိမ်းမချမ်း ဖြစ်နေကြခြင်းမဟုတ် ။ ပန်းနှင့်ပေါက်၍ ကစားနေကြသော သူမဟုတ်သည့် လက်နက်ကိုင်ပဋိပက္ခကြောင့်သာ ဖြစ်ပွားနေသည့် ပြည်တွင်းစစ် ဖြစ်နေကြလျှက် မငြိမ်းမချမ်းဖြစ်နေကြခြင်းဖြစ်သည် ။ ၄င်းပြည်တွင်းစစ်ငြိမ်းချမ်းမှ မြန်မာနိုင်ငံသည် တိုးတက်ဖွံ့ဖြိုးသာယာမည်မှာ အမှန်ဖြစ်သည် ။ မည်သူမှ ငြင်းချက်ထုတ်၍ မရသောအဖြေဖြစ်သည် ။ ဆိုရလျှင် ၄င်းပြည်တွင်းစစ်ဖြစ်ပွားခြင်းကို ရပ်စဲပြီး စစ်မှန်သော ငြိမ်းချမ်းရေးကို တည်ဆောက်ရန် တိုင်းရင်းသားလက်နက်ကိုင် တော်လှန်ရေးအဖွဲ့ အစည်းများနှင့် ဗမာ့တပ်မတော်မှ စစ်ဦးစီးချုပ်အပါအ၀င် တပ်မတော်သား အားလုံးတို့ က ၀ိုင်းဝန်းတည်ဆောက်ပေးရန်လိုသည် ။ တစ်နိုင်ငံလုံးအပစ်အခပ်ရပ်စဲပြီး နိုင်ငံရေးတွေ့ ဆုံဆွေးနွေးပွဲကြီးကို တိုင်းရင်းသားလက်နက်က်ိုင် အဖွဲ့ အစည်းများက ဗမာ့တပ်မတော်ကိုလည်း အမည်ဖေါ်ပြကာ ဆွေးနွေးရန် မူဘောင်ချမှတ်ထားသည်မို့  ၀မ်းမြောက်ဝမ်းသာကြိုဆိုအပ်သော မူဘောင်အချက် အလက်တစ်ခုဖြစ်သည်ဟု ပြောဆိုလိုသည် ။ ထို့ ကြောင့် မြေအောက်စစ်အာဏာရှင်စနစ် ရပ်ဆိုင်းပြီး စစ်မှန်သော ဒီမိုကရေစီနိုင်ငံတော်သစ်ဆီသို့ ဦးတည်ချီတက် ခြေလှမ်းများကို ပြင်ဆင်ကြရန်နှင့် တစ်နိုင်ငံလုံး အပစ်အခပ်ရပ်စဲရေးမှ ပြည်တွင်းငြိမ်းချမ်းရေး တွေ့ ဆုံဆွေးနွေးပွဲကြီးကို ၀မ်းပမ်းတသာ ကြိုဆိုလိုက်ပါကြောင်း ရေးသားတင်ပြလိုက်ပါသည် ။။။။။။

ခိုင်အောင်ကျော် ( နယူးယောက် )

0 အကြံပြုခြင်း: